【1989年519鄭南榕告別式】 鄭南榕个死，毋使多講震撼了全台灣，國民黨政府想愛抹烏佢个犧牲，毋過這無辦法撼動鄭南榕帶來个影響。這自由之火，無在4月7該日分人打烏，顛倒係對該棟狹狹个人屋肚遰到全台灣、甚至遰到海外个台灣人心肝肚。除忒在士林廢河道搭个靈堂，全台各地乜陸陸續續有民眾自動設了追悼鄭南榕个靈堂。 鄭南榕个告別式就選在5月19，呼應佢發起个頭一個社會運動，519反戒嚴綠色行動。出山該日，緊落等雨，長長長个送行隊伍做得講都看無著尾，現場氣氛又悲傷又肅穆个氣氛。毋過就連這日，當局還係派了當多該軍警，嚴條監控送行个所有過程。 在隊伍行到總統府前該下，輒輒響應支援鄭南榕个社運个伴：詹益樺，在這時節𢫦𢫦風點著火愛自焚，佢識講過：「鄭南榕係一粒偉大又好个種仁，我希望自家乜成為一粒偉大又好个種仁。」詹益樺代表个，係當多追隨鄭南榕个伴，係基層釘根又有實際作法个力頭，佢無麼个好看个經歷，斯有對台灣个一片真心。佢點著該火，共樣成為台灣民主路項當重要的滋養。 毋單淨詹益樺，還有當多个台灣人乜受到了鄭南榕的鼓勵。這火，點著了當多人克服困難个勇氣。在國內，開始有還較多人落身去做無共樣面向个改革運動，包含過後廢忒懲治叛亂條例同刑法一百條个修正。在海外，有當多分人列做烏名單个台灣人試等愛突破國民黨政府个封鎖，決心愛轉到台灣。大大細細个行動累積下來，都係緊在推動台灣成為一個還較自由个國度。 -- Hosting provided by SoundOn