Wëllkomm zréck an der Poterkëscht!
Haut héiere mir, wéi dem João an dem Sofia seng Vakanze waren.
Vill Spaass beim Nolauschteren!
-
Transkript:
Vun enger Vakanz erzielen
João: O Sofia, scho rëm du! Wat eng Iwwerraschung! Wéi geet et dir?
Sofia: Mir geet et gutt, merci. Wéi geet et dir? Wéi war deng Vakanz?
João: Super! Mir waren, wéi geplangt, a Portugal bei meng Famill. D’Kanner hu sech esou gefreet hir Grousseltere rëmzegesinn. A bei dir? Wéi war Thailand?
Sofia: Fantastesch! Et war eng richteg cool Erfarung. Bangkok war hektesch, mee spannend, an d’Insel war wéi e Paradäis.
João: Dat kléngt wonnerbar. Wéi war et mam Iessen? Hues de de Pad Thai probéiert?
Sofia: Natierlech! An och gréng Curryen, Mango Sticky Rice an déi frësch Kokosnoss direkt um Strand. An et war alles esou bëlleg!
João: Wow! Dat klengt mega! Bei eis gouf et och ëmmer gutt z’iessen: meng Mamm huet fir eis hir berüümte Bounenzopp preparéiert a mir hu bal all Moie Pastéis de Nata giess. Ech mengen, ech hunn zwee Kilo bäigeholl.
Sofia: Ech och, obwuel ech vill Yoga gemaach hunn. D’Rou op der Insel huet mir wierklech gutt gedoen.
João: Du has och erzielt, datt s du och e Massagecours maache wäerts.
Sofia: Genau! D’Formatioun huet dräi Deeg gedauert an ech krut souguer en Zertifikat. A wéi war et mat dengen zwee Kanner? Net ze stresseg?
João: Am Ufank e bëssen, mee si hu sech schnell ugepasst. Si hu Sandbuerge gebaut, war schwammen, hu mat anere Kanner gespillt an natierlech gouf et och all Dag eng Glace.
Sofia: Dat kléngt herrlech. Ech hunn och nei Leit kennegeléiert, dorënner eng Norwegerin an en Australier. Mir sinn zesummen en Tempel a Räisfelder kucke gaangen an elo si mer Kolleegen op Instagram. So, du an deng Fra wollt jo wandere goen, wéi war dat?
João: Effektiv, mir wollten eng kleng Auszäit huelen, mee meng Fra hat leider eng Mogripp an do ass dat Ganzt an d’Waasser gefall.
Sofia: O nee, dat ass awer wierklech Schued.
João: Jo, sou ass dat halt, verschidde Saache kann een net virausgesinn. Mee mir haten trotzdeem eng schéin Zäit.
Sofia: Dat ass dat Wichtegst. So ech wollt deemnächst a Portugal reesen, vläicht kanns du mir jo e puer Tipps ginn.
João: Kloer! E schécken dir e puer Linke mat Plagen, Wanderungen, Restauranten a schéine Plazen.
Sofia: Dat wier super! Merci.
Wëllkomm zréck an der Poterkëscht! Haut schwätze mir iwwer Vakanz. Am éischten Dialog héiere mir, wéi zwee Frënn sech um Flughafen treffen. Duerno héiere mir, wéi eng Persoun säi Gepäck ancheckt.
Vill Spaass beim Nolauschteren!
-
Transkript:
Um Flughafen
João: Hallo! Wat méchs du dann hei? Gees du och an d’Vakanz oder ass et eng Geschäftsrees?
Sofia: O Mamm, nee, ech fléien endlech Vakanz! An du?
João: Jo, mir och. Ech fléien déi éischt Kéier mat mengen zwee Kanner. Si si scho ganz opgereegt.
Sofia: A, flott! Wou geet et dann hin?
João: Mir ginn a Portugal, bei meng Famill. Meng Eltere wunnen nach do, an et ass ëmmer schéin, si erëmzegesinn. An du?
Sofia: Ech ginn eleng an Thailand. Ech hu schonn ëmmer dovu gedreemt, e bësse méi wäit ze reesen. Et ass meng éischt Kéier an Asien.
João: Wow, Thailand! Dat ass wäit. Wéi laang bleifs de?
Sofia: Ech bleiwen zwou Wochen. Ech wëll Bangkok besichtegen, an da fueren ech op eng Insel, fir um Strand ze leien an e bësse Yoga ze maachen.
João: Dat kléngt mega entspanend. Ech hu gemengt, Thailand ass och gutt fir leckert Iessen?
Sofia: Jo genau! Si si bekannt fir Pad Thai, frësche Fësch, an natierlech tropescht Uebst.
João: An ech freeë mech op déi portugisesch Spezialitéiten – Bacalhau, Pastéis de Nata, a menger Mamm hir Zopp. A meng Kanner freeë sech natierlech op d’Glace.
Sofia: Haha! Dat kléngt no Famill an Traditioun. Wat maacht dir alles a Portugal?
João: Mir ginn haaptsächlech op d’Plage an déi zweet Woch passe meng Elteren dräi Deeg op d’Kanner op a meng Fra an ech ginn an d’Bierger wanderen.
Sofia: Schéin! Ech wäert mech gréisstendeels entspanen. Ech brauch Rou, Sonn an e bësse Kultur.
João: Bass du net nervös, eleng esou wäit ze reesen?
Sofia: E bësse schonn, mee ech hu meng Rees gutt geplangt. Ech hu schonn en Hotel an e puer Toure gebucht. Ech maachen e Bootsausfluch, ginn en Tempel besichtegen a maachen e Massagecours.
João: Cool! A mat wéi enger Airline flitts de? Mat Thai Airways?
Sofia: Jo, ech fléien elo op Frankfurt a vun do aus direkt op Bangkok. An du?
João: Mir fléie mat TAP Portugal.
Sofia: Flott! Mengem Cousin gefält Portugal och immens gutt. Hie war viru kuerzem zu Porto.
João: O, Porto ass schéin. Mee mir si méi südlech – bei Faro. D’Algarve huet déi schéinste Plagen
Sofia: Dat gleewen ech. Vläicht fueren ech och mol dohinner. Ech wëll nach vill Plazen op menger Lëscht ofhaken.
João: Maach dat! Sou, mir mussen elo leider scho bei den Check-in goen, well mir mussen eis Wallissen nach anchecken.
Sofia: Ech muss och sou lues a Richtung Kontroll goen. Mäi Fluch geet a 50 Minutten.
João: Ma dann eng schéi Rees.
Sofia: Merci! Dir an denger Famill och!
Beim Check-In
C: Deen nächsten, wgl!
J: Moien! Et ass fir op Faro. Mir hu schonn online agecheckt a musse just nach eis Wallissen anchecken.
C: An der Rei, gitt mir wgl. vu jidderengem d’Carte d’identité.
B: Hei si se.
C: Merci. Dir kënnt déi éischt Walliss op d’Gepäckband leeën.. Voilà, an elo déi nächst … Hutt dir soss nach eppes fir anzechecken?
B: Jo, eis Poussette. Kënne mir déi bis de Boarding halen?
C: Jo, dat geet. Dir gitt se eréischt of, ier dir an de Fliger klammt. Wann dir zu Faro aus dem Fliger klammt, kritt dir se erëm zréck.
B: An der Rei, Merci. Sëtze mir all beieneen?
C: Jo, dir sëtzt mat ären zwee Kanner an enger Rei, an Är Fra sëtzt an der Rei niewendrun bei der Fënster.
B: Hmm, ass et méiglech, datt si eng Plaz um Gank kritt? Dat ass méi praktesch mat de Kanner.
C: D’Mëttelplaz an d’Gankplaz si leider schon am System blockéiert. Mee frot am Fliger no, vläicht kënnt dir jo tauschen.
B: Merci, dat maache mir dann.
C: Gär geschitt. Hei sinn Är Billjeeën. Dir hutt de Gate B12 an de Boarding fänkt an enger Dräivéierelstonn un.
