唔知有幾多人覺得自己係介乎正常同抑鬱之間？我覺得香港應該係幾多嘅，而我應該係其中一個。有時候都幾矛盾，兩種性格同情緒可以同時存在：正面同負面、外向同內向、自信同自卑，有時都唔知邊一面係真正嘅自己。呢排睇得多名家作品同心理書，會令自己覺得「應該好似佢地咁」、「我都可以做到」嘅感覺，但時間證明現實嘅殘酷，將幻想慢慢破壞。本來想睇下本書幫唔幫到朋友，但睇嘅途中發現，可能自己先需要睇，因為佢將我從正能量嘅夢境，拉返入真實嘅日常。 作者係一個有輕微抑鬱症嘅女仔，而書嘅內容就係佢接受12個禮拜心理治療嘅經歷，主要係佢同醫生嘅對話。入面冇詳細描述治療過程，冇激勵人心嘅勵志道理，冇積極走出人生低谷嘅康復故事。作者嘅心理狀況反反復復，甚至到故事完結時仲係唔穩定，但咁樣反而顯得出故事嘅真實：要改善情緒問題，絕對唔係一朝一夕、簡簡單單就可以完成嘅事情。作者面對情緒時跌跌撞撞嘅經歷，為我加添左一層親切感。 喺同醫生嘅對話入面，作者詳細描述生活上大大小小嘅事，從家庭、交友、工作、感情上嘅都有，並嘗試表達箇中嘅感受。喜、怒、哀、樂，種種情感，佢都嘗試用言語去表達，時而比喻、時而描寫，雖然作者未必表達得好清楚，思路同情緒有時會混亂，但好欣賞佢努力講出來嘅勇氣，而上一本書都有提到，將感受寫出來亦不失為一個抒解情緒嘅方法，亦可以趁機會整理自己嘅思緒。我都係去到近期開始寫文，先感受到佢嘅神奇效果。 作者發現自己嘅情緒問題，主要係源於自卑感。因為要迎合他人同社會，導致心理上經常處於矛盾同掙扎。自卑嘅原因有好多，無論係由於自細家庭環境嘅影響，同事之間嘅比較，或者韓國社會對女性嘅刻版印象，都會令佢為自己設下一個理想嘅形象，偽裝成佢認為大家會中意嘅性格。當佢認為自己做唔到佢理想嘅形象，或者得唔到認同，佢就會好自卑；但即使其他人欣賞佢、親近佢，佢亦會因為覺得自己並唔係佢地想像中咁好，認為自己冇資格被愛，而感到羞愧同有壓力。呢種對自己過於苛求，長期唔可以做自己嘅煎熬，導致佢情緒容易受影響，反復嘅心情令佢非常痛苦。 我之所以對佢嘅遭遇有所共鳴，係因為包括我在內，城市人嘅生活長期處於他人嘅目光之下，令人不經意地迎合家庭、職場、社會放喺你身上嘅形象同價值觀。唔係個個人性格都係樂觀同外向，踏入社會係一個漫長嘅學習過程，跌跌撞撞總會發生，亦會有疲累同挫敗嘅時候。有時人為左適應社會，會刻意迴避自己性格嘅某一面（無論係好嘅定係壞嘅），戴上假面具做人，呢種表面同內心嘅矛盾同落差往往就係令人感到辛苦嘅地方。作者將自己嘅感受赤裸裸咁表達出來，令我感到格外真實，雖然我並冇喺書中領略到咩大道理，身處嘅環境亦有啲唔同，但作者成功地透過文字同我呢個讀者嘅感受連結埋一齊了。 故事到最後，作者仍然面對緊自己嘅情緒問題，就同好多受到情緒問題困擾嘅香港人一樣，喺高壓嘅環境下努力生存緊。或者我地都應該好似作者咁樣，好好咁擁抱自己嘅情緒，因為即使係負面嘅情緒都好，都係自我嘅一部份。