على غير المتوقع، ولأول مرة من انطلاق دوبو.. هشام فقيه يتغيب عن البرنامج وسارة هي اللي قدمت الحلقة، بس مو لحالها، كان معاها ولحلقتين على التوالي نايف الظفيري.
نايف وسارة قدموا الحلقة بشكل رهيب، ورغم أنه هشام مو موجود ما سحبوا على فقرة شباك التذاكر اللي تمل منها سارة 🤣. اتكلموا عن ترشيحات جوائز ايمي، ومسلسل ذا استوديو، وردوا على أسئلة الجمهور، وحكونا عن آخر أعمال شافوها، خصوصا سلسلة كثيب (dune) اللي يعشقها نايف لدرجة يقرا رواياتها، وكمان فاجأنا سارة في الكلام عن أدوراها المفضلة عند نايف زي ما هي قدمت تحية لهشام واتكلمت عن أدواره المفضلة عندها... حلقة ما تتفوت.
حلقة مرررررة رايقة، ولكن لا تخلو من البهارات!هشام مهو طايق يقرا الملخص الأسبوعي، وسارة فاجأتنا أنه عندها فيلم رعب تمثل فيه وهي دايما تنتقد هشام عشان يحب أفلام الرعب 🤣.. بس أحلى شي كان فقرة أسئلة الجمهور اللي صار فيها مضاربة ودية بين سارة والدبور خلود عشان اختلاف رأيهم في مسلسل، هذا غير فقرة أكثر 3 اللي كانت عن أفلام هشام وسارة المفضلة وهم صغار.. والحمد لله عادت فقرة العشوائيات/الكرنجات/المنوعات من جديد وأخدت وقت لا بأس به من الحلقة 🤲🏼
حلقة جديدة مع ضيف جديد ورهيب هو الممثل نايف الظفيري، فريق الإعداد جاب العيد في سيرته الذاتية بس الحمد لله سامحنا صديقنا العزيز 😐🥲
نايف مرة أمتعنا وطول معانا فوق وقت الحلقة، حكالنا عن تجربته الثرية في الإنتاج من أول ما راح مصر، وطبعا اتكلم عن المسلسلات والأفلام وتجربته فيها، هذا غير أنه شاركنا رؤيته وأفكاره في الفن والسينما، والدبورز ما قصروا وسألوه ورد عليهم، هذا غير الفقرات المعتادة اللي اتكلموا فيها عن مسلسل صراع العروش اللي سارة ما شافته إلى الحين! وإيش الأفلام القديمة اللي يحبو يشوفوها في إعادة إنتاج، والكثير المثير 🦎
حلقة مرة مختلفة، سارة وهشام بعد الملخص الأسبوعي سووا لقاء خاص مع المخرجة الفلسطينية دينا ناصر وشريكها في مشروعهم لسينما الصم، اتكلموا عنه وشاركونا معلومات وتجارب مرة مختلفة مع المصابين بإعاقات سمعية ورؤيتهم الفريدة من نوعها للأفلام، وبعد ما كلمونا كمان عن فيلم دينا الآخير "سكون"، رجعوا سارة وهشام للجمهور وأسئلته الرهيبة، هادا غير فقرة أكثر ثلاثة اللي كانت مرة منسجمة مع أحداث العالم. حلقة ما تتفوت.
في عز صفارات الإنذار، هشام دخل علينا بالسلامة من عمّآن وسوا الحلقة مع سارة في عز تحضيره للفيلم!سارة ضحكت مرة لأنه أول مرة هشام ما يمسك الكنترول في الإخراج وقعد زيو زيها قدام محتوى الحلقة وفقراتها، عشان كدا ما كان في مشاكل تقنية، والصوت كان تمام 😂 وعدوا على كل الفقرات ما عدا الفلسفة، اتكلموا عن طفش سارة من توم كروز وفيلم "سينرز"، وليش صناعة الأفلام قاعدة تموت، وطبعا حكونا عن آخر أعمال شافوها، والأهم أسئلة الجمهور اللي كانت مرة رهيبة ودخلتهم في حوارات عن تقنيات السينما، والبهرجة الإخراجية، وأكثر ممثلين يبغوا سارة وهشام يشتغلوا معاهم.
