في الحلقة دي من بودكاست حواديت قبل النوم، بناخدكم في رحلة فريدة مع الرحالة المقدسي، صاحب كتاب "أحسن التقاسيم في معرفة الأقاليم".من القدس اللي نشأ فيها، مرورًا بـ دمشق والفسطاط وبغداد والبصرة، وصولًا إلى فارس وخوزستان وبلاد ما وراء النهر زي بخارى وسمرقند.المقدسي ما كانش مجرد رحالة… لكنه جغرافي عبقري ابتكر الخرائط الملونة، ووصف الأسواق، العادات، اللهجات، وحتى تفاصيل حياة الناس اليومية.
هنعيش معاه لحظات المعاناة والخطر، ونشوف إزاي كتابه عاش بعده وبقى مرجع أساسي في علم الجغرافيا الإسلامية.
في الحلقة دي من بودكاست حواديت قبل النوم، بنفتح ملف مذبحة الأرمن 1915، واحدة من أبشع الجرائم في القرن العشرين.
من ليلة 24 أبريل واعتقالات إسطنبول، مرورًا بـ مسيرات الموت اللي وصلت لحد دير الزور في الصحراء السورية، لحد الدور اللي لعبه حزب الاتحاد والترقي بقيادة طلعت باشا وأنور باشا وجمال باشا.
هنحكي كمان عن عملية نيمسيس اللي نفذها الأرمن بعد الحرب عشان ينتقموا من المسؤولين، وعن الجدل المستمر لحد النهارده بين الاعتراف الدولي والإنكار التركي.
دي مش مجرد قصة تاريخية… دي إبادة الأرمن، جرح مفتوح بيكشف إزاي السياسة، والإنكار، والصمت الدولي بيشاركوا في صنع المآسي.
في الحلقة دي من بودكاست حواديت قبل النوم، بناخدك في رحلة مشوّقة وسط رمال الصحراء عشان نكشف أسرار المشير الألماني إرفين رومل – ثعلب الصحراء.
هتعرف إزاي بدأ حياته كضابط عادي واتحول لأسطورة عسكرية في الحرب العالمية التانية، وإزاي تكتيكاته الجريئة خلت الحلفاء يهابوه.
هنتكلم عن حصار طبرق، معركة عين الغزالة، والعلمين… ونكشف الوجه الآخر لأسطورة "القائد الشريف": علاقته بهتلر، مواجهته مع مونتغمري، أزماته اللوجستية، والمؤامرة اللي أجبرته ينهي حياته بالسيانيد.
حدوتة رومل مش مجرد قصة حرب… دي قصة عن المجد، الخيانة، والخطيئة اللي غيّرت مسار التاريخ.
في حلقة النهاردة من حواديت قبل النوم، بنفتح صفحة منسية من تاريخ الحجاز وقت الحرب العالمية الأولى.
دي مش بس قصة حرب، دي قصة مجاعة قاسية عاشها أهل مكة والمدينة والطائف بين 1914 و1918.
الحصار، الجوع، أكل أوراق الشجر… وذكريات كبار السن اللي فضلت تحكي عن "السنين السوداء".
بنحكي تفاصيل المجاعة: أسبابها السياسية والاقتصادية، دور الدولة العثمانية، إزاي الناس قاومت، وإزاي الكارثة دي عجّلت بانتهاء النفوذ العثماني في الجزيرة.
الحلقة دي محاولة نرجّع للأذهان مجاعة الحجاز في الحرب العالمية الأولى… المأساة اللي التاريخ الرسمي حاول ينساها، و بيعيدها النهاردة تاني.
في حلقة النهاردة من حواديت قبل النوم، بنغوص في واحدة من أكتر القصص غموضًا وإثارة في القرن العشرين: جمجمة لورنس العرب.
مين كان توماس إدوارد لورنس؟ بطل ولا عميل مزدوج؟
بنمشي معاه من طفولته الغامضة في بريطانيا، لحد دوره في الثورة العربية الكبرى، وعلاقته بالقبائل العربية، والمعارك اللي خاضها ضد العثمانيين، وصولًا إلى النهاية اللي قلبت كل الموازين.
