【台灣成為自由國度的契機】
鄭南榕曾經捌因為發起反戒嚴的社會運動，被當局編造一个「違反選罷法」的罪名掠去坐監，佇監獄中的時陣， 伊每工都寫日記，其中有一句話就是你現在所看著：「台灣成為自由國度的契機」。
Tēnn Lâm-iông tsan-king bat in-uī huat-khí huán kài-giâm ê siā-huē ūn-tōng, pī tong-kio̍k pian-tsō tsi̍t ê “ uî-huán Suán-pāhuat” ê tsuē-miâ lia̍h-khì tsē-kann, tī kàm-ga̍k-toing ê sî-tsūn, i muí kang to siá jit-kì, kî-tiong ū tsi̍t kù uē tiō sī lí hiān-tsāi sóo khuànn--tio̍h: “Tâi-uân sîng-uî tsū-iû kok-tōo ê khè-ki”.
回顧鄭南榕的理念佮行動，咱會發現伊不斷佇咧創造機會，欲予台灣成為閣較自由的所在。
Huê-kòo Tēnn Lâm-iông ê lí-liām kah hîng-tōng, lán ē huat-hiān i put-tuān tī-leh tshòng-tsō ki-huē, bueh hōo Tâi-uân sîng-uî koh-khah tsū-iû ê sóo-tsāi. 不過，現在的台灣，好親像閣有一段路愛行。 Put-kò, hiān-tsāi ê Tâi-uân, hó-tshin-tshiūnn koh ū tsi̍t tuānn lōo ài kiânn.
因為濟濟前輩的拍拚，台灣行向開放、民主的社會，但是卻面對著另外一个更加強勢、壓霸的中國來對咱打壓。 佇國際 的公開場合頂懸，咱猶是有一寡話袂當講；咱猶原愛含含糊糊講出咱家己是對佗位來的。
In-uī tsē-tsē tsiân-puè ê phah-piànn, Tâi-uân kiânn hiòng khai-hòng, bîn-tsú ê siā-huē, tān-sī khiok bīn-tuì-tio̍h līng-guā tsi̍t ê kìng-ka kiông-sè, ah-pà ê Tiong-kok lâi tuì lán tánn-ap. Tī kok-tsè ê kong-khai tiûnn-ha̍p tíng-kuân, lán iáu-sī ū tsi̍t-kuá uē buē-tàng kóng; Lán iû-guân ài hâm-hâm-hôo-hôo kóng-tshut lán ka-tī sī tuì tó-uī lâi--ê.
佇鄭南榕殉道數十年了後，你感覺，台灣成為一个自由國度的契機是啥物？咱猶欠缺啥物咧？
Tī Tēnn Lâm-iông sûn-tō sòo tsa̍p nî liáu-āu, lí kám-kak, Tâi-uân sîng-uî tsi̍t ê tsū-iû kok-tōo ê khè-ki sī siánn-mi̍h？Lán iáu khiàm-khuat siánn-mi̍h--leh?
--
Hosting provided by
SoundOn
