話說，喺大約一百三十五億年前，宇宙發生咗一場大霹靂（Big Bang），物質、能量、時間同空間就咁出現。呢啲宇宙嘅基本規律同特徵，就係「物理學」嘅研究範圍。
過咗大約三十萬年，物質同能量開始結合，形成更複雜嘅結構，變成原子，再由原子組成分子。關於原子同分子嘅交互作用嘅故事，就係「化學」嘅世界。
大約三十八億年前，喺地球呢粒行星上，有啲分子連繫起來，形成一種好複雜又精細嘅結構，叫做生物。生物嘅故事，就係「生物學」嘅內容。
但係，「物理學」、「化學」、「生物學」嘅一直都無被任何存在發現，直到到咗大約七萬年前，有啲屬於智人（Homo sapiens）呢個物種嘅生物開始創造更複雜嘅架構，叫做文化。文化累積，就構成各種各樣嘅學科，得以認識呢個世界（包括以上所講嘅「物理學」、「化學」、「生物學」）。而認識人類文化嘅代代發展，就係「歷史學」嘅基礎。
《人類大歷史》嘅作者哈拉瑞認為，人類歷史有三大重要轉捩點：
首先，七萬年前嘅「認知革命」，令人類有咗語言同想像力，歷史正式開始。
跟住，一萬二千年前嘅「農業革命」，人類開始種植同養殖，歷史嘅步伐加快咗發展。
到咗五百年前，「科學革命」出現，改變咗人類嘅思維同生活方式，歷史進入全新階段。
呢本書想要講述嘅，就係呢三大革命點樣影響人類同其他生物嘅命運。
而喺開始嘅時候，我哋首先要過一過界，離開一下歷史嘅範圍，先講一講「生物學」嘅內容，咁就能夠更加了解到「認知革命」對人類有啲乜嘢影響。今集內容包括：
古人與動物：兩百五十萬年前，已經有一班同現代人好似樣嘅「遠古人類」出現，但佢哋同動物嘅差異，比你想像中近好多。
生物分類：我哋先認識下生物分類，咁你就會明白一個屬之下得一個人種係一件幾奇怪嘅事
智人黑歷史：地球上曾經有其他人種，對智人而言係一個可能嘅黑歷史……
思考之代價：為咗思考，人類付出咗幾大代價？