سارة وهشام حكّوا مع إبراهيم عن سيرته الفنية، مواهبة وأعماله، وطبعاً ركزوا على فيلمه الجديد "إسعاف" اللي مولع شباك التذاكر - ما شاء الله تبارك الله - وأكيد اتبادلوا خبراتهم وتجاربهم والردود على أسئلة الجمهور، واتفلسوا طبعاً في الكلام عن الأفلام القديمة وإيش السر ورا حنيننا لأعمال زمان. حلقة من جد مسلية بالذات للي يبغوا يشوفوا الجانب الإنساني الرايق لإبراهيم الحجاج.
حلقة رايقة في نص زحمة هشام وسارة، مليانة أخبار ومنافسات وكلام عن آخر الأعمال اللي شافوها، وغير أسئلة الجمهور المعتادة جابوا الأسئلة اللي سحبوا عليها الأسبوع اللي فات عشان لا أحد يزعل، هذا غير الكلام عن المسلسلات اللي ناس كتير ممكن تشوفها خايسة بس هشام وسارة يحبوها ويتفرجوا عليها بالسر 😂، وقبل لا تخلص الحلقة هشام سوا تمرين عن كتابة ملخص لقصة حياته لو كان بسويها مسلسل وأكيد كان كوميدي.
حلقة حريييييييقة من دوبو.. ورجعوا سارة وهشام يستضيفوا نجوم، ولأول مرة نستضيف ممثلة من مصر.. الموهوبة سارة عبد الرحمن!
هشام وسارة حكوا معاها عن أعمالها، وصداقتهم معاها، والدوبرز أبهروها بأسئلتهم ومعرفتهم العميقة بشغلها وأفلامها، والنقاش كان مرررررة ثري وتفاعلي.. اتكلموا عن أخبار المهرجانات، آخر أعمال حضروها، ومع أسرار المهنة من تجربة سارة عبد الرحمن، مع سؤال فلسفي عميق كالعادة عن السبب اللي يخلينا نشوف فيلم عن قصة نعرفها، وأخيراً أعطونا قائمة محترمة بأفلام سيرة ذاتية يحبوها وتستحق المشاهدة.
حلقة هي الأطول في تاريخ دوبو.. بس رغم طولها ما حد طفش طبعاًسارة مرتاحة أخيراً بعد ما اتأخرت طيارتها وهي راجعة من مهرجان كان، وقعدت هي وهشام يردوا على أسئلة الدوبرز ومرة حمااااس. اتكلموا عن تطور السينما السعودية، وأفلامهم المفضلة في التسعينات، وإيش المسلسلات والأفلام اللي شافوها مؤخراً.. وأخيراً رجعوا لفقرة كرنجات طويلة بس مع اسم جديد "عشوائيات". الحلقة شهدت على غير العادة إعلان مهم لكل المصممين والرسامين اللي يبغوا يشاركوا أعمالهم الفنية في دوبو، والأهم إنه لأول مرة صارت الفقرات برعاية دوبية ورسوماتها الفنانة من تصميم عبدالله الجابر.
دوبو حريقة.. ودام هشام بلوس أنجلوس سارة دخلت ودوبها واصلة لمهرجان كان!
حلقة مليانة كالعادة أخبار ومواضيع وأسئلة ومناقشات وجدالات وتعليقات، اتكلموا فيها عن تعيين فيصل بالطيور في مهرجان البحر الأحمر، وفيلم جيمس كاميرون الجديد، وإطلالات الميت جالا، وايش آخر أعمال شافوها.. وكمان اتناقشوا مع الدوبرز عن بوسترات الأفلام السعودية، نصائح عن التمثيل، وإيش الأغلاط اللي لازم نتجنبها في المجال.. وفي الآخر طبعا شغلوا كرنجات بس تعبانة 🤣
حلقة جديدة مليانة أخبار ومقارنات بين شباك التذاكر الأمريكي والسعودي، وكمان آخر الأعمال اللي شافوها هشام وسارة أو دوبها نزلت.
