Hân--leh是啥碗糕？ 「油門含一下」kám bat聽人án-ne te講？ 做夥來聽看hân是啥貨！知影ê朋友罔餾，bē曉ê有志加減來hâm伊熟似--1-下，勞力，多謝！ 訂閱做工á人Youtube頻道：https://www.youtube.com/@chokangalang 完整ê英文／漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： 各位線頂ê聽眾朋友，ta̍k-ê平安，ta̍k-ê好！歡迎收聽做工á人phá-kheh-su̍h-to͘h。Iû-koh到咱紹介語詞ê時間--a，請ta̍k-ê做夥來聽看māi。 今á日出門，騎o͘-tó͘-bái beh去郵局寄物件ê路--ni̍h，遠遠to̍h看tio̍h青燈變紅燈，我nā無leh趕時間，騎車是lóng慢慢á leh sô，hit時，我to̍h kā擋á輕輕á hân--leh，hō͘ o͘-tó͘-bái ta̍uh-ta̍uh-á溜到紅燈腳chiah停--leh。 我nā leh等紅燈ê時，chiok gâu想東想西烏白想，chit páiⁿ去想tio̍h講，chit ê hân--leh goán chŏ͘-kiáⁿ in kám會曉講，kám知是啥意思？窮實我nā leh寫小詞典ê稿，beh揀字詞真chē lóng是以goán kiáⁿ in teh做標準，in nā bē曉，我to̍h真有可能抾起來hâm各位朋友分享。 Chit ê hân--leh，to̍h是輕輕á kā物件固定ho͘ tiâu，hō͘伊會當暫時維持--leh，chit款方式，咱to̍h叫做hân--leh。像臺日大辭典ê例句to̍h是，「Hân--teh to̍h好，m̄-thang pa̍k siuⁿ ân。」To̍h是leh講pa̍k ho͘ lēng-lēng--ā to̍h好。 Koh有幾nā種情形mā ē-tàng講hân--leh，像咱頭起先講ê「擋á hân--leh」to̍h是1 ê例，hân--leh to̍h是mài kā擋á tēⁿ到底，是1種小-khóa-á tēⁿ--leh niâ ê感覺，koh親像老車歹發，to̍h是ài kā油門先chhui--小khóa-á hân--leh，to̍h ē khah好發。門mā ē-tàng hân--leh，to̍h是講咱無kā門關kah ân-ân，關kah門kho̍k--1-ē，門鎖koh khia̍k--1-ē án-ne，to̍h是kā門關kah kán-ná有關ê程度to̍h好，koh有留1 phāng--leh，親像咱nā出門the̍h 1-ē-á物件，to̍h sûi koh beh --入-來，門一般to̍h是hân--leh niâ。 鎖螺絲mā ē-tàng hân--leh，to̍h是講咱teh鎖ê時，nā有幾nā ê螺絲khang ài鎖，咱一般ē ta̍k枝lóng先鎖--1-寡，無chhui到底，等kah咱確認講án-ne ka鎖--lòe無問題，bē去ho͘鎖kah歪--去，咱chiah ta̍k支lóng ka鎖kah底，頭前hit ê先鎖--1-寡-á ê動作，mā是講hân--leh。 Chit ê hân，tī台語內底真tiāⁿ用--tio̍h，1 ê簡單ê字to̍h ē-tàng kā複雜精密ê意思表達--出-來，che表示chit ê語言，有經歷過長時間ê文化粒積kah演變，是1款真成熟，內涵深koh厚ê語言。Só͘-pái nā台語講慣勢ê人，有時á ē直接kā「hân」鬥入去華語講，凡勢各位ûn-ná mā bat聽人講過『油門含一下』，我the̍h chit幾字去ka kú-ko͘h，koh有chhiau tio̍h笑詼thang看，che ûn-ná算是台語去影響tio̍h華語ê 1 ê例--lah，nā有趣味ê聽眾朋友mā ē-tàng ka-tī去chhiau-chhōe看māi--leh。 台語，to̍h是chiah-nī-á好ê寶貝，咱tio̍h m̄-thang ka放ho͘無--去。 Án-ne，咱今á日ê A郎小詞典to̍h紹介到chia，請各位聽眾朋友繼續kā goán支持kah鼓勵，有閒koh來ŏ͘！ POJ Choân-bûn: Kok-ūi sòaⁿ-téng ê thiaⁿ-chiòng pêng-iú, ta̍k-ê pêng-an, ta̍k-ê hó! Hoan-gêng siu-thiaⁿ Chò-kang-á-lâng phá-kheh-su̍h-to̍͘h. Iû koh kàu lán siāu-kài gí-sû ê sî-kan--a, chhiáⁿ ta̍k-ê chò-hóe lâi thiaⁿ khòaⁿ-māi. Kin-á-ji̍t chhut-mn̂g, khiâ o͘-tó͘-bái beh khì iû-kio̍k kià mi̍h-kiāⁿ ê lō͘--ni̍h, hn̄g-hn̄g to̍h khòaⁿ tio̍h chhiⁿ-teng piàn âng-teng, góa nā bô leh kóaⁿ sî-kan, khiâ-chhia sī lóng bān-bān-á leh sô, hit sî, góa to̍h kā tòng-á khin-khin-á hân--leh, hō͘ o͘-tó͘-bái ta̍uh-ta̍uh-á liu kàu âng-teng kha chiah thêng--leh. Góa nā leh tán âng-teng ê sî, chiok gâu siūⁿ-tang-siūⁿ-sai o͘-pe̍h siūⁿ, chit páiⁿ khì siūⁿ tio̍h kóng, chit ê hân--leh goán chŏ͘-kiáⁿ in kám ē-hiáu kóng, kám chai sī siáⁿ ì-sù? Khêng-si̍t góa nā leh siá sió-sû-tián ê kó, beh kéng jī-sû chin chē lóng sī í goán kiáⁿ in teh chò piau-chún, in nā bē-hiáu, góa to̍h chin ū khó-lêng khioh khí-lâi hâm kok-ūi pêng-iú hun-hióng. Chit ê hân--leh, to̍h sī khin-khin-á kā mi̍h-kiāⁿ kò͘-tēng ho͘ tiâu, hō͘ i ē-tàng chiām-sî ûi-chhî--leh, chit khoán hong-sek, lán to̍h kiò-chò hân--leh. Chhiūⁿ Tâi-ji̍t Tōa-sû-tián ê lē-kù to̍h sī, “Hân--teh to̍h hó, m̄-thang pa̍k siuⁿ ân.” To̍h sī leh kóng pa̍k ho͘ lēng-lēng--ā to̍h hó. Koh ū kúi-nā chióng chêng-hêng mā ē-tàng kóng hân--leh, chhiūⁿ lán thâu-khí-seng kóng ê “Tòng-á hân--leh” to̍h sī 1 ê lē, hân--leh to̍h sī mài kā tòng-á tēⁿ kàu té, sī 1 chióng sió-khóa-á tēⁿ--leh niâ ê kám-kak, koh chhin-chhiūⁿ lāu chhia pháiⁿ hoat, to̍h sī ài kā iû-mn̂g seng chhui--sió-khóa-á hân--leh，to̍h ē khah hó hoat. Mn̂g mā ē-tàng hân--leh, to̍h sī kóng lán bô kā mn̂g koaiⁿ kah ân-ân, koaiⁿ kah mn̂g kho̍k--1-ē, mn̂g-só koh khia̍k--1-ē án-ne, to̍h sī kā mn̂g koaiⁿ kah kán-ná ū koaiⁿ ê têng-tō͘ to̍h hó, koh ū lâu 1 phāng--leh, chhin-chhiūⁿ lán nā chhut-mn̂g the̍h 1-ē-á mi̍h-kiāⁿ, to̍h sûi koh beh --ji̍p-lâi, mn̂g it-poaⁿ to̍h sī hân--leh niâ. Só lô͘-si mā ē-tàng hân--leh, to̍h sī kóng lán teh só ê sî, nā ū kúi-nā ê lô͘-si khang ài só, lán it-poaⁿ ē ta̍k ki lóng seng só--1-kóa, bô chhui kàu té, tán kah lán khak-jīn kóng án-ne ka só--lòe bô būn-tê, bē khì ho͘ só kah oai--khì, lán chiah ta̍k ki lóng ka só kah té, thâu-chêng hit ê seng só--1-kóa-á ê tōng-chok, mā sī kóng hân--leh. Chit ê hân, tī Tâi-gí lāi-té chin tiāⁿ iōng--tio̍h, 1 ê kán-tan ê jī to̍h ē-tàng kā hok-cha̍p cheng-bi̍t ê ì-sù piáu-ta̍t--chhut-lâi, che piáu-sī chit ê gí-giân, ū keng-le̍k kòe tn̂g sî-kan ê bûn-hòa lia̍p-chek kah ián-piàn, sī 1 khoán chin sêng-se̍k, lōe-hâm chhim koh kāu ê gí-giân. Só͘-pái nā Tâi-gí kóng koàn-sì ê lâng, ū-sî-á ē ti̍t-chiap kā “hân” tàu ji̍p-khì Hôa-gí kóng, hoān-sè kok-ūi ûn-ná mā bat thiaⁿ lâng kóng kòe『油門含一下』, góa the̍h chit kúi jī khì ka kú-ko͘h, koh ū chhiau tio̍h chhiò-khoe thang khòaⁿ, che ûn-ná sǹg sī Tâi-gí khì éng-hióng tio̍h Hôa-gí ê 1 ê lē--lah, nā ū chhù-bī ê thiaⁿ-chiòng-pêng-iú mā ē-tàng ka-tī khì chhiau-chhōe khòaⁿ-māi--leh. Tâi-gí, to̍h sī chiah-nī-á hó ê pó-pòe, lán tio̍h m̄-thang ka pàng ho͘ bô--khì. Án-ne, lán kin-á-ji̍t ê A-lông Sió-sû-tián to̍h siāu-kài kàu chia, chhiáⁿ kok-ūi thiaⁿ-chiòng pêng-iú kè-sio̍k kā goán chi-chhî kah kó͘-lē, ū-êng koh lâi ŏ͘! 文稿／主持╱校對︱蔡逸民 BuLuhSuh 配樂︱陳曉怡 Niau-tāu 人聲編輯︱柯王炳勳 Bí-leng 字幕︱林于真 A-chin 圖︱AI製圖 影片︱陳姿樺 Ko͘-chiáu -- Hosting provided by SoundOn