Yeni yayımımıza xoş gəldiniz!
Bu həftəmizin 7-ci Techweek buraxılışında biomimikriya və ya digər adı ilə biomemetika haqqında söhbət açdıq. Təbiətin milyonlarla və milyardlarla il ərzində davamlı təkamülünün müxtəlif fiziki, kimyəvi və bioloji problemlərə gətirdiyi yaradıcı həll yolları və bu ağıllı həllərin texnoloji innovasiyalara necə ilham qaynağı olması gerçəyi danılmazdır.
Bu mövzu, dizayn qərarlarından tutmuş şəhər urbanistikasına qədər, tikinti sənayesindən material mühəndisliyə qədər, mikrobotlardan tutmuş, tibbi araşdırmalara qədər bir çox elmi mövzulara toxunur, və nəzərimizə çarpmayacaq qədər ətrafımızdakı hərşeylə bağlantılı ola bilər.
Bu günümüzün heyranlıqla izlədiyimiz texnologiyaları da bir zamanlar primitiv olublar və onlar da təbiətdəki canlılar kimi bənzər təkmilləşmə prosesindən keçiblər. Təyyarələrin kəşfini, biz insanların göydə uçan quşları ilk dəfə maraqla müşahidə etməsinə, səmalarda uçma arzumuzu canlandıran o quşların qanad hərəkətlərinin diqqətli analiz edilməsinə kimi geriyə izləmək olar. Elə bu təbiəti yamsılama bacarığımızın texnologiya ilə vəhdətinin nəticəsidir ki, arzularımız gerçəkliyə dönüşüblər, beləliklə biz inkişaf etmiş toplumlar halına gəlmişik.
Xoş dinləmələr arzu edirik, bizləri bütün platformalardan izləməyi və dəstək olmağı unutmayın. Təşəkkürlər!