هروج رهيبة ما تخلص مع الدوبرز، اتناقشوا فيها عن جرأة الأعمال السينمائية والتلفزيونية، أدوار رفضوها سارة وهشام، والأدوار اللي كان يحلموا يسووها، وطبعا حديث شيق عن سرقة الأفكار الابداعية.. ومواضيع تانية كثير!
لكل جواد كبوة، وبعد طيحة سارة اللي قلبت الانترنت سارة وقفت على رجولها ورجعت للحلقة 25 من دوبو!
لا هشام ولا الدوبرز خلو فيديو سارة يعدي على خير، بس غير طيحتها على السجادة الحمرا سارة حكت كتير عن تجربتها في مهرجان أفلام السعودية، واتناقشت مع الجمهور عن هويات المهرجانات المختلفة ورأيها في الجوائز ولجان التحكيم وتصويت الجمهور، هادا طبعا غير كلام هشام معاها عن آخر الأخبار وايش دوبهم شافوا، وسؤال فلسفي مرة حبوه عن الاختيار بين الأدوار الحلوة والظهور كضيف شرف في فيلم رهيب... نقاش ممتع وثري ومرة خفيف على القلب كالعادة.
مو بس هشام اللي سافر لوس أنجلوس، هالحلقة سارة داخلة من الشرقية عشان تحضر مهرجان أفلام السعودية!
حلقة مليانة أخبار، ابتكارات، واتفاقيات، ومنافسات.. ومن أول الأفلام العربية اللي مشاركة في مهرجان كان، إلين الرجال اللي يشبه والتر وايت في مهرجان أفلام السعودية اللي شافتو سارة، حلقة كالعادة دسمة، ردوا سارة وهشام فيها علي أسئلة الدوبرز، واتكلموا عن فيلم هوبال، ومشكلة قلة المنصات المنتجة للمسلسلات، ونصائح مرة مهمة لصناع الأفلام المبتدئين اللي يبغوا يسووا أفلام قصيرة، وطبعاً والأهم هو تعويض فقرة الكرنجات اللي غابت عن الحلقة اللي فاتت :)
حلقة جديدة خفيفة ظريفة ومليانة مررررة
بعد آخر أخبار هوليوود، هشام وسارة استعرضوا أجدد الأفلام والمسلسلات اللي شافوها واللي دوبها نزلت، وبعدها عدوا على أسئلة وتعليقات الجمهور والأهم أنه لأول مرة سمعنا صوت الدوبرز في جروب الديسكورد، والدوبرز بسبب الاستفتاءات والأجواء الديمقراطية اخترعوا مصطلح جديد "الدوبوقراطية"!
دوبو يرجع بعد إجازة العيد، حلقة رااااايقة مليانة هروج في آخر تطورات سوق الانتاج في هوليوود، من المسلسلات الجديدة لآخر ألعاب الفيديو، وطبعا هشام وسارة عدوا على تعليقات الجمهور وأسئلته واتناقشوا عن أشياء كتيرة من الكوميديا العنيفة لأكتر الأنماط اللي يفضلوها.
