ამდღანერი ჩქინი პოდკასტის სუმარო პუნა ლინგვისტი, წინგიშ "ვისწავლოთ მეგრული / დიბგურუათ მარგალური"-იშ ავტორი ნათია ფონიავა. იფჩიებუთ თე ოხემანჯღვერეშ მუკიმუკი. დასურო ჯგირი საქვარი რე ქიმინელი დო თე "მუშით მაგურაფალი" ბრელს გიმადირთუ; გიშაკერზაფილო თი კათას, მისით მარგალური ნინაშ გურაფა ოკო დო ირიათო ითხიინდუ ათეჯგურა ოხემანჯღვერე წინგიშ გიშაშქუმალასინ.

იფჩიებუთ კალანდაშენ, ქუჩუჩიშენ (ჩიჩილაკი) დო ჯვეშით ახალ წანაშა მერსხილი შხვადოშხვა რიტუალეფშენ, ტრადიციეფშენ.
სანარღოთ, ამდღანერი საქორთუოს, მუჟამც კალანდას დო ქუჩუჩის შინანან, ხვალე გურიაშე იჭყანა ჩიებას, ვარინ გურიაშე უკულაში პოპულარული დო ჯვეში, თე ტრადიცია დო თიშა მერსხილი რიტუალეფი, სამარგალოს ხოლო დღას ვა ჸოფე. დოჭარით თქვანი კომენტარეფი თე თემაშ დინახალე, ქიგიბშინათ დო ქუგუოშინათ ართიანს, ბრელი გოჭყოლადირი ტრადიცია დო ვარი რიტუალეფი, ნამუთ ჩქინ კუნთხუს ჸოფე დო ასე დინაფილიე, ვარა მადინაფუ შარას გერენ...

მიგახვამანთ არძას ამდღანერ დღას, ქირსეშ მარდიქ გუმატიბეს! ამდღანერ პოდკასტის ჩიება მაღვენუნა მარგალური ნინაშ პრობლემეფშენ, ბაღანეფშენ, ნამნეფსით მუნეფიშ ფანიას, ასე ანწი მარგალურო მითა ურაგადუნ...