Ingvi Þór Georgsson og Þórður Gunnarsson mæta í Þjóðmálastofuna og fara yfir allt það helsta. Við gerum stuttlega upp golfmót Þjóðmála, ræðum um útflutningsskatta í Bandaríkjunum, nýja úttekt Viðskiptaráðs um efnahagsleg áhrif af því fáa sem ríkisstjórnin (sem stundum vill kalla sig verkstjórn) kom í gegnum þingið í vor, vaxtaákvörðun Seðlabankans í næstu viku, hvort að hlutabréfamarkaðurinn sé í raun spennandi kostur í hávaxtaumhverfi, sjoppustefnu ÁTVR og tilvistarkreppu þess ríkisapparats og margt fleira.
Andrés Magnússon og Stefán Einar Stefánsson slá á létta strengi og kæta landsmenn með nærveru sinni í hlaðvarpi þjóðarinnar. Rætt er um einbeittan (brota)vilja ríkisstjórnarinnar sem vill troða okkur inn í ESB, óljós skilaboð utanríkisráðherra í samtölum við erlenda miðla, þögn forsætisráðherra um tollamál, rugludalla sem vilja skerða akademískt frelsi, stöðu flokka í könnunum sem og önnur málefni líðandi stundar.
Sigurður Stefánsson, framkvæmdastjóri Aflvaka þróunarfélags, ræðir um stöðuna á fasteignamarkaði, orsakirnar fyrir þeim miklu verðhækkunum sem hafa átt sér stað á þeim markaði á liðnum árum og hvað afleiðingar þær hafa, möguleika ungs fólks að komast inn á markaðinn, um gallaða löggjöf um skipulagsmál sveitarfélaga og kerfisvillur, hvernig leysa megi úr flækjunni, hvernig lýðfræðin hefur áhrif á markaðinn og margt fleira.
Heiðar Guðjónsson og Sigríður Andersen kíkja í Þjóðmálastofuna í aðdraganda verslunarmannahelgarinnar og fara yfir allt það helsta. Við ræðum um möguleikana á olíuleit, ummæli Heiðars um að mögulega væri hægt að fella niður alla skatta á Íslandi, áherslur ríkisstjórnarinnar á sterkari tengsl við Hamas og ESB á meðan málin hér heima bíða, nýja tolla sem ESB ætlar að setja á Ísland, hvort að forsætisráðherra sé í raun að leiða ríkisstjórnina, neikvæða umfjöllun í garð ferðaþjónustunnar, gjaldmiðlamál, hvort að vinsældir ríkisstjórnarinnar séu tímabundnar eða varanlegar og margt fleira.
Guðmundir Ingi Kristinsson birti í upphafi þessa mánaðar 2. aðgerðaráætlun stjórnvalda í menntamálum. Menn hafa beðið lengi eftir þessari aðgerðaráætlun og því er hér um að ræða mikið mikinn áfanga. Í aðgerðaráætluninni er meðal annars lögð áhersla á að styðja við grænfánaverkefni Landverndar í skólum landsins, auka áherslu á sjálfbærni og loftslagsmál og tryggja að námsumhverfi styðji við farsælt nám og vellíðan svo nefnd séu nokkur atriði. Þjóðmál leggur áherslu á góða þjónustu við hlustendur, sem er í raun þjóðin öll, og því fengum við Magnús Ragnarsson, góðvin þáttarins, til að lesa upp þetta mikla tímamótaverk eins og það leggur sig.
Kjartan Ólafsson hefur um árabil komið að uppbyggingu fiskeldis hér á landi. Í ítarlegu viðtali ræðir hann um efnahagslegu áhrifin af þeirri uppbyggingu, hvaða áskoranir hafa orðið á vegi hennar, hvernig næstu ár geta litið út, fjárfestingar í greininni, af hverju neytendur ættu frekar að vilja eldisfisk frá Íslandi frekar en öðrum löndum sem standa í sömu starfsemi og fleira. Þá er einnig rætt um þá gagnrýni sem hefur komið fram á fiskeldi í opnum sjókvíum, muninn á eldinu á sjó og landi og annað sem snýr að þessari mikilvægu atvinnugrein.