هنتعرف على أسرار مخفية، رسائل شخصية، وخطط سياسية خلت الحلم العربي يتبخر قبل ما يبدأ.
في أولى حلقات الموسم التاني من بودكاست حواديت قبل النوم، بنغوص في رحلة فكرية وروحية بدأت من صحراء مصر في القرن الرابع الميلادي، لما راهب اسمه إيفاغريوس البنطي كتب عن 8 أفكار كان شايف إنهم بيبعدوا الإنسان عن طريق الله.
الأفكار دي اتطورت بعد كده في التاريخ الكنسي وبقت معروفة باسم الخطايا السبع المميتة: الشراهة، الشهوة، الطمع، الغضب، الحسد، الكسل، والكبرياء.
في الحلقة دي، هنعرف:
إزاي بدأت المفاهيم دي؟
ليه اتصنّفوا إنهم "مميتة"؟
وإزاي أثّروا على المسيحية، والأدب، والفن، وحتى حياتنا لحد النهاردة؟
حدوتة بتبدأ في الصحراء… وبتوصل لكل بيت.
التاريخ مش كله في الكتب، في الموسم التاني من حواديت قبل النوم مش بس هنحكي التاريخ و نسكت لكن كمان هنحاول نغوص في فلسفة الحدث.
في حلقة النهاردة من حواديت قبل النوم، بنغوص في واحدة من أكتر الشخصيات غموضًا في تاريخ مصر القديمة: الملكة نفرتيتي، صاحبة الوجه الأشهر في الحضارة الفرعونية، واللي رغم تمثالها اللي اتخلد في متاحف الغرب، لسه لحد النهاردة مش عارفين فين قبرها… ولا حتى نهايتها.
بنحكي مشوارها من لحظة ظهورها جنب إخناتون، وثورتهم الدينية الكبرى، لحد لحظة اختفائها الغامضة، ومحاولات العلماء كشف مقبرتها، وسر التمثال اللي اتاخد من مصر وبقى رمز عالمي.
هل كانت أول فرعون أنثى في السر؟
هل اختفت… ولا اتشطبت من التاريخ؟
وهل ممكن نرجّع اللي التاريخ خبّاه؟
في حلقة النهاردة من حواديت قبل النوم، بنرجع ورا آلاف السنين، لمّا مكتبة الإسكندرية كانت جوهرة الحضارة، وأكبر مشروع علمي وثقافي في تاريخ مصر القديمة. في الحلقة دي، بنحكي تفاصيل حريق مكتبة الإسكندرية، ومن أول ما بطليموس بناها، لحد ما يوليوس قيصر دخل الإسكندرية، وتقاطع مع كليوباترا، وبعدين ظهرت روايات عن الحريق… هل فعلاً قيصر حرّقها؟ ولا المتعصبين الدينيين في العصور المسيحية؟ ولا فعلاً، زي ما بيتقال في بعض كتب التاريخ، كان المسلمين بقيادة عمرو بن العاص وقت الفتح الإسلامي؟ هنفصّل الشبهات، ونعرض الروايات، ونفهم إزاي الكذبة ممكن تعيش أطول من الحقيقة. دي مش بس قصة مكتبة، دي قصة عن التاريخ اللي بيتم تزييفه، والحضارات اللي بتتحرق مش بس بالنار .. لكن بالنسيان.
معركة الإسماعيلية – لما ٨٠ راجل وقفوا في وش إمبراطورية
في 25 يناير 1952، وقف 80 من رجال الشرطة المصرية يدافعوا عن مبنى المحافظة في الإسماعيلية، قدّام جيش بريطاني كامل بالدبابات والمدفعية الثقيلة. ماكنش معاهم غير بنادق بسيطة… و شوية كرامة.
في الحلقة دي من حواديت قبل النوم، بنحكي تفاصيل المعركة اللي خلت المصريين يقرروا يحتفلوا بيوم 25 يناير كـ "عيد الشرطة".