B: Super, villmools Merci!
C: Merci och an e gudde Vol.
Wëllkomm zréck an der Poterkëscht!
Haut héiere mir fir d'éischt en Dialog iwwer de Vëlosummer, an duerno héiere mir, wéi eng Persoun mat engem Personal Trainer schwätzt.
-
Den Transkript fir dësen Dialog fannt dir hei (klick!). Dir braucht keen Account, klickt einfach op ,,Access as guest''.
Wëllkomm zréck an der Poterkëscht!
Haut héiere mir, wéi zwou Mammen doriwwer schwätzen, wat fir hir Kanner an der Vakanz maachen.
Vill Spaass beim Nolauschteren!
-
Transkript:
E Studentenjob
A: So, wat maachen deng Kanner an der Grousser Vakanz?
B: De Jonah schafft ee Mount an engem Supermarché an d’Eva schafft dräi Wochen an enger Maison Relais.
A: Wow! Immens!
B: Dat war net ëmmer sou! Virun zwee Joer hate se fräi an hu vill doheem gelatzt. D’Wieder war net gutt an hir Frënn waren an der Vakanz. Mir waren och zwou Wochen a Portugal, mee déi aner sechs Woche ware se doheem. De Mathis an ech hu geschafft.
A: Hm…dat ass eebe meng Suerg. D’lescht Joer war de Christophe dräi Wochen a Frankräich, fir säi Franséisch ze verbesseren. Hien huet do bei enger Famill gewunnt. Moies hat hie Schoul an nomëttes hu se flott Aktivitéite gemaach. Mee dëst Joer bleift hien och heiheem. Ech schaffen och a kann net kucken, wat en alles mécht. Ech hunn Angscht, datt e just doheem hänkt a Videospiller spillt. E Studentenjob ass eng gutt Iddi.
B: Verständlech. Jo, esou léiert hie Verantwortung ze iwwerhuelen a verdéngt seng eege Suen. Et gëtt vill Méiglechkeeten: an engem Café oder an engem Restaurant zerwéieren, an engem Buttek, op engem Büro, op der Gemeng schaffen...., mee du bass spéit un. Ech hoffen, dir fannt nach eppes. Vill Schüler melle sech schonn am Wanter an am Fréijoer un.
A: O mei, da si mer jo scho vill ze spéit un!
B: Keng Panik! Du fënns online bestëmmt nach Saachen.
A: An op der Schueberfouer zerwéieren? Ech hunn dat a menger Jugend dräi Summeren hannerenee gemaach. Déi ass jo eréischt am August.
B: Hien ass dach nach keng 18, oder?
A: Hien ass 16.
B: Da geet dat net. Mannerjäreger däerfen net méi op der Fouer zerwéieren.
A: A sou!?
B: Vläicht kann en Nohëllef ginn? Hien ass dach elo bestëmmt gutt am Franséischen.
A: Säi Franséisch ass besser, mee nach net gutt genuch, fir aneren ze hëllefen. (laacht)
B: A wéi engem Fach ass hien da gutt?
A: Hien ass immens gutt an der Mathé. Ech froen hie mol, mee ech mengen, Nohëllef ginn ass him net aktiv genuch.
B: An engem Supermarché schaffen oder zerwéieren ass definitiv aktiv. Dem Jonah seng Tâchë sinn: Regaler araumen, de Clienten hëllefen, botzen, wann e Produit brécht, an der Bäckerei hëllefen a Sandwiche maachen, asw. Hien huet dat schonn d’lescht Joer gemaach a war immens zefridden. Hien ass aktiv an en ass a Kontakt mat Mënschen. Hie schwätzt all Dag Lëtzebuergesch, Däitsch, Franséisch an Englesch. Dat gefält him och gutt.
A: Dat kléngt super! Ech kucken dat den Owend direkt.
B: Schreif dem Philippe, e soll scho säi CV virbereeden.
A: Dat maachen ech! Merci fir deng Hëllef!
B: ‘t ass gär geschitt!
Wëllkomm zréck an der Poterkëscht!
Haut hu mir d'Sophie Gitzinger an d'Aude Forestier bei eis am Studio. D'Sophie ass Lëtzebuergeschproff am INLL an hält de Cours ,,Freed um Schreiwen''. Hatt erzielt eis e bëssen iwwer de Cours. D'Aude ass eng vun den Apprenanten aus dem Cours. Hatt liest eis ee vu sengen Texter vir.
Den Text gouf vum Aude Forestier am Kader vum Cours "Freed um Schreiwen" verfaasst. ©️ 2025 all Rechter virbehal.
Wëllkomm zréck an der Poterkëscht!
Am Episod vun haut héiere mir fir d'éischt, wéi zwou Persounen iwwer d'Tenue fir op eng Hochzäit schwätzen. Am zweeten Deel schwätzen zwou Persounen doriwwer, wat si op eng Mottoparty undoe sollen.
Vill Spaass beim Nolauschteren!
-
Den Transkript fir dësen Episod fannt dir hei (klick!). Dir braucht keen Account, klickt einfach op ,,access as guest''.
Wëllkomm zréck an der Poterkëscht! Haut héiere mir, wéi eng Persoun enger anerer iwwer hir vegan Ernärung erzielt. Duerno schwätzen zwee Kolleegen iwwer traditionell an alternativ Medezin.
-
D'Transkript fir dësen Episod fannt dir hei (klick!). Dir braucht keen Account, klickt einfach op ,,access as guest''.
Wëllkomm zréck an der Poterkëscht! Haut héiere mir, wéi zwou Persounen iwwer eng Renovatiounsaarbecht schwätzen. Duerno héiere mir, wéi déi zwou Persounen zesummen e Bett opbauen.
-
Transkript:
Eng Wunneng renovéieren
A: Moie Jenny, wéi ass et? Ech hunn héieren, du an de Marc, dir plënnert geschwënn?
B: Jo, mir hunn endlech eppes fonnt, wat an eise Budget gepasst huet. Et ass en zimmlech grousst Appartement mat zwee Schlofzëmmeren zu Märel.
A: Flott! Kënnt dir direkt eraplënneren?
B: Nee, leider net. D’Wunneng ass e bëssen ze almoudesch fir eise Goût a mir hunn decidéiert, se e bëssen ze renovéieren.
A: A sou! Wat loosst dir da maachen?
B: Relativ vill.. fir d’éischt ginn nei Waasserleitunge geluecht, well d’Réier schonn al sinn. Et ass eng Residence aus de 70er Joren. Da gëtt och de Buedem an der Stuff nei gemaach, do ass elo nämlech nach Tapis plein. Kanns de dir dat virstellen?
A: Dat wier näischt fir mech, mat mengen Allergien… an dir hutt jo och nach en Hond…
B: Eeben! Dofir gëtt den Tapis plein erausgerappt an et gëtt e Laminatbuedem mat Holzoptik geluecht. An da wëll de Marc och gär d’Schlofzëmmer an d’Stuff nei usträichen, well him d’Faarf net gefält.
A: Dat kléngt no vill Aarbecht… an och Niewekäschten… Hat dir dat alles mat ageplangt?
B: Na ja, wéi mir d’Wunneng kucke waren, war eis scho kloer, datt mir se e bëssen almoudesch fannen. Mee d’Lag ass top, direkt beim Märeler Park, a se huet och eng Garage mat Parkplaz. Dat war eis wichteg. A fir dee Präis hate mir soss näischt an der Stad fonnt… Mee mir hunn e Kolleeg vu mengem Papp, deen eis hëlleft mam Buedem, an Usträiche wollte mir selwer maachen.
A: A, dat geet jo dann. A schlussendlech hues du dann eng Wunneng, déi esou ass, wéi s du se gär häss.
B: Dat stëmmt. Laangfristeg gesinn lount et sech sécher, mee de Moment ass alles e bësse stresseg. Ech hoffen, datt mir awer an zwee Méint eraplënnere kënnen.