Stefán Einar Stefánsson, Þórður Gunnarsson og Örn Arnarson skelltu sér í golfferð og dvöldu í góðu yfirlæti á Camiral vellinum á Spáni. Lífið er þó ekki bara leikur því að sjálfsögðu var tekinn þáttur úti þar sem farið er yfir það helsta sem á sér stað heima fyrir. Þar má nefna hvernig forsætis- og utanríkisráðherra sperrtust upp við það að yfirmaður frá Brussel kæmi til landsins, falskar yfirlýsingar um að Íslendingar þrái það að ganga í Evrópusambandið, hvernig sífellt er traðkað á Flokki fólksins, spurningar sem ekki mátti spyrja á blaðamannafundi og fleira. Eðli málsins samkvæmt er einnig rætt um golflífstílinn, dvölina á Spáni og fleira því tengt.
Einar Sigurðsson og Hörður Ægisson fara yfir allt það helsta, eftirmálana af þinglokunum, villandi umræðu um mögulega aðild að Evrópusambandinu, verðmætasköpunina sem fjallað er um í stjórnarsáttmálanum en finnst hvergi, minnkandi líkur á frekari vaxtalækkunum í bili, mögulegan samruna Arion og Kviku og margt fleira.
Björn Bjarnason fer yfir ein skrautlegustu þinglok sögunnar, hvernig hin svokallaða verkstjórn ber ekki nafn með rentu, Flokk fólksins sem virkar eins og hækja fyrir erfið mál ríkisstjórnarinnar, hvort að forseta þingsins sé stætt á að gegna því embætti áfram, nýjan sendiherra í Brussel sem er ætlað að liðka til fyrir umsóknarferli að Evrópusambandinu og margt fleira sem snýr að íslenskum stjórnmálum. Þá ræðum við líka um stöðuna á erlendum vettvangi, til að mynda hvort að vestræn ríki hafi stutt við bakið á Úkraínu eins og þau höfðu sagst ætla að gera og fleira.
Kristín Gunnarsdóttir og Stefán Einar Stefánsson fara yfir dramatískan dag í stjórnmálunum á sinn einstaka og yfirvegaða hátt, hvort að leiðtogar ríkisstjórnarinnar hafi burði til að leiða mál til lykta á farsælan hátt, þá undarlegu staðreynd að fólk sé almennt upplýst um 71.gr. þingskapalaga ásamt öðrum og mikilvægum málum og atbuðum sem áttu sér stað í vikunni.
Kristján Vilhelmsson, útgerðarstjóri Samherja, fer yfir starfsemi félagsins í góðu spjalli sem er tekið upp í Drift á Akureyri. Við ræðum um það hversu mikið stjórnendur þurfa að vera vakandi yfir rekstrinum, hvernig tæknin um borð í skipum og í fiskvinnslum hefur þróast og hvernig félagið hefur náð að hámarka virði þess sem sótt er í sjó og fleira. Þá er rætt um erlenda starfsemi félagsins liðna áratugi, hvernig hún kom til, hvernig hún hefur gengið og margt fleira.
Andrés Magnússon og Örn Arnarson fara yfir allt það helsta, stjórnarmenn Rúv sem ætla að læra að lesa ársreikninga, golfáhuga sjávarútvegsráðherra, stöðuna í þinginu sem er enn starfandi, nýtt bankaráð Seðlabankans, pantaða niðurstöðu í gjaldeyrismálum, undarlega fánahyllingu við ráðhúsið og margt fleira áhugavert. Þá ræðum við sérstaklega þann merka viðburð sem átti sér stað í vikunni þegar Páll Gunnar Pálsson fagnaði því að hafa gegnt stöðu forstjóra Samkeppniseftirlitsins í heil 20 ár. Við rifjum upp margt af því helsta sem átt sér stað á þeim tíma sem liðinn er, hvort að „reiknaður ábati“ af starfsemi eftirlitsins sé hugtak sem hægt sé að styðjast við og margt fleira.
Áslaug Arna Sigurbjörnsdóttir tekur sér hlé frá þingmennsku og heldur til Ameríkuhrepps í nám. Í góðu kaffispjalli í Þjóðmálastofunni fer hún yfir stöðu Sjálfstæðisflokksins, landsfundinn sem fór fram fyrr í vor, hvernig það er að etja kappi við mál þeirrar vinstri stjórnar sem nú situr og ekki síður hugmyndafræðina sem þar liggur að baki, hvort að hugað sé nægilega vel að verðmætasköpun til lengri tíma hér á landi, hvort hún snúi til baka að námi loknu og margt fleira.
