‏کچھ تو ہوا بھی سرد تھی، کچھ تھا تیرا خیال بھی ‏دل کو خوشی کے ساتھ ساتھ ہوتا رہا ملال بھی ‏بات وہ آدھی رات کی، رات وہ پورے چاند کی ‏چاند بھی عین چیت کا، اُس پہ تیرا جمال بھی ‏سب سے نظر بچا کے وہ مجھ کو کچھ ایسے دیکھتا ‏ایک دفعہ تو رُک گئ گردشِ ماہ و سال بھی ‏دل تو چمک سکے گا کیا..! پھر بھی تراش کے دیکھ لیں ‏شیشہ گرانِ شہر کے ہاتھ کا یہ کمال بھی ‏اُس کو نہ پا سکے تھے جب، دل کا عجیب حال تھا ‏اب جو پلٹ کے دیکھیے بات تھی کچھ محال بھی ‏میری طلب تھا ایک شخص، وہ جو نہیں مِلا تو پھر ‏ہاتھ دُعا سے یوں گرا، بھول گیا سوال بھی ‏شام کی ناسمجھ ہوا پوچھ رہی ہے اِک پتا ‏موجِ ہوائے کوئے یار کچھ تو میرا خیال بھی ‏پروین شاکر