إزاي بدأت الأزمة؟ وليه الإنجليز هجموا؟
وإزاي مصر كلها صحيت تاني يوم… والنار مولعة في قلب القاهرة؟
قصة بطولات منسية… وسؤال لسه مفتوح لحد النهاردة.
في القرن التاسع الميلادي، وفي قلب مدينة قرطبة، ظهر عباس بن فرناس، واحد من أوائل العلماء المسلمين اللي حاولوا كسر المستحيل. مش بس كان شاعر وفيلسوف، لكن كمان كان أول إنسان في التاريخ يقوم بمحاولة علمية مسجلة للطيران باستخدام جناحين من صنع يده. في الحلقة دي من بودكاست "حواديت قبل النوم"، بنغوص في حياة الراجل اللي سبق عصره بمئات السنين، ونتعرف على اختراعاته في الفلك، والهندسة، والميكانيكا، وإزاي تجربته ألهمت تطور علوم الطيران لاحقًا. ليه الغرب خلد اسمه وسماه على فوهة قمرية، وإحنا في كتبنا بنديله سطر ونص؟ استعد لقصة علمية درامية منسية… بس أثّرت في العالم كله.
ذات الصواري – لما البحر اتكلم عربي لأول مرة. في سنة 34 هـ، كان البحر ملك للروم، لكن في يوم واحد، كل شيء اتغير. في الحلقة دي من حواديت قبل النوم، بنحكي قصة أول معركة بحرية في تاريخ الإسلام، لما عبد الله بن أبي السرح خرج بأسطول من مصر، وقابل خمسمائة سفينة بيزنطية في قلب البحر. بنعيش مع الجنود أول لحظة خوف، ونسمع صدى التكبيرات وهي بتتردد فوق الميّة، ونشوف إزاي البحر اتعلم يقول "الله أكبر". من شواطئ الإسكندرية لغاية قلب المتوسط، قصة عن شجاعة وعبقرية وتحول في وجه التاريخ.
في عهد هارون الرشيد، اتكتب عهد بـ نوايا طيبة… لكن بعد وفاته، اتحوّل الوعد إلى نار، والخلافة العباسية دخلت في أشرس حرب أهلية في تاريخها. في الحلقة دي من "حواديت قبل النوم"، بنحكي قصة الأمين والمأمون، ولاد هارون الرشيد، اللي بدل ما يكمّلوا مسيرته، لقوا نفسهم في ساحة حرب: حصار، خيانة، دم، وتاريخ اتكتب بسيوف الأخوات. من وصية هارون اللي بدأت المصيبة، لسقوط الأمين وراسه على باب بغداد، لقرار المأمون الصادم بتعيين "الرضا من آل محمد" وليًا للعهد، للسم اللي قلب التاريخ، ولحد موت خليفة بعيد عن بلده… وغريب عن شعبه.
من طفل أقسم قدام أبوه إنه يكره روما، لقائد مشى بجنوده وسط التلج، وعدّى جبال الألب ومعاه أفيال، لعبقري عسكري غيّر شكل الحرب، وخلّى روما ترتجف كل ما اسمه يُذكر.
في الحلقة دي من حواديت قبل النوم، بنحكي القصة الكاملة لـ هانيبال برقا:
من بداية الغِلّ في قرطاج، لحد القرار الجنوني باجتياح روما، لمعركة "كاناي" اللي غيّرت التاريخ، للنهاية اللي اختار فيها السم… بدل الاستسلام.
من طفل عنده ربو وبيقرأ نيتشه في سن ٨ سنين،
لدكتور بيسافر بموتوسيكل يشوف وجع الناس،
لقائد بيحارب وبيعالج في نفس اللحظة،
لرمز عالمي… مات في حظيرة، وفضلت صورته في الشوارع.