A: Ech hoffen och fir dech! A wann s de hëllef brauchs, fir unzesträichen oder Miwwel opzebauen, mell dech.
B: Merci, vläicht kommen ech nach op déi Offer zeréck!
E Miwwel opbauen
A: Ok, dat hei misst d’Bettgestell sinn. Mat wat solle mir ufänken?
B: Am beschte mam Kader. Hei ass d’Beschreiwung, kuck emol.
A: Merci. Hmm… fir d’éischt musse mer d’Säitestécker mam Kappdeel verschrauwen. Gëff mir emol den Imbusschlëssel.
B: Dee klengen oder dee groussen?
A: Dee klenge misst duergoen. Merci! Kanns du an där Zäit wgl. d’Schrauwen zortéieren?
B: Ok. Brauchs du den Akkuschrauber net?
A: Nach net, mee gläich.
O mei, d’Schrauwe sëtzen awer zimmlech fest. Kanns du mir de Gummishummer reechen?
B: Hei. Pass op, datt s de d’Holz net futti méchs!
A : Nee, nee, keng Suerg, ech passen op. Sou… dat passt. Elo brauch ech e Schrauwenzéier, fir de Kader vum Ressort unzeschrauwen.
B: Wou ass en? Ech fannen en net.
A: E misst ganz ënnen an der Geschierkëscht leien. Kuck emol do.
B: A jo, hei ass en. Voilà.
A: Merci!
B: Klappt jo ganz gutt bis elo, oder?
A: Jo, zu zwee geet et méi séier.
B : Definitiv. A wa mer fäerdeg sinn, ginn ech der een aus.
A: Deal! Mee gëff mer nach emol d’Waasserwo, ech wëll kucken, ob d’Bett riicht steet.
B: Hei ass se.
A: Merci. Jo, et ass alles riicht. Uff. Sou, elo musse mer just nach de Ressort uschrauwen, an dann ass dat Schlëmmst gepackt.
Wëllkomm zréck an der Poterkëscht!
-
Transkript:
Réckbléck - Nationalfeierdag
Emma: Salut Alma! Hues de gutt gefeiert fir Nationalfeierdag?
Alma: Hallo Emma! Jo, ech hat e super Owend!
Emma: Cool, wat hues du da gemaach?
Alma: Ech si géint aacht Auer mat enger Frëndin an d'Stad gefuer. Et ware scho vill Leit do an d'Stëmmung war richteg flott. Mir sinn duerch d’Stad getrëppelt a ware bei déi verschidde Bünen. Et gouf Live-Musek an DJ-en. Mir wollten och onbedéngt d’Freedefeier kucken, dofir si mir op de Pont Adolphe gaangen.
Emma: A... Déi nei Bréck. War do net ze vill Gedrécks?
Alma: Dach, wéi ëmmer, mee et war wierklech der Wäert.
Emma: Ech hunn d’Fotoe gesinn et huet wierklech fantastesch ausgesinn. Bass de dono direkt heemgaangen?
Alms: Nee, mir si nach eng Zäit do bliwwen, hunn eng Wurscht bei engem Stand giess an e Patt gedronk. An du? Hues de och eppes gemaach?
Emma: Jo, awer éischter den 23. Juni. Mee meng Kanner waren awer mat de Scoute beim Fakelzuch derbäi.
Alma: A, cool! Wat hues du dann den 23. gemaach?
Emma: Ech hu mer d’Militärparad ugekuckt. Ech wollt dat scho laang mol live gesinn.
Alma: A wéi war et?
Emma: Super! Ech war schonn um hallwer zéng do, fir eng gutt Plaz ze kréien. Et war wierklech flott déi Groussherzoglech Koppel ze gesinn.
Alma: O, du hues se wierklech gesinn?
Emma: Jo! Si sinn och laanscht gefuer a jiddereen huet mat de Fändele gewonk.
Alma: Dat kléngt wierklech schéin. Vläicht ginn ech d’nächst Joer och kucken.
Emma: Jo, mee vläicht gesäis de nächst Joer net méi de Grand-Duc Henri an d’Grande-Duchesse Maria-Theresa. Am Oktober ass jo den Trounwiessel.
Alma: Stëmmt! De Prënz Guillaume gëtt jo dann offiziell Groussherzog. Ech si wierklech gespaant, wéi dat wäert ginn.
Emma: Ech och! An ech froe mech, wéi d’Nationalfeierdag dann d’nächst Joer ausgesäit. Vläicht gëtt eppes Neies organiséiert?
Alma: Hmm… Wie weess.
Fir en Test léieren
Julie: Salut Nora! Kanns du mir e bëssen hëllefen?
Nora: Salut Julie! Natierlech, wat ass lass?
Julie: Ech hu geschwënn en Test am Lëtzebuergeschen an ech weess net richteg, wéi ech mech preparéiere soll. Mir maachen en Héierverstoen, Liesverstoen a schrëftlechen Ausdrock.
Nora: A, jo, ech hunn och ee viru Kuerzem gemaach. Ech kann dir e puer Tipps ginn. Wéi léiers du normalerweis?
Julie: Ech léieren e bëssen d’Vokabelen, déi mir am Cours gesinn an ech maachen e puer Übungen am Buch. Mee ech fäerten, dass ech am Héier-a Liesverstoen näischt verstinn.
Nora: Fir d’Héierverstoe recommandéieren ech dir Podcasten ze lauschteren oder Videoen ze kucken. Op Youtube fënnt ee genuch Videoen an du kanns och de Podcast Poterkëscht lauschteren. Wichteg ass, dass du Saache fir däin Niveau fënns.
Julie: Soll ech beim lauschteren och Saachen notéieren?
Nora: Jo, dat hëlleft definitiv. Schreif d’Wierder op, déi’s du net kenns, a probéier se dono nozeschloen, am LOD.lu zum Beispill. A wann s du d’Transkriptioun fënns, da lies dono eng Kéier den Text.
Julie: Ok. A fir d’Liesverstoen?
Nora: Hmm, wéi gesot, du kanns d’Transkriptioune vun den Audioe liesen, d’Texter aus dem Buch a Kannerbicher sinn och super fir den Ufank. Huel dir Zäit beim Liesen a stell dir selwer e puer Froen, wéi zum Beispill : Wien? Wat? Wéini? Wou? Notéier dono d’Äntwerten.
Julie: Ganz gutt Iddi! A wat ass mam schrëftlechen Ausdrock?
Nora: Schreif kleng Texter a fro däi Proff, e Kolleeg oder eng Frëndin fir se ze verbesseren. Du kanns d’Orthografie och op Spellchecker.lu oder Saz.lu verbesseren.
Julie: Dat ass eng super Iddi. Wéi laang soll ech all Dag léieren?
Nora: 20 Minutte pro Dag si scho gutt. Méi wichteg ass, dass s du reegelméisseg léiers.
Julie: Du hues mir elo wierklech gehollef! Ech fille mech direkt besser!
Nora: Dat freet mech. A jo, bal hätt ech vergiess, du kanns och op LLO.lu oder Exercice.lu verschidden Exercice maachen a Lëtzebuergesch léieren.
Julie: Jo, dat kennen ech schonn. Merci!
Wëllkomm zréck an der Poterkëscht! Haut schwätze mir iwwer Hausdéieren. Fir d'éischt héiere mir, wéi zwou Persounen doriwwer schwätzen, en Hond z'adoptéieren. Duerno héiere mir eng Annonce um Radio, an där zwee Déiere vermësst ginn.
Vill Spaass beim Nolauschteren!
-
Transkript:
En Hond adoptéieren
A: So, ech iwwerleeë schonn eng Zäit, fir en Hond z’adoptéieren. Elo hunn ech endlech genuch Zäit a Plaz, mee ech weess net, ob ech léiwer en Hond aus dem Déierenasyl oder aus engem Déiereschutz am Ausland adoptéiere soll. Wat mengs du? Du hues jo schonn e bëssen Erfarung mat Hënn.
