حقيقة وحدة اللي كاينة ..

هي أنه كاين اله واحد..

أرقى من كل هاد الموجودات..

ما مركبش على الهيئة ديالنا..

وما تيفكرش فحالنا..

ومستحيل لينا نوصلو لادراك هاد الاله الواحد بالعقل اللي عندنا..

هاد الاله عندو الكمال فالسمع والبصر وفالفكر ومتواجد فأي مكان وفأي زمان..

الفلاسفة اليونان القدامى.. عندهم الادراك التام باللي ماشي  هاد الآلهة .. اللي عندهم كل صفات البشر.. هوما اللي تيخلقوا ويصنعوا الموجودات.. بل كاين شي قوة أخرى هي مصدر العالم.. والموجودات.. والعقول ديالهم على اختلاف طريقة تفكيرها.. ما عمرها تيقات ولا صدقات باللي هاد العالم وهاد الموجودات من صنع آلهة سكيرة.. محتالة.. كذابة.. غارقة فالملذات والشهوات..

وداكشي علاش ومن غير ما يحسوا.. بداو رحلة البحث عن الآله الحق.. الذي ليس كمثله شيء..

رحلة البحث عن الله  "مقدمة"  • شنو ؟  • شكون؟  • باش ؟  • كيفاش ؟  • فين ؟  • امتى ؟  (ما ؟ من؟ مما ؟ كيف؟ أين ؟ متى ؟)  هاد الأسئلة هي اللي شغلات عقول الفلاسفة..  بل اكثر من ذلك..  شغلات عقل أي واحد فينا.. من نهار بدا الانسان تيفكر..  + + + + + + + + + + + + + +. الفلسفة.. هي فاش تتبغي تعرف حقيقة كل شيء واي شيء، اصلو.. الغاية منو.. مناش مكون.. كيفاش تكون..  الفلسفة.. هي فاش ما تتقتانعش ظاهر الشيء.. لكن تتبغي تعرف باطن الشيء..  الفلسفة.. هي فاش ما كتكتافيش بالعالم المحسوس.. ولكن تتبغي تعرف ما وراء هاد العالم.. شنو كان قبل هاد العالم.. وشكون خلقو.. و مناش خلقو.. وامتى خلقو..  الفلسفة.. هي فاش تبغي تعرف شنو هو هاد الخالق ؟ وشنو هي الذات دبالو ؟ وحقيقة الصفات ديالو ؟ وشنو هو هاد الانسان ؟ شنو هي الحقيقة ديالو ؟ العقل ديالو ؟ كيفاش يمكن لينا نتوصلو لادراك هاد العقل ؟ وشنو نسبة الدقة والصحة فهاد الادراك ؟ و شنو هو الخير ؟ و شنو هو الجمال ؟ وعلاش هاد الخير تسمى خير؟ و علاش هاد الجمال تسمى جمال ؟  هادي شوية من بزاف ديال الأسئلة اللي ما كتقاداش..  و اللي كيصادفها أي واحد، تيبحث عن معرفة المبادئ الأولى للاشياء..  داكشي علاش من بين التعاريف المشهورة تنلقاو :  الفلسفة هي النظر في حقيقة الأشياء،  او الفلسفة هي علم المبادئ الأولى..  او كذلك :  الفلسفة هي محاولة العقل ادراك حقيقة المبادئ الأولى..