Stefán Einar Stefánsson og Þórður Gunnarsson fara yfir stöðuna á bjórkvöldi Þjóðmála sem haldið var í Drift EA á Akureyri. Við gerum upp afdrífaríka forsætisráðherratíð Ingu Sæland sem varði í einn og hálfan sólarhring, fjöllum um vandræði ríkisstjórnarinnar sem vill hækka skatta umtalsvert á sjávarútveginn, óreiðuástandið í dómsmálaráðuneytinu og margt fleira.
Eldur Ólafsson, forstjóri og stofnandi Amaroq, fer yfir rekstur og stefnu félagsins í ítarlegu viðtali. Við ræðum um tilgang félagsins, námugröftinn á Grænlandi, aðkomu félagsins að innviðauppbyggingu þar í landi, samskiptin við fjárfesta hér heima og erlendis, tekjumódelið sem félagið er að byggja upp, mikilvægi fágætismálma fyrir heiminn, gengi félagsins á markaði, orðræðu Bandaríkjaforseta um Grænland, það hvort að Eldur sé sjálfur rétti maðurinn til að leiða félagið á næsta stig og margt fleira.
Guðmundur Fertram Sigurjónsson og Heiðar Guðjónsson ræða um mikilvægi verðmætasköpunar, um þau áhrif sem of miklir skattar hafa á atvinnulífið, hvort það sé í verkahring stjórnvalda að móta atvinnustefnu, störfin sem verða óvænt til, hvernig íslenska hagkerfið getur litið út í framtíðinni og margt fleira í þessum innihaldsríka þætti.
Theódór Ragnar Gíslason, stofnandi og framkvæmdastjóri Defend Iceland, ræðir um netöryggismál, hvort að fyrirtæki séu almennt værukær með þau atriði sem hafa þarf í huga og hvort að einstaklingar láti þessi mál sér í léttu rúmi liggja, hvað vaki fyrir þeim sem stunda það að brjótast inn á kerfi hjá öðrum, um mikilvægi þess að deila upplýsingum um veikleika og margt fleira sem snýr að þessum þáttum sem sífellt verða fyrirferðarmeiri í lífum okkar.
Árni Helgason, varaþingmaður og lögmaður, Ólafur Jóhann Borgþórsson, fv. prestur og nú framkvæmdastjóri Herjólfs, og Sveinn Ólafur Melsted, aðstoðarritstjóri Viðskiptablaðsins mæta á helgarvakt Þjóðmála, sem í þetta sinn er tekin upp um borð í nýjasta skipi íslenska skipaflotans, Heimaey VE. Fjallað er um allt það helsta í pólitíkinni, pirringinn í stjórnarmeirihlutanum, hvort að eldhúsdagskrárumræður á þinginu skipti einhverju raunverulegu máli og fleira. Einnig er rætt um nafnabreytinguna hjá Sýn, fyrirhugaðar breytingar á eignarhaldi Play auk þess sem teknir eru ýmsir snúningar á lífinu í Vestmannaeyjum.
Óli Björn Kárason ræðir um stöðuna í stjórnmálunum, hvernig pólitísk umræða er að þróast, hvernig öfund keyrir áfram umræðu um skatta og smitast yfir á umræðu um atvinnulíf, um stöðu hægri manna og hvort þeir séu að einbeita sér að réttum hlutum í umræðunni – og margt fleira í góðu spjalli hér í Þjóðmálastofunni.
Diljá Mist Einarsdóttir og Ólöf Skaftadóttir fara yfir allt það helsta, ekki bara stöðuna á þinginu heldur líka stemninguna, galgopaleg vinnubrögð Víðis Reynissonar, dyggðarskreytingar þingmanna, ríkisstyrktan áróður fyrir evrópusambandsaðild, fylgi Sjálfstæðisflokksins sem stendur í stað, inniskósvæðingu Ráðhússins í Reykjavík, hverjar þær myndu taka með á Suðurpólinn og margt fleira.
