So richtig im Schiff gstande isch vorallem GC: D Hoppers tauched in St. Galle und verlüred völlig verdient mit 0:5. Vome Usrutscher chamer bim FCZ nüme rede: Trotz Trainer-Kick verlürt am Raphi sis Team mit 2:3 gege YB. Und de FCW spielt unter Neo-Trainer Rahmen guete Fuessball, wird aber ide Nachspielziit chalt duscht: De Diaby trifft is eigene Goal, trotzdem gihts en wichtige Punkt für Winti.
De Decarli nach 12 Minute, de Raphi nach 90 und de FC Winti scho die ganz Saison... Ide hütige Folg lueged de Raphi und de Tim uf e mässig erfolgrichs Wucheend vode Zürcher Clubs zrugg. De FCZ cha nachdem Derby kei Reaktion zeige und verlürt im Tessin, au GC bringt i Unterzahl keis Goal stand und unterliit Sion mit 0:1 und de FCW cha froh si, isches in Basel bim 0:3 blibe.
GC setzt im Zürcher Derby es Statement: Grad mit 3:0 schlönds de FCZ mitere fantastische Leistig, was natürlich en euphorisierte Tim und en konsternierte Raphi im Pöde bedüütet. En Tag später verlüürt am David sin FCW nach 2-Tore-Vorsprung no mit 2:4 gege de FC Lugano – de David gseht rot!
De FCZ verlüürt und Winti & GC günned? Nur im Cup! Nach de 7. Rundi ide Super League isch sozäge wieder alles bim alte: Winti chunt in Genf vo Servette drunder und de David isch bereits versuecht, s Abstiegsbarometer es ersts Mal fürezne. Au wenn nöd ganz so ghyped wie de Trainer Scheiblehner findet de Tim gueti Wort für sis GC trotz Niederlag im Tessin. Und de Raphi derf nachem gruusige Cup Out en wichtige Sieg geg de Leader us St. Galle fiire.
Die zweiti Cup Rundi isch gspillt und nur no 2 vo 3 sind debi. De FCZ holzt in Nyon vom Penaltypunkt und muess sich nach de bittere Niederlag auch no de Provkatione vom Heimteam stelle. Provoziert worde isch au in Schaffhuuse, mitem bessere Endi für Winti. Trotz em 4:0 Sieg isch de David nöd ganz happy mit em Uftritt. Und GC nimmt sich s Cup Motto sehr zu herze: Hauptsach wiitercho! Imene Grottekick schlönds Bellinzona mit 1:0.
En dopplete Tsawa, en gnüsslete Plange und de Opa Buess: Ide 6. Rundi isch einiges gloffe. De Scheiblehner holt sin erste Meisterschaftssieg als GC Trainer – und de Zvonarek isch nöd ide Startelf? De FCZ holt sich imene wilde Spiel dank Pfoste- und Latteglück en Sieg gege Servette – isch ez de Tsawa genau so es Tripple-A Talent wo de Milos immer verzellt? Und bi Winti isch de Uli nach VAR-Pech und eme 2:3 geg Sion wider hässig uf d Schiedsrichter – und mier fräged eus: Cha de Momoh de ersehnti Gomis-Ersatz werde?
Di Giusto weg. Gomis weg. Geld da? D Sorgefalte vom David sind gross, nachdem ez au no de Gomis zu Schalke isch. Wird wiiter gspart oder reinvestiert? Und wer isch eigentlich schlechter: Winti oder GC?
Unter Abweseheit vom Raphi lueged de David und de Tim zuedem uf d Niederlag vo Winti im Kantonsderby gege de FCZ und s gross akündete 1:1 vo GC in Thun.
8:57 FCW vs FCZ
28:39 FC Thun vs Grasshoppers
Während ide Stadt Züri vill Seich verzellt wird, stellt mer sich in Winti d Frag, wie das cha guet cho. Und das obwohl de FCW im Kantonsderby gege GC i letzter Sekunde no s 2:2 erzielt und sich en Punkt schnappt.
Au bi GC chamer nach dem Unendschiede nöd zfride si, für das isch d Leistig zguet gsi und usegluegt het zwenig. Usegluegt het bim FCZ no vill weniger: Frust, Fragezeiche und Vorderige sind d Stichwörter nachem 0:4 Debakel gege de Ufstiger Thun.
6:50 THUN??
10:43 FC Zürich - FC Thun
19:01 GCZ - FC Winterthur
Die ersti Rundi im Schwiizer «Cöp» isch gspillt: Winti cha in Schaffhuuse Selbstvertraue tanke und schlaht de SVS mit 5:0. Weniger überzügend sind de FCZ und GC: Je en 2:0 Sieg staht am Schluss zu Buche, trotzdem sind de Raphi und de Tim ganz und gar nöd zfride mit de Leistig. Zuedem luegemer i dere Episode no churz uf d Cup-Sensatione in Cham und Breitenrain.