هشام رجع لوس أنجلوس وسارة زي ما هي في جدة وحلقة رااااايقة من حقون أول شهرين في دوبو هشام عدا سريع على آخر أشياء صارت في فلسطين ووثائقي جديد عن تضامن طلاب أمريكا معاها، مسرحية ناصر القصبي الجديدة، ومهرجان أفلام السعودية، وكالعادة قرا تعليقات من الحلقة الفاتت مع براء عالم، وطبعا لا يخلو الأمر من نقاش عميق عن الفن وتغيير المجتمع، التفضيل بين الشهرة والجودة، والفرق بين أجواء العيد دحين وأيام زمان، وقبل ما يتفرجوا على فقرة المنوعات - اللي أول مرة يقول عليها هشام "كرنجات".. أخيراً - هشام جاب هدية لسارة وكشف عن أول راعي من أول ما بدأنا بث السنة اللي فاتت.. "تطبيق جوفيا"! حلقة تستاهل الصراحة
بعد انقطاع من "فيلمر" براء عالم يرجع لليوتيوب في بث جديد من دوبو!حلقة رهيبة حكى فيها براء عن دوره في مسلسل "شارع الأعشى" وبدون حرق، اتكلم عن تدريبه على اللهجة النجدية واللهجات التانية اللي يبغى يتعلمها، ومع سارة وهشام كل واحد اتكلم عم إيش دوبهم شافوا وإيش أكثر أفلام اللي حبوها، وأحلى شي إنه براء طلع قيمر على خفيف، قالنا على الألعاب اللي يحبها، دا غير النقاش الممتع عن الفن والتغيير الاجتماعي ورأي براء عن معايير الجوايز الدولية.
وفي ثاني حلقاتنا في شهر رمضان رجعوا لنا سارة وهشام بضيفة جديدة وصديقة قديمة لهم هي الممثلة سمر شِشّة 💚هشام اتقاعد دي الحلقة عن تقديم الضيوف عشان يرتاح من استعجال سارة ومقاطعتها وخلاها هي تقدم سمر.. وبكدا عرفنا كيف اتعرفوا على بعض وإنهم عشرة عمر، وبعد ما عدوا على فقرة الأخبار اتناقشوا في مواضيع مرة مهمة وكمان تضحك. اتكلموا عن أسباب تراجع مبيعات تذاكر الأفلام، وأسلوب التسويق لترشيحات الأوسكار، وإيش الأعمال اللي شافوها قريب أو يحبوها من زمان من أول مسلسل "وايت لوتس" لين أفلام كرتون ديزني، وقبل ما ينهوا الحلقة أخيراً وبعد طول انتظار سارة استلمت فقرة المنوعات (الكرنجات عشان لا تزعل) وبصراحة... حريـــــ 💥ـــــقــة
دوبو 18: حكيم جمعة، جوائز الأوسكار، يوميات رجل عانس، الدراما والسياحة، رشاش، الطموح ولا الوظيفة، مفضلات حكيم.
الدسكربشن:
من لوس أنجلوس.. يعود إليكم هشام وهذي المرة يقدم الحلقة مع سارة ومعاه ضيف في بيته.. صانع الأفلام والممثل الموهوب حكيم جمعة!
حكيم في أمريكا عشان حضر الأوسكار، وعشان كدا الحلقة بدأت بالكلام عن الحفلة والجوايز، المفاجآت والتوقعات، بس كمان دخلت في العميق.. سارة حكت عن تجربتها المشتركة في الشغل مع حكيم، وأكيد جاوب على أسئلة الجمهور.. ليش ساب الطب ودخل مجال السينما، كيف بدأ وإيش أعماله الجاية.. وحكايات وتجارب وتفضيلات.. كالعادة.. حلقة مليانة وعلى قول واحد من الجمهور " دوبو من أسباب الدوبامين"!
وأخيراااااااا سارة خلصت تصوير ورجعت لدوبو 🦎حلقة من حقون زمان - اللي من شهر 😂 - رجعنا للتنمر على إخراج هشام وتحضيره للحلقة، الكرنجات اللي ما تضحكها، والأهم هو مواضيع الحلقة اللي طولت أكتر من الوقت من غير طفش: من الأخبار الفنية، كواليس فيلم سارة الجديدة وشغلها مع يعقوب الفرحان، إلين أفلام سكورسيزي، وبارني، وإدريس إلبا، وأكتر مسلسلات رمضان اللي متحمسين نشوفها بعد كم يوم.. من جد حلقة ما تتفوت!