في الحلقة دي من حواديت قبل النوم،
بنمشي ورا كل خطوة في حياة تشي جيفارا،
من الأرجنتين، لكوبا، للكونغو، لبوليفيا…
لحد اللحظة اللي بص فيها في عين الجندي، وقال له:
"اضرب… إنت هتقتل راجل."
دي مش بس قصة ثائر، دي قصة راجل فضل يدوّر على العدل… لحد ما مات.
في قرية هادية اسمها دنشواي، حصلت واقعة غيّرت تاريخ مصر كله.
حادثة بسيطة ظاهرها "صيد حمام"، لكن باطنها كان ظلم واستفزاز واحتلال فاكر إن البلد دي مش هترد.
في الحلقة دي من حواديت قبل النوم، هتسمع القصة الكاملة لحادثة دنشواي:
من أول لحظة طار فيها الحمام، لحد آخر نفس طلع من فوق مشنقة في الغيط.
هتعرف إزاي الناس واجهت، وإزاي غضب الشعب اتحول لحركة وطنية، وإزاي مصطفى كامل كتب جملة قلبت الرأي العام كله.
دي مش بس حكاية دم وظلم… دي حكاية بلد رفضت تبلع الإهانة، وقررت تغضب.
في قلب جبال الأنديز، كانت فيه إمبراطورية عظيمة، غنية، وغامضة… اسمها "الإنكا".
لكن السؤال اللي محيّر العالم لحد النهاردة:
فين راح كنزهم الدهبي؟ وليه ماحدش قدر يلاقيه رغم مرور قرون؟
في الحلقة دي من حواديت قبل النوم، هنحكي الحكاية من أولها:
من لحظة صعود إمبراطورية الإنكا، لحد لحظة سقوطها على إيد الغزاة الإسبان، وهروب الكنز الأسطوري اللي الناس لسه بتدور عليه في الجبال والغابات.
حكاية فيها ملوك، وخيانة، وحرب، وأسطورة ضايعة…
حكاية هتحس معاها إنك عايش جوّا حضارة اندثرت، بس لسه أسرارها بتهمس في ودان التاريخ!
كان رجلًا يخشاه الجميع، حكم العراق بقبضة من حديد، وسيف لا يرحم. الحجاج بن يوسف الثقفي، القائد الأموي الذي أثار الرعب في قلوب أعدائه، وسالت في عصره أنهار من الدماء. كيف وصل إلى هذه القوة؟ وكيف كانت نهايته؟ ولماذا ظل اسمه محفورًا في كتب التاريخ بين الطغاة والمصلحين؟
في هذه الحلقة من حواديت قبل النوم، بنحكي عن صعود وسقوط الحجاج، ونعيد إحياء واحدة من أكثر الفترات دموية في التاريخ الإسلامي.
إزاي المسلمين، اللي كانوا أمة واحدة، اتحولوا لطرفين متقاتلين؟ وليه سيوف الصحابة اتوجهت لبعض في أخطر فتنة حصلت في تاريخ الإسلام؟ في الحلقة دي من حواديت قبل النوم، بنرجع لزمن الفتنة الكبرى، من مقتل عثمان بن عفان، لخلافة علي بن أبي طالب، لمعركة الجمل وصفين، ورفع المصاحف، لحد التحكيم اللي قلب الموازين! إزاي بدأت الأزمة؟ وليه انتهت باغتيال علي وبداية الدولة الأموية؟ حلقة مليانة أحداث حقيقية وتفاصيل دقيقة عن أخطر صراع في التاريخ الإسلامي!
في واحدة من أعقد الأزمات الفكرية في تاريخ الإسلام، وقعت محنة خلق القرآن، صراع ضخم بين المعتزلة وخلفاء الدولة العباسية من ناحية، والإمام أحمد بن حنبل من ناحية تانية. ليه الخلفاء تبنّوا فكر المعتزلة؟ وإزاي أحمد بن حنبل واجه التعذيب والصمود رغم كل المحن؟ وليه القضية دي كانت نقطة تحول ضخمة في الفكر الإسلامي؟ ده اللي هنعرفه في حلقة النهاردة من حواديت قبل النوم