B: Ech fannen et immens, datt s du léiwer en Hond adoptéiere wëlls wéi een ze kafen! Mee jo, de Choix tëscht dem Déierenasyl an engem Hond aus dem Ausland ass net evident. Béid Optioune si gutt, mee se hu Vir- an Nodeeler. Weess du schon, wat fir en Hond s de sichs?
A: Am léifsten een, dee roueg an net ze grouss ass. Et wier och gutt, wann e scho propper wier.
B: Hmm, dann ass en Hond aus dem Déierenasyl vläicht besser. D’Personal kennt d’Déieren a se kënnen dir soen, wéi se sech verhalen, ob se zum Beispill eleng bleiwe kënnen, wéi se sech mat aneren Hënn verhalen, an esou wieder.
A: Dat ass wouer. Mee mir dinn déi Hënn, déi op de Stroossen a Länner wéi Rumänien a Spuenie liewen, och immens leed. Deene wëll ee jo och hëllefen.
B: Kloer, dat verstinn ech. Déi Déiere liewen oft a grausame Bedéngungen. Mee dofir si se och oft ängschtlech. Déi meescht kennen d’Liewen am Haus net, a sinn och keng Léngt gewinnt. Dat heescht, datt ee méi Gedold an Training brauch.
A: Also mengs du, en Hond aus dem Asyl wier méi einfach?
B: Net onbedéngt, mee et ass oft méi einfach anzeschätzen. Ausserdeem kanns du e virdrun e puer Mol besiche goen an zum Beispill mat ëm spadséiere goen a kucken, ob e bei dech passt. Bei engem Hond aus dem Ausland hues du just e puer Biller oder Videoen.
A: Ech verstinn. Mee et ginn et net och Organisatiounen, déi d’Hënn hei zu Lëtzebuerg fir d’éischt an eng Fleegefamill bréngen?
B: Dach, dat gëtt et och. Dat ass e gudde Mëttelwee. Da wunne se schonn an enger Famill a se kënne sech schonn e bëssen un d’Liewen am Haus gewinnnen, an d’Leit kënnen dir soen, wéi den Hond esou ass.
A: Dat kléngt gutt. Hmm… wéi hues du et da gemaach ?
B : Mir hunn eisen Hond hei am Déierenasyl adoptéiert. Mir hate Chance, de Lucky huet eis direkt gefall an hien huet sech och mat eis wuelgefillt. Ech denken, et wier eng Iddi, einfach emol an d’Déierenasyl kucken ze goen.
A: Merci! Dat hëlleft mir scho weider. Ech mengen, ech ginn de Weekend emol kucken.
B: Gutt Iddi! Huel dir awer Zäit – sech en Hond zouleeën, ass eng grouss Entscheedung.
Komme mir elo bei d’Déiererubrik vum Donneschdeg, den 19. Juni:
Zanter gëschter Nomëtteg gëtt um Kierchbierg de Metti, e brongen Dackel vermësst. Hien huet véier Joer an huet e rout Halsband mat engem sëlweren Unhänger mat sengem Numm un. Hien ass zoutraulech, mee warscheinlech fäert en e bëssen.
Wann dir de Metti gesinn hutt oder wësst, wou hien ass, da mellt iech wgl bei der Madamm Hoffmann op der Nummer 631 809 265 oder schreift eis eng WhatsApp Noriicht op d’Nummer 671 27 72 44.
An nach eng Kéier: de Metti, e brongen Dackel, gëtt um Kierchbierg vermësst.
De Beetebuerger Zoo mellt, dass e Papagei aus hirem Park fortgeflunn ass. Et handelt sech ëm en Hyazinth-Ara an en ass ongeféier ee Meter grouss an e weit 1,4 Kilo. Seng Fierderen si blo a ronderëm d’Aen an de Schniewel ass hie giel. D’Personal aus dem Zoo deelt nach mat, dass hien ëmmer säin Numm rifft. Hie lauschtert op den Numm Rocky.
Falls dir e gesitt, preparéiert en Teller mat Nëss oder enger Wuerzel. Domat ass hien immens frou. Rufft dann och beim Déiereschutz ënnert der Nummer 48 93 95 un oder kontaktéiert de Beetebuerger Zoo op der Nummer 51 10 48 1.
Merci fir Är Hëllef!
Moien an häerzlech wëllkomm an der Poterkëscht. Wa mir d’Noriichten um Radio lauschteren, dann héiere mir meeschtens schlecht Noriichten: Krisen, Accidenter, Sträit – a just heiansdo positiv Noriichten. Haut maache mir dat anescht. An dësem Episod erziele mir iech just gutt Noriichte vun de leschte Méint bis haut.
Mir hoffen, datt mir iech den Dag esou e bësse méi schéi maache kënnen:
Gesondheet
Eng nei Kënschtlech Intelligenz kann unhand vun engem Elektrokardiogramm potenziell déidlech Häerzproblemer a Stéierunge vum Häerzrythmus bei Risikopatiente scho 14 Deeg virdrun erkennen. De Projet ass nach an der Testphas, mee esou kéinten an Zukunft vill Leit gewarnt ginn a Mënscheliewe gerett ginn.
Musek
Musek mécht bekanntlech glécklech, dat huet eng Etüd aus Finnland elo wëssenschaftlech bewisen. Wa mir Musek lauschteren, schëtt eist Gehier Gléckshormoner, wéi zum Beispill Dopamin aus. Virun allem bei eise Liblingslidder gëtt de Belounungssystem an eisem Gehier aktiviéiert, esou wéi mir dat kennen, wa mir eppes Schéines erliewen oder e gutt Stéck Schockela iessen. Musek ka Stress reduzéieren, eis Stëmmung verbesseren a souguer hëllefen, manner Péng ze spieren. Also... lauschtert är Playlist mat äre Liblingslidder a scho gëtt ären Dag e bësse besser!
Natur
Am Amazonas schützen d’Regierung an d’Mënschen de Reebësch besser: et gi manner Beem ëmgehaen. Den Taux ass déi éischt Kéier zanter aacht Joer méi niddereg wéi déi lescht Joren. Ee Grond dofir ass och, dass vill Länner sech fir d’Erhale vum Reebësch Amazonas engagéieren.
Déieren an Aartevilfalt
Vill Länner hunn hir Schutzgebidder fir Déieren um Land an am Mier am Joer 2025 erweidert. Besonnesch am Mier gëtt et elo Schutzgebidder, fir d’Korallen, d’Fësch an aner Mieresbewunner ze schützen.
Gesellschaft a Solidaritéit
Ëmmer méi Leit engagéiere sech benevol fir sozial Projeten. D’EU-Kommissioun annoncéiert, datt d’Zuel vu Benevollen 2025 sou héich wéi nach ni ass. Besonnesch jonk Persoune setze sech fir de Klimaschutz a fir Leit, deenen et net esou gutt geet, an.
Kultur
Kannerbicher sollen hëllefen, fir datt indigen a bedrot Sproochen net ausstierwen:
Op der ganzer Welt gëtt et ongeféier 7000 Sproochen. Wann eng Sprooch ausstierft, da verléiere mer och d’Kultur, déi zu der Sprooch gehéiert. E weltwäite Projet vun enger Organisatioun vun de Vereenten Natiounen zesumme mat enger Organisatioun, déi Kanner- a Jugendliteratur fërdert, wëll eng Sammlung mat Bicher fir Kanner a Jugendlecher, och Comicken a Sachbicher, kreéieren.
Wëllkomm zréck an der Poterkëscht!
Haut héiere mir, wéi eng Persoun enger Frëndin en Audio-Message mat enger Akafslëscht schéckt. Duerno héiere mir, wéi d'Frëndin am Supermarché ass an d'Produkter keeft.
Vill Spaass beim Nolauschteren!
