從宏觀到微觀，由相對冷冰冰的規劃放眼至「社會設計」，如何透過講求民間互動、在地性（貼地）、利他性（同理心）、實踐性等甚至更多因素；去設計活動、項目等等，使「冷門議題」能夠發揮其推廣的持續影響力？都係一門專項！
簡單啲講，今集有「講膠所 Talking Plastic」嘅幾位社會設計系友好們，同我哋傾：「如何貼地咁推廣環保。」。佢哋喺紅磡街市嘅民間協作項目，同我哋嘅民間推廣經驗，又會 jam 到啲咩火花呢！
好，上面講嘅設計要點及理論都可以暫拋諸腦後，從實踐中與大眾建立關係、共學、邊做邊修改；原來先係精髓！生果檔有分紅白袋，做成單次購買重複使用塑膠？為走塑又有人帶膠兜買魚？更多跳脫嘅街市限定用袋造詣，由四位女生同你哋一一解構...。街市議價你就試得多，同商家傾走塑現金券價格你又試過未？
持分者：Philip、講膠所 Talking Plastic（Viann、Joyce、Yori、Heidi）
請見諒：器材發脾氣，本集以耳筒聆聽效果相對更佳（有少雜訊）。
「Leave no trace」概念隨著時代演進，人們逐漸自省與反思郊遊活動、歷奇冒險對自然的友善程度，如何秉持公民意識，盡量使探索與破壞間的衝突遞減。而國際峰會近年更不乏以「Sustainable Mountain Tourism」為題的討論及推廣；若從一些緊扣著人類活動的既有觀念作反思，在郊野生境築起壯觀營火，是否必須？渡過了茹毛飲血的時代，爐具能替代的煮食方式，若堅持原用，是為了加熱食物、還是製造氣氛景象？增加活動體驗者的「體驗感」？
即使生火，除了可使用焚火台；國外的一些歷奇網站，亦列舉過不少野外紮營選址的要項，例如遠離草地、溪流。亦盡量將火焰「最小化」，依煮食份量執拾適當數量的木材；實用性 優於 觀賞性，以達致生態友善。更有攀岩者開始關注鎂粉對土壤的影響，嘗試推出「Eco friendly」的防滑粉，原來郊遊與自然應當取其平衡。
香港，一個郊區承載力嚴重超越負荷的地方，有戶外品牌提倡「可持續走起」，地區宣傳片卻原用舊時代的營火狂歡元素。企業除了主打「用戶體驗」面向的呈現，推廣的意識能否「因地制宜」又是否重要？
補肉員：Philip
本地勢情瞬息萬變，莫講話十年，三日分分鐘已經人事幾番新；惟獨牛事歷久不變？隨住城鄉拉近加上郊遊風潮遞增，往年牛事連連，貝澳、塔門，從公眾眼眸中一閃而過。連帶受益的牛隻議題關注重新進入了家常討論的短暫高峰，送牛迎虎，善忘不變...。
從民間角度出發，冷門議題與社會遞進的滯後跟落差，離不開關注群屬小眾，而於寥寥可數的關注群體中，相對缺乏的是議題脈絡的發展詳述及整理。以致每逢討論高峰，大眾的論述無法建基於具流通性的已有基底，達至層層遞進。永遠得啲「好嬲」、「好慘」、「人類抵死」。
所以今次，本地首個概述牛隻議題廿年脈絡嘅 Podcast，將會盤點政策上嘅變動與停滯。數據上嘅缺乏、多元性以及透明度，準備嚇大家一跳！要令秒針再度緊隨分針移動，達致因時制宜。最重要的，就是提醒大家，緊扣社會步履的現行政策仍未跟議題脫軌；皆因它們屬平行空間中的同聚鄰居，一起停滯不前，使社會步履跟不上日益遞進的大環境風氣及關注點。
補肉員：Philip
隨住疫症肆虐，措施收緊，外賣現成常態；保守估計近年啲膠刀叉嘅全年棄置量已達 200 億件咁誇張。前身為「緣在區區」intern 嘅 ahka 同 kiki，嚟到同大家講見聞、講回收忌諱；原來塑膠再造機嘅濾膜頗為昂貴？回收物若被污染，換膜又有幾煩？消費卷竟然又掀起咗一陣棄置潮...？
我哋仲會淺談膠袋徵費、管制即棄塑膠嘅公眾諮詢，由「三色筒」引申至「綠在」有關民眾回收意願及信心嘅爭議。冇錯，今集簡直係「賀年環保議題盆菜」一樣！如果佢係一碗米線，就係一碗冇走韭芽嘅過橋米。
惜食食評家：Philip、Ah Ka、Kiki
人不輕狂枉少年，踏破鐵鞋又無地圖，相信大家細個都經歷唔少，搞到要開住個 GPS 剷林落山，落到山又發現唔夠水、將僅餘嘅食糧分比成村人...。今次繼續有活潑動人嘅 Ryann 同大家講「走營」、裸行八仙嶺等哈轆史；講到郊遊前爬文準備嘅重要性，宜家就話興 YouTube，原來以前 Philip 真係上網睇文章 mark 路線？
輕狂有時，滑咗啞嘅大家心態上又有咩轉變？大家千祈唔好期待將會聽到啲好認真嘅轉變。
Gau1upper：Philip、一籃野 Ryann
「保育」一詞蘊含著人對自然的彌補之意，周旋其意，難免略顯沉重；或遠，距離在於城市與非洲大草原的遙遠。但大家有否想過，先不談獅子老虎大笨象，在談香港郊區之前，我們的城市鄰居雖然個頭微小，但也可是「保育」及善待的對象？
