【鄭南榕以和平非暴力推動「新國家運動」】 1988年个熱天，鄭南榕頭一擺出國，佢去了日本、美國，同當多海外个台灣人見面，包含台獨聯盟个成員。轉來過後，佢開始還較煞猛去推動建立新國家个行動，正有了「新國家運動」，毋過淨係喊出台灣獨立个口號還毋罅，愛有實際个作為，故所鄭南榕在12月初10，世界人權日該日發行个《自由時代》週刊第254期，刊出許世楷寫該《臺灣共和國憲法草案》，希望這篇文章能餳得著大家，共下來討論出一隻適合台灣个新憲法。 因為這篇新憲法草案，震撼了台灣社會，也引起國民黨个不安，雜誌再過分人查禁，鄭南榕在翻轉年1月21收到了「涉嫌叛亂」个傳票，佢拒絕接受這個罪名，還講這當顯明係國民黨對政治異議份子个迫害，人民應該有權抵抗。 故所，鄭南榕為著宣示決心，佢講：「國民黨抓無𠊎个人，斯捉得著𠊎个屍身。」還過對1月26起勢，佢同自家關在雜誌社肚，毋行出半步。面對國民黨政府个暴政，鄭南榕自家同自家關起來，這其實係盡平和个非暴力抗爭。 自家同自家關起來个期間，有盡多來自國際組織个關心還過台灣民間个聲援，還有聲援个人自動去做志工，日透夜輪等到雜誌社掌等，就係為著愛防軍警硬同提鄭南榕捉去。 -- Hosting provided by SoundOn