-
Transkript:
Akafslëscht (Audio-Message)
D: Hallo Martine, ech si schonn am Auto a kann elo net méi schreiwen. Ech schécken dir e klengen Audiomessage mat der Akafslëscht fir haut den Owend. Du gees jo an deen neie Supermarché am Quartier. Ech hoffen du fënns alles. Also... Mir brauchen en hallwe Kilo Tomaten fir d’Entrée. Fir de Schockelaskuch brauche mir och nach e Pak Miel. Dat ass alles. Merci! A nee... Pardon. Kaf och nach eng Fläsch Olivenueleg. Mir hu kee méi doheem. A kaf och nach e Liter Mandelmëllech, du weess jo, d’Sabrina ass laktosintolerant an hatt däerf keng Mëllech drénken. Elo ass et awer alles... Merci! Äddi!
Am Supermarché
A : Entschëllegt, kënnt Dir mir hëllefen, wannechgelift?
B: Jo, natierlech. Wat sicht Dir?
A: Ech brauch Tomaten. Wou fannen ech déi?
B: D’Tomate sinn do hannen am Rayon vum Geméis.
A: A, merci! A wou ass d’Miel?
B: D’Miel ass am drëtte Rayon, beim Zocker.
A: Ok. An den Olivenueleg, wou fannen ech deen?
B: Den Olivenueleg ass och am Rayon vum Miel.
A: Tipptopp! Villmools merci fir Är Hëllef. Nach eng lescht Fro: Hutt Dir och Mandelmëllech?
B: Nee, mir hu leider keng Mandelmëllech méi. Iwwermuer kënnt eng nei Liwwerung. Als Alternativ hu mir Soja- oder Huewermëllech. Déi schmaachen och gutt.
A: Merci. Dat ass fein.
C: Gudden Owend. Hutt Dir alles fonnt?
A: Jo, merci.
C: Hutt dir schonn eng Clientskaart?
A: Nee, nach net. Ech huelen de Formulaire mat heem.
C: An der Rei. Dat mécht dann 23 Euro 75. Braucht Dir eng Tut ?
A : Jo, wannechgelift.
C: Dat kascht 10 Cent extra.
A: Dat ass an der Rei. Merci!
C: Bezuelt Dir boer oder mat der Kaart?
A: Ech bezuele mat der Kaart, wannechgelift.
C: Braucht Dir den Ticket?
A: Nee merci.
C: Dann nach e schéinen Dag.
A: Merci gläichfalls.
Wëllkomm zréck an der Poterkëscht!
Am Episod vun haut schwätze mir iwwer kleng Accidenter. Fir d'éischt héiere mir, wéi eng Persoun sech an de Fanger geschnidden huet. Duerno héiere mir, wéi eng Persoun enger Frëndin erzielt, datt si de Réck wéi huet.
Vill Spaass beim Nolauschteren!
-
Transkript:
E klengen Accident
A: Au!
B: Wat ass?
A: Ech hu mech an de Fanger geschnidden!
B: Hal en ënner kaalt Waasser!
A: Dat maachen ech grad!
B: Gutt!
A: An elo?
B: Wéckel Kichepabeier ronderëm an dréck fest op d’Wonn.
A: Ok.
eventuell kleng Paus
A: Gutt, et huet opgehalen ze bludden.
B: Ech desinfitzéieren d’Wonn nach. Looss dat e bëssen dréchnen, ech ginn eng Plooschter sichen.
A: Merci!
B: Voilà. Ass d’Plooschter net ze fest?
A: Nee.
B: Deet et wéi?
A: Nee, et pickt just e bëssen. Merci fir deng Hëllef! Kanns du mer just wannechgelift e puer Tranchë Brout schneiden? Mee, pass op, dass de dech net och an de Fanger schneits!
B: Ech probéieren!
En Hexeschoss
A: Allô?
B: Hallo! Hei ass d’Lisa.
A: O! Du kléngs awer net gutt!
B: Ma Nee! Ech hunn e Problem!
A: Wat ass lass?!
B: Ech hu mech virdru gebéckt, fir mäi Schong ze strécken a wéi ech mech nees gestreckt hunn, hat ech op eemol schrecklech de Réck wéi. Ech hu mech geluecht, mee lo leien ech hei an et gëtt net besser. Ech ka mech kaum beweegen a kommen net méi op!
A: Aua! Dat ass definitiv en Hexeschoss!
B: Jo? Ech hat dat nach ni!
A: Dach, ech hat dat schonn! Da kann ee kaum nach opstoen! Ech konnt, zum Beispill meng Box net méi undoen an d’Schong net méi strécken, asw.
B: O, nee! Ech muss awer schaffe goen!
A: Nee...du kanns bestëmmt och net an den Auto eraklammen oder aus dem Auto erausklammen! Dat gëtt näischt! Hues de schonn eng Ibuprofen ageholl?
B: Jo.
A: Wäermt hëlleft! Hues de e Kiischtekärkëssen oder eng Bull doheem?
B: Jo, ech hunn eng Bull.
A: Gutt! Da fëll déi mat kache Waasser a lee dech drop. Oder lee dech direkt an d’Bidden...!
B: Ha ha, da kommen ech ni méi do raus.
A: Jo, ok!
B: Mengs de, ech muss an d’Urgence?
A: Nee!!! Wann, da gees de fir d’éischt bei däin Hausdokter oder deng Hausdocktesch. Wann et der muer net besser geet, dann hëls de e Rendez-vous. Da kann een der e Muskelrelaxans oder Kiné verschreiwen.
B: Ok. Ech hunn och nach eng Sallef heiheem. Ech maachen déi nach drop.
A: Perfekt! A maach keng séier Beweegungen! Soll ech laanschtkommen, fir der ze hëllefen?
B: Nee, nee! Ech ruffe meng Schwëster nach un. Hat ass net op den Telefon gaang. Ech hunn dir ugeruff, well s du dech jo mat Réckeproblemer auskenns. Merci fir deng Rotschléi an deng Hëllef!
A: Gär geschitt! Versuerg dech gutt! Gutt Besserung a so Bescheed, wann s de eppes brauchs!
B: Merci! Maachen ech! Äddi!
A: Äddi!
Wëllkomm zréck an der Poterkëscht!
Haut héiere mir, wéi eng Persoun hirem Patron vun hiren Aktivitéiten op der Aarbecht erzielt. Am zweeten Deel erzielt eng Persoun hirer Frëndin, wat si an hirer leschter Vakanz gemaach huet.
Transkript:
Aktivitéiten op der Aarbecht
Patronne: Moien Här Welter! Wéi geet et Iech haut?
Aarbechter: Bonjour! Et geet mir gutt, merci. An Iech?
Patronne: Och ganz gutt, merci. Kënnt Dir mir soen, wéi Är Aarbechtszäite muer sinn? Ech muss dat an de System androen.
Aarbechter: Jo, natierlech. Ech kommen um 6:50 an d’Fabrick, ech badge mech an an ech fänken um 7:00 Auer mat schaffen un.
Patronne: A sou a wat maacht Dir als éischt?
Aarbechter: Vun 7:00 bis 9:00 maachen ech d’Maschinnen un a kontrolléieren d’Material.
Patronne: An dono?
Aarbechter: Vun 9:00 bis 10:30 paken ech d’Produkter an d’Këschten.
Patronne: An der Rei. Maacht Dir och eng Kaffispaus?
Aarbechter: Jo, déi maachen ech vun 10:30 bis 10:45.
Patronne: Gutt. A wéini maacht Dir Är Mëttespaus?
Aarbechter: Meng Mëttespaus ass vun 12:00 bis 12:30.
Patronne: Dir maacht nëmmen eng hallef Stonn Paus?
Aarbechter: Jo, ech iessen nëmmen eng Schmier an drénken en Téi.
Patronne: Ok. A wéi geet et dono weider?
Aarbechter: Vun 12:30 bis 15:30 lueden ech d’Päck an de Camion a kontaktéieren d’Clienten.
Patronne: A wéini sidd Dir fäerdeg mat schaffen?