不出走郊野，也能學會人與動物的共融概念？今集由大嶼居民淺談「共存」，更分享因鳥巢被強行拆遷，繡出了她將雀鳥保育的訊息蘊藏於藝術作品內的契機。仲突然傾起咗對「幽靈公主」嘅睇法！
補肉班底：Philip、一籃野 Ryann
風乾物燥，山火頻生，大東山、雞公嶺、蒲台島，草原變燎原，不堪往事山友們歷歷在目，從露營角度，生火方式以至取材都有講究？而雞公嶺經大火後被種上新的植被，點知又再比越野單車留痕處處？「野山留痕」後患無窮，喺郊野、灘岸留下巨量垃圾，原來從民間及政府部門角度，運走垃圾都相當耗時不易，程序更是繁複。
毀山「民眾化」對抗山野文化，無知只是一時，反省過後的亡羊補牢才是「可持續山地旅遊（Sustainable Mountain Tourism）」之法。
小編們登山將逾 8 個年頭，由年少無知到自省投正，今次繼續輕鬆談見聞。
補肉班底：Tom、Philip
野豬捕殺令反響席捲全城，除了使動物權益的有關討論升溫不斷，垢病已久的野生動物餵飼問題再被牽起注視。保育野生物種提倡宜盡量以非接觸方式達致予動物的保育效果，不論是「好心市民」還是本地合法的持牌餵猴員，若人類以緊密接觸的餵養形式造就保育手段，你又會否「餵」懼動物習性改變，使佢哋唔「畏」懼同警惕人類？
中間的取捨應如何商榷？有送草入塔門嘅我哋係咪倒自己米？而「動保」除咗單純因為人嘅憐憫之心及情感投射，原來動物係咪因外界因素產生刺激，或表面上嘅情緒變動，都可以有科學根據？外國就「動物福祉」建基於科學化，同「善待動物」透過法例喺人類日常生活又有何應用例子？今集同大家淺談一下。
補肉班底：Tom、Philip
秋風起，三蛇肥，冬季寒冷，隨著人類發展將城郊拉近，山林漸毀，動物誤闖城市覓食難免，豈料面臨殺生之禍。「動物權益」近日打轉於大眾眼眸，同時間「大嶼」工程進入了環評審批程序，中部水域的江豚及白海豚危機再現！今集繼續有希汶，同大家以輕鬆形式，講下海豚研究員平時要做啲咩，又會回應下啲網上QnA，剖釋「圈養動物」議題坊間謬誤。
講講下又醒起海咩公園面臨緊節流危機...。
補肉班底：Tom、Philip、希汶（嘉賓）
早前虎鯨「Kiska」喺加拿大尼加拉瀑布城嘅主題樂園不斷以頭撞牆，其被囚 40年的身世惹人憐憫，圈養期間牠誕下的五條幼鯨全數夭折，「圈養動物」議題短暫搏得大眾討論。圈養動物，古今中外又有啲咩嚇人例子？喺香港起個「海濱庇護所」比動物退休，又貴唔貴？
補肉班底：Tom、Philip、希汶（嘉賓）
施政報告講明發展往北移，「北部都會區」誓成主力，「大愚」暫遭冷落，又真係唔搞個海？1000公頌嘅「一期」成現屆班子硬推政職，原來國策又禁咗填海提倡保育？成件事有幾尷尬？「雙Y」代表住施政報告規劃方針嘅導向又有咩象徵啟示？
香港嘅美麗生態，值得持續關注。
「海洋保護區」同「環境評估影響制度」，用意都係令發展期間對周邊生境嘅破壞達致舒緩及避免，點知「Hong Kong style」版本嘅係用嚟圓滿發展意向而「做樣」嘅一盞「綠燈」？施政報告倡議發展往北移，涉及地段包含「濕地」及郊野公園範圍；同時間，又提倡精簡「環評」制度程序。我哋就用「個海」這些年來受過嘅百般折磨，以「港珠澳」、「三跑」、「石鼓洲焚化爐」、「P3」及中央放風嘅「雙Y」等一連串實例，帶出「保護區」同「環評」嘅千絲萬縷，裏裏外外都已經穿曬窿，大家想像下精簡過後又會變成點？
溫馨提示，現於屯公同龍翔道塞緊車嘅你，啱先又過咗三個字，下次見。
早幾日，大雨淋漓，彷如八號波威力嘅三號波為大眾誘發好多不便，甚至悲劇。天文台發言直指面對「極端天氣」，全世界都需要加大力度減碳；既然極端氣候令淺溝變深溝，黃雨已經要勞煩「契哥」游水返工，咁我哋就淺談下「施政報告」同以往一啲發展方針是否與減碳契合？順道聽下三位小編點比個風玩謝...
———————————————————
快啲去 Follow 我地➥ Instagram 同 Facebook 啦!!!
Instagram：https://www.instagram.com/joycowshk/
Facebook：https://www.facebook.com/Joycowshk
上個營季，單係復活節五日連假，塔門同東龍島合共錄得11噸垃圾，草地荒漠化、人牛衝突頻生。營季又到，不妨入嚟聽下三位牧牛少年，上至護牛淵源、牛隻忌諱，下至現場驚險狀況、義工軼事；一齊探討下塔門「膠野」各種階段！露營前嘅籌備，你又知幾多？
——————————————————————
快啲去 Follow 我地➥ Instagram 同 Facebook 啦!!!
Instagram：https://www.instagram.com/joycowshk/
Facebook：https://www.facebook.com/Joycowshk