Aarbechter: Ech sinn um 16:00 fäerdeg an ech gi géint 16:10 heem.
Patronne: Dir sidd ganz gutt organiséiert. Merci Här Welter!
Aarbechter: Gär geschitt!
Meng lescht Vakanz
A: Salut Caroline! Wéi geet et dir?
B: Moie Lara! Et geet mir gutt, ech si ganz entspaant. Ech war grad an der Vakanz.
A: A, flott! Wou waars de dann?
B: Ech war eng Woch eleng a Spuenien, zu San Sebastián. Dat ass eng schéi Stad am Norde vum Land. Do gëtt et Bierger a Plagen.
A: Ganz eleng? War et net langweileg fir dech?
B: Am Ufank hat ech e bësse Bedenken, mee et war guer net langweileg. Ech konnt maachen, wat ech wollt a mengem eegenen Tempo an ech hat Zäit fir mech selwer. Dat huet mir wierklech guttgedoen.
A: Dat kann ech gutt verstoen! Wat hues du dann alles gemaach?
B: Villes! Nomëttes war ech meeschtens op der Plage. D’Waasser war frësch, mee agreabel. Ech hu gelies, war schwammen an hu mech gesonnt. Moies hunn ech Yoga um Strand gemaach – dat war wierklech flott, mat de Geräischer an dem Geroch vum Mier.
A: Dat kléngt no enger relaxer Vakanz. Mee du hues gesot, du hues och Sport gemaach?
B: Jo, ech war och aktiv! Ech si Mountainbike an de Bierger gefuer. Do gëtt et vill Weeër an der Natur. Een Dag sinn ech bal véier Stonne gefuer. Ech war och zweemol wanderen.
A: Wow! Hues de och eppes Neies probéiert?
B: Jo! Ech war an enger Surfschoul. Déi éischt Stonne sinn ech dauernd vum Briet gefall, mee mat der Zäit gouf et besser. Et war ganz witzeg!
A: Dat kléngt wierklech cool! Wéi laang waars de eigentlech fort?
B: Ech war zéng Deeg fort. Dat war genau richteg. Ech hu vill erlieft, mee hat och Zäit fir ze raschten.
A: Ech kréie richteg Loscht och esou eng Vakanz ze maachen.
B: Jo, ech kann et wierklech recommandéieren. San Sebastián ass eng super Plaz – et ass net ze grouss, mee et gëtt vill ze gesinn an ze maachen.
Wëllkomm zréck an der Poterkëscht!
Am Episod vun haut héiere mir, wéi zwou Persounen en Ausfluch plangen. Duerno héiere mir, wéi zwou Frëndinnen iwwer Aktivitéiten am Alter schwätzen.
Vill Spaass beim Nolauschteren!
-
Transkript:
En Ausfluch buchem
A: Hänks de rëm um Handy?
B: Jo, pardon, ech buche grad eng Rees fir meng Mamm a mech. ‘t ass mäi Gebuertsdagskaddo fir meng Mamm.
A: Kee Problem. Schéin! Wouhi geet et?
B: Majo, dës Agence organiséiert Dagesreesen. Den 23. Juni fuere se op Stroossbuerg. Vu datt bei eis Nationalfeierdag ass an a Frankräich kee Feierdag ass, fannen ech et flott, deen Dag eng Stad ze besichen. Dann ass et net esou voll wéi de Weekend.
A: Flott! Dat stëmmt! Wéi ass dann de Programm?
B: Mir fueren um 7 Auer moies um Park & Ride Bouillon fort an-
A: O, dat ass fréi!
B: Jo, mee dann huet een eppes vum Dag. Um 10.15 komme mer zu Stroossbuerg un. Um hallwer 7 owes fiert de Bus nees zeréck op Lëtzebuerg.
A: Hm...
B: Et kann ee jo am Bus fir dohin e bësse schlofen.
A: An engem Bus kréien ech keen A zou.
B: Vläicht bass de manner midd wéi s de mengs! Mir maachen dat reegelméisseg. Et ass wierklech praktesch, well ee sech ëm näischt brauch ze këmmeren. Et muss een net selwer fueren, et muss ee keng Parkplaz sichen an no engem laangen Dag ass een och frou, wann een net nach heemfuere muss. Ech hunn nom Entdecken a Shoppe keng Energie méi, fir mam Auto heemzefueren. Dat hei ass wierklech praktesch!
A: A wéi vill kascht dat?
B: Dësen Tripp kascht 80 € pro Persoun.
A: Ok.
B: Op hirem Site kanns de kucken, wat fir Trippen a Reesen et nach gëtt. Vläicht fënns de eppes, dat der gefält.
A: Jo, ech kucke mol. Merci fir den Tipp!
-
Aktivitéiten am Alter
A: Hallo! Wéi geet et dir?
B : Gutt an dir?
A: Och gutt! Ech war de Mëtteg bei menger Bomi. Mir hunn zesumme gekacht a giess.
B: Schéin! Wéi geet et hir?
A: Et geet hir gesondheetlech gutt, mee se fillt sech immens aleng. Se kuckt vill Tëlee a liest vill, mee et ass all Dag dat selwecht.
B: Dat deet mer leed fir si. Meng Bomi ass jo och eleng, mee si huet wierklech Chance mat hirer Gemeng. D’Gemeng organiséiert vill Aktivitéite fir eeler Leit. Eemol de Mount geet si an e Sproochecafé, fir mat de Leit, déi Lëtzebuergesch léieren, ze schwätzen. Si huet do och d’kenne geléiert, eng Tuneesierin. Si treffe sech reegelméisseg, fir zesummen ze poteren an ze kachen.
Eemol d’Woch geet si an de “Fit am Alter”. Do turne si am Sëtzen a wann d’Wieder gutt ass, gi se an e Park spadséieren.
A: Wéi flott!
B: Gëtt et an hirer Gemeng keng esou Offeren?
A: Ech muss kucken, ech hunn emol net doru geduecht.
B: Stréckt si gär?
A: Jo, ganz gär. Si heekelt och gär.
B: Ma dat passt gutt! Meng Bomi trëfft sech zwee bis dräi Mol de Mount mat Leit vun all Alter, wou si dann zesumme strécken an heekelen, mee virun allem zesumme poteren. Et sinn esouguer Teenageren derbäi! Ech ginn dir mol menger Bomi hir Telefonsnummer. Wann deng Bomi Loscht huet, da ka se menger Bomi uruffen.
A: O, wéi léif. Dat ass eng super Iddi! Ech froe se mol, mee si ass bestëmmt motivéiert! Villmools Merci!
B: Ganz gär geschitt! Mir kënnen eis jo heiansdo zu véier treffen! Ech wëll och emol strécke léieren.
A: Dat maache mer!
Wëllkomm zréck an der Poterkëscht!
Am Episod vun haut héiere mir, wéi zwou Persounen iwwer de Marathon an der Stad Lëtzebuerg schwätzen.
Vill Spaass beim Nolauschteren!
-
Transkript:
De Marathon zu Lëtzebuerg
A: Salut Vinz, hues du e Samschdeg den Owend schonn eppes vir ?
B : Nee, nach net. Firwat ?
A : Ech lafe mat e puer Frënn beim ING Night Marathon mat – awer just de Semi, also den hallwe Marathon.
B: Wow, seriö? Dee war ech nach ni kucken.
A: Da gëtt et Zäit! Et ass e risegt Lafevenement hei zu Lëtzebuerg, dat gréisst aus dem Land. Et komme Leit aus der ganzer Welt fir matzelafen, an natierlech lafen och vill ambitionnéiert Hobbyleefer vu Lëtzebuerg mat. D’Ambiance an der Stad ass einfach super!
B: Kléngt cool! Also ass et net just e Sportsevenement, mee éischter eng grouss Party?
A: Jo, dat kann ee scho soen. D’Stad ass voll mat Leit, déi déi verschidde Leefer ufeieren. De Laf fänkt um Kierchbierg un a geet dann op de Lampertsbierg an duerch d’Stad. De Marathon geet och iwwer Märel an op d’Gare, mee herno kënnt jiddereen erëm um Kierchbierg un.
B: Dat ass awer keng einfach Streck!
A: Nee, virun allem de Schluss geet zimmlech biergop. Ech hoffen, ech packen dat, mee ech hu gutt trainéiert.
B: Firwat deet ee sech dann esou eppes un?
A: Ech sinn d’lescht Joer fir d’éischt mat e puer Frënn an d’Stad kucke komm an ech hunn déi Atmosphär einfach immens fonnt. E puer Méint duerno, hunn ech mech du fir eng éischt Course ugemellt, bei där ech 10 Kilometer gelaf sinn an dat ass awer relativ gutt gaangen.
B: Wéi laang trainéiers du dann elo fir de Semi-Marathon?
A: Ech hu mech am Ufank vum Joer ugemellt a lafen elo zënter zwee Méint méi konsequent, dat heescht 3 Mol d’Woch. An all Woch e puer Kilometer méi. Ech hoffen, dass ech et an zwou Stonne packen!
B: Bestëmmt! Vläicht kann ech dech jo och ufeiere kommen. Wéi kommen ech dann e Samschdeg am beschten an d’Stad? Fueren d’Busser?
A: Hmm, du muss e bëssen oppassen. Vill Stroosse si wéinst dem Laf gespaart an e puer Busser fueren en anere Wee. Kuck am beschten um Internet, do fënns du bestëmmt all d’Informatiounen.
B: An der Rei. Villäicht kommen ech einfach mam Vëlo. Gitt dir dann duerno och nach eraus?
A: Kloer! Et ginn iwwerall After-Partyen: an der Uewerstad, am Gronn, an esouguer um Glacis. Ech wäert zwar midd sinn, mee fir ee Béier misst et nach duergoen.
B: Haha, dat wëll ech gesinn. Gutt, ech sinn dobäi: fir iech unzefeieren, a fir d’After-Party duerno.
A: Flott, dat freet mech! Villäicht kanns du jo och e Schëld mat engem coole Sproch maachen.
B: Jo, dat ass eng Iddi. Vläicht fält mir jo eppes Kreatives an. Ech iwwerleeë mir mol eppes!
Wëllkomm zréck an der Poterkëscht!
Am Episod vun haut schwätze mir mat iech iwwer d'Theema Upcycling. Vill Spaass beim Nolauschteren!
-
Transkript:
Upcycling
A: So, d’Kanner léieren de Moment, wéi ee richteg recycléiert, mee ech wëll hinnen och gär weisen, wat een nach alles mat Offall maache kann. Du hues mer d’lescht Joer vun dengem Upcycling-Projet erzielt, oder?
B: Genee! Dat war fir mäi Stage an der Spillschoul.
A: Kanns du mer e puer Iddie ginn? Ech weess, um Internet fënnt een alles, mee hues du Beispiller, déi gutt mat de Kanner fonctionéiert hunn?
B: Jo, natierlech! Eppes, wat séier geet, ass en Tic-tac-toe aus Fläschendeckelen. Du mools d’Spill op e Stéck Kartrong vun enger aler Këscht a si kënnen d’Deckele umolen, entweeder mat zwou verschidde Faarwen oder se mole Symboler drop: en X, e Krees, eng Sonn, en Häerz oder eppes Aneres.
A: A, dat ass flott! Da fänken ech mol un, Deckelen ze sammelen. Mir benotzen net méi sou vill plastiks Fläschen…
B: Jo, ok! Eng aner Iddi ass, kleng Blummendëppen aus alen Dousen ze bastelen. Déi hunn ech och doheem, fir meng Kraider an der Kichen. Fir d’éischt muss de d’Béchsen natierlech spullen an de schaarfe Rand vun all Béchs mam Hummer platt schloen. Duerno muss de mam Hummer a mat engem Nol e puer Lächer an de Buedem schloen an da kënnt der d’Béchs mat Acryl-Faarf umolen. Waart, ech weisen der eng Foto vu mengen...
A: O, super! Wéi schéin! Déi Iddi gefält mer immens gutt!
B: Merci! Aus ale Këschten aus Holz oder Kartrong kann een och flott Saache maachen: eng Etagère, e Poppenhaus oder direkt eng kleng Stad mat Gebaier aus Müsli- a Cornflakeskëschten. Kuck, d’Stad, déi d’Kanner opgeriicht hunn ass bal sou grouss wéi eise Klassesall.
A: Mega! Do si jo och kleng Figuren!
B: Genee, d’Persounen an d’Déiere sinn aus alen Toilettërulloen an och ganz einfach ze maachen.
A: Super! Domat sinn d’Kanner och laang beschäftegt a kënne kreativ sinn.
B: Genee! A wéi all Léierin oder Schoulmeeschter muss de lo ufänken, Toilettërulloen ze sammelen.
A: Haha! Allerdéngs!
B: Wéi gefält der meng Posch? Déi hunn ech aus enger aler Jeansbox gebitzt!
A: Cool!
B: Gesäis de, du kanns och eleng upcycelen a kreativ sinn.
A: O, ech fäerten, ech si leider net sou douéiert wéi s du!
Wëllkomm zréck an der Poterkëscht!
Haut héiere mir, wéi dräi Persounen iwwer Aktivitéiten, déi ee mat de Kanner zu Lëtzebuerg maache kann, schwätzen.
Vill Spaass beim Nolauschteren!
-
Transkript:
Aktivitéite fir d’Kanner
Luc: Salut Anna, salut Samira! Wéi geet et iech haut?
Anna: Salut Luc! Ganz gutt, merci. Ech kucke grad, wat ech de Weekend mat de Kanner maache soll. Wéi geet et dir Samira?
Samira: Mir geet et och gutt, mee ech sinn e bësse midd, ech hu mech dës Woch vill ëm mäi Bouf gekëmmert. Hien ass immens aktiv!
Luc: Haha, jo, dat kennen ech. Meng Duechter war dës Woch och voller Energie. Ech sichen och nach no enger Aktivitéit fir de Weekend.
Anna: Meng Kanner wollten nees an de Parc Merveilleux goen. Mir waren d’lescht Woch do a si hunn et einfach super fonnt.
Samira: Jo, de Beetebuerger Park ass wierklech flott. Et gëtt esou vill Spiller an Déieren. Et kritt ee souguer speziellt Fudder fir d’Déieren ze fidderen. Dat hunn d’Kanner besonnesch gär.
Luc: Ech war nach ni do, mee ech hu schonn dovun héieren. Kënnt een einfach dohin?
Anna: Jo, ganz einfach. Si hunn och e Parking a souguer Navetten.
Samira: Wësst der wat och flott ass? De Päiperleksgaart zu Gréiwemaacher! Mir waren virun zwou Wochen do. Et war immens schéin.
Luc: Kann een do Päiperleke kucken?
Samira: Jo, do gëtt et bis zu 40 verschidden Zorte vu Päiperleken, mee och Villercher, Beien an tropesch Planzen. Déi vill verschidde Faarwen hu mengem Bouf virun allem gefall. Et ass awer zimmlech waarm a fiicht dobannen.
Anna: Dat kléngt interessant! Do kënnen d’Kanner mol eppes Neies gesinn a léieren.
Luc: A propos léieren – mir ware viru Kuerzem am Naturmusée an der Stad. Meng Duechter interesséiert sech fir Fossilien an Dinosaurier. Hatt war faszinéiert!
Samira: O, do war ech nach net mat mengem Bouf. Ass dat och fir kleng Kanner?
Luc: Et hänkt vun der Ausstellung of, mee ech mengen ab 6 Joer misst dat awer an der Rei sinn. Ech weess, dass vill Primärschoulen dohinner ginn. De Musée ass immens interaktiv.
Anna: Dat fannen ech esou wichteg! Mir waren d’lescht Joer am Luxembourg Science Center zu Déifferdeng. Meng Kanner hu mat Roboteren a mat engem risege Magnéit gespillt. Et war wéi eng Spillplaz mat Wëssenschaft.
Samira: Wow! A wat kascht dee Spaass?
Anna: Fir Erwuessener sinn et 15 Euro a fir d’Kanner 9 Euro mengen ech, mee et ass wierklech der Wäert.
Luc: Mir kënne jo eng Kéier all zesumme mat de Kanner dohinner goen.
Samira: Vläicht kënne mir jo all Kéier op eng aner Plaz goen, da gesi mir alles Méigleches. Dëse Weekend kéinte mir vläicht an den Escher Déierepark goen, se hu gutt Wieder gemellt an et ass gratis.
Anna: Jo, cool Iddi! D’Kanner kënnen do ronderëm lafen, Déiere gesinn, fidderen an heemelen.
Luc: Topp! Mir fält och grad an, dass et den Train 1900 gëtt? Do fiert ee mam Dampzuch vum Fond-de-Gras bis op Péiteng an erëm zeréck.
Samira: Wierklech?! Dat hunn ech net kannt, mäi Bouf ass e grousse Fan vun Zich!
Anna: Da maache mer dat déi zweet Kéier, wa mir eis gesinn a falls et net reent.
Luc: Jo! Dat ware lo vill Informatiounen. Loosst mech dat opschreiwen. Also: Parc Merveilleux zu Beetebuerg, de Päiperleksgaart zu Gréiwemaacher, den Naturmusée an der Stad, de Luxembourg Science Center zu Déifferdeng, den Déierepark zu Esch an den Train 1900 am Fonds-de-Gras.
Wëllkomm zréck an der Poterkëscht!
Am Episod vun haut héiere mir, wéi zwou Persounen iwwer administrativ Prozeduren wann een nei zu Lëtzebuerg am Land ass schwätzen.
Vill Spaass beim Nolauschteren!
-
Transkript
Zu Lëtzebuerg ukommen
Elena: Moie Stéphanie! Ech si lo zënter enger Woch hei zu Lëtzebuerg, mee ech hunn d’Gefill, et gëtt sou vill ze reegelen! Ech weess net, wou ech ufänke soll.
Stéphanie: Hallo Elena! Jo, effektiv. Et ass am Ufank e bësse vill, mee ech hëllefen dir gären. Hues de dech scho bei der Gemeng ugemellt?
Elena: Nee, nach net. Firwat ass dat wichteg?
Stéphanie: Du muss dech umellen, well s du dann e Certificat de résidence da kriss. Dee brauchs du fir vill administrativ Prozeduren, wéi zum Beispill d’Krankekeess oder fir e Bankkonto opzemaachen.
Elena: A, ech verstinn! An, wéi ass et mat der Krankekeess?
Stéphanie: Du muss dech bei der Caisse Nationale de Santé (oder: CNS) umellen. Wann’s de schaffe gees, mécht däi Patron dat fir dech. Wann s du nach keng Aarbecht hues, da muss du dech selwer bei der CNS umellen.
Elena: Ok... A wéi eng Pabeiere brauch ech dofir?
Stéphanie: Normalerweis brauchs du deng Identitéitskaart, de Certificat de résidence an eventuell en Aarbechtskontrakt.
Elena: A wann ech e Bankkonto wëll opmaachen?
Stéphanie: Do brauchs de och deng Identitéitskaart an e Certificat de résidence. E puer Banke froen och en Aarbechtskontrakt.
Elena: Wow. Merci! Nach eng lescht Fro, wéi ass et mat der Steiernummer? Kréien ech déi automatesch?
Stéphanie: Jo, normalerweis kriss du se automatesch, mee ech géif an denger Plaz eng Kéier bei der Administration des contributions directes uruffen, wann s du méi konkreet Froen hues. Vill Informatiounen stinn awer och op Guichet.lu an do kanns du alles noliesen.
Elena: Ui! Ech hunn nach vill ze maachen! Wat ass da genau Guichet.lu?
Stéphanie: Guichet.lu ass eng offiziell Regierungssäit, wou s de all administrativ Informatioune fënns, déi s de zu Lëtzebuerg brauchs. Et ass wéi e Guide fir d’Steieren, d’Sozialversécherung, Wunnen, d’Aarbecht an nach Villes méi.
Elena: Ok, ech verstinn. Villmools merci fir all déi Informatiounen an deng Hëllef!
Stéphanie: ‘t ass gär geschitt.
Wëllkomm zréck an der Poterkëscht!
Haut héiere mir, wéi dräi Persounen iwwer hir Hobbye schwätzen. Duerno héiere mir, wéi zwou Persounen hir Moiesroutine beschreiwen.
Vill Spaass beim Nolauschteren!
-
Transkript
Iwwer Fräizäitaktivitéite schwätzen (A1)
B: Myriam, wat méchs du gär an denger Fräizäit?
M: Ech liese gär Bicher. Liese mécht mir Spaass. An du, Ben, wat méchs du gär an denger Fräizäit?
B: Ech spille gär Fussball. Dat ass flott! Ech liese guer net gär.
M: Schued! An du, Liz, wat ass däin Hobby?
L: Mäin Hobby ass molen. Mee ech liesen och gär!
M: Cool! Wat ass däi Liblingsbuch?
L: Hmm… Ech sinn e groussen Harry-Potter-Fan.
M: A, du lies gär Fantasy-Bicher !
L: Jo, dat ass richteg.
B: Harry Potter fannen ech och flott. Ech kucken d’Filmer gär mat menger Frëndin. Hatt ass och e Fan vun der Serie.
L: Ben, spills du just Fussball, oder kucks du och Fussball?
B: Natierlech kucken ech och gär Fussball! Meng Liblingsekipp ass den FC Barcelona. Ech kucken all Match op der Tëlee.
M: Hues du e Liblingsspiller?
B: Jo, de Pedri. Hien ass jonk a spillt ganz gutt.
L: Cool!
Moiesroutine (A2)
T: Hallo Lea! Du bass awer erëm fréi um Büro.
L: Moien Theo! Jo, ech sinn all Dag fréi hei. Ech stinn schonn um 6 Auer moies op.
T: Seriö? Ech erwäche meeschtens eréischt um hallwer aacht. Da maachen ech fir d’éischt emol dräi Mol de Wecker aus…
L: Haha, dat kennen ech nach vu fréier. Mee elo muss ech mech all Dag tommelen. Ech erwäche meng Kanner, doe se un – dat dauert ëmmer laang.
T: O jo, dat kléngt stresseg.
L: Dat ass et och! Duerno duschen ech mech séier, ech decken den Dësch, maachen de Kaffi fir jiddereen an ech preparéieren e Snack fir meng Kanner fir mat an d’Schoul. Duerno geet mäi Mann mat de Kanner op de Bus.
T: Ech si frou, datt ech just u mech denke muss. Ech stinn op, maachen d’Kaffismaschinn un, an da scrollen ech e bëssen um Handy. Duerno doen ech mech un, wäsche mech a raséiere mech. Ech drénke bal ni Kaffi doheem.
L: Ech muss moies doheem eppes iessen, soss iessen ech duerno um Büro ze vill Schockela!
T: Heiansdo huelen ech eng Schmier mat, mee meeschtens kafen ech e Croissant oder eng Schockelasrull beim Bäcker.
L: A wéi kënns du op de Büro?
T: Normalerweis fueren ech mam Bus. Ech lauschteren ënnerwee e Podcast oder ech liesen e Buch. An du?
L: Ech fueren ëmmer mam Auto. No der Aarbecht kann ech meng Kanner direkt an d’Schoul siche goen. Mee heiansdo brauch ech laang, wa vill Verkéier op der Autobunn ass.
T: Jo, dat kennen ech. De Bus steet och oft an der Stad am Stau. O, et ass scho bal néng Auer! Meng Reunioun fänkt gläich un!
L: Vill Spaass! Bis herno an der Kantin!