6:10 Cöp allerlei
12:12 FC Wettswil-Bonstetten – FCZ
20:32 SV Schaffhausen – FC Winterthur
30:54 LAFC (Lachen-Altendorf) – GCZ
Grimasse-Hammel, Comeback-Steven und Katastrophe-Arnold: Es giht nach de 3. Rundi ide Super League einiges zbespreche. En mässig guet gluunte David trifft uf en immerno skeptische Raphi und de Tim het wie immer mässig Hoffnig und vill Akzeptanz.
7:27 St.Gallen - FC Winterthur
27:50 Servette - Grasshoppers
42:48 Lausanne - FC Zürich
Die erste Pünkt sind im Kanton Züri acho! Ide zweite Rundi vode neue Saison erkämpft sich Winti dihei en Punkt gege YB und au de FCZ chan sis Konto dank eme 1:1 in Luzern eröffne. Wiiterhin ohni Pünkt staht GC da, e erwartbari Niederlag bim Meister Basel rüehrt d Hoppers richtig Tabellenedi.
Zuedem i dere Folg: Neui Transfers, ersti Fazit zum Saisonstart und (sehr) vill Ungwüssheit.
9:40 FC Winterthur - YB
20:38 FC Basel - Grasshoppers
39:36 FC Luzern - FC Zürich
Neui Saison, neus Glück? Eher weniger. Alli drü Zürcher Clubs müend zum Saisonstart e 2:3 Niederlag istecke und das trotz Füehrig. De FCZ muess sich im Eröffnigsspiel geg Sion nacheme Brecher-Ussetzer gschlage ge, GC verlüürt trotz gueter erster Halbziit geg Luzern und Winti het 24/25-Flashbacks dank eme spate Siegtreffer vo Lausanne. Also alles bim Alte.
5:49 FC Zürich
27:07 Grasshoppers
38:50 Winti
Es isch Super League Wuche! Währenddem de David sini verdiente Ferie gnüsst, bespreched de Raphi und de Tim die aktuellne Geschehniss vode letzte Wuche. Transfers, Testspiel und s Out vom Schänder stönd ufem Traktandum.
D Summerpause neigt sich scho langsam am Endi zue: Guet zwei Wuche vor Saisonstart bespreched de Raphi, David und Tim was ide letzte Wuche bi ihrne Verein so alles passiert isch. Mer reded über Transfers, Testspiel, neui Trainer und hässlichi Liibli. Super League isch zrugg!
Nachem GC-Sieg gege Aarau ide Barrage isch klar: Die drüü Zürcher Verein hend überlebt und spilled au nechst Jahr erstklassig! Idere Episode luegemer uf d Saison und d Barrage zrugg, bespreched euses ZH All Star Team und mached bereits en erste chline Usblick uf die neui Spielziit.
Danke a alli wo eus i eusere erste Saison begleitet hend – und uf e neui, hoffentlich erfolgricheri Saison für eusi Zürcher Clubs!
Nach de 38. und letzte Rundi isch eis schomal klar: Winti blibt dobe! Dank eme 2:0 Sieg gege Sion derfed sich die Rotwiise uf de Schützi fiire lah und dreihed e Ehrerundi unter tosendem Applaus. (No) kei Ehrerundi sondern e Extrarundi het GC vor sich: Au sie günned s letzte Spiel geg St. Galle mit 2:0 und sichered sich so de Barrage-Platz und s Duell gege Aarau. De FCZ hets de beide Zürcher Konkurrente fast no vermiest, verlüreds doch in Yverdon mit 2:3. Für d Waadtländer bringt alles nüt: Yverdon isch dune. TGW gaht id Extrarundi.
Alles parat fürs grosse Finale: Nachere bittere 1:4 Niederlag geg de FCZ trotz gueter Leistig het sich Winti nöd unterkriege lah. Geg de direkti Konkurrent us Yverdon schaffts Rotwiis i letzter Sekunde no zumene ganz wichtige 2:2. Au GC het geg Yverdon unter de Wuche wichtigi Pünkt gholt und het d Neueburger grad mit 5:0 heigschickt. In Sion denn wieder s gwohnte Bild: 1:2 geg d Walliser. Somit isch alles agrichtet fürs grosse Finale: Die drü Abstiegskonkurrente trennet grad emal 1 Punkt.
De FCZ wo wiiterhin wenig z günne oder z verlüre het sorgt defür eimal meh für Spektaktel: Bide Penalty-Party in St. Galle münd sich d Zürcher am Schluss aber mit 2:3 gschlage ge.
Timestamps:
07:06 – FC Zürich vs FC Winterthur
19:18 – Grasshopper Club Zürich vs Yverdon Sport FC
27:31 – FC Winterthur vs Yverdon Sport FC
44:21 – FC Sion vs Grasshopper Club Zürich
58:18 – FC St. Gallen vs FC Zürich
Was St. Galle für Winti isch, isch GC für de FCZ im Derby: Trotz vill Kritik, Unrueh und em Rutsch unter de Strich, isch de Derbysieg für de FCZ ein Leichtes: Grad mit 3:0 chunt GC drunder – da hilft au de neui Heilsbringer Alain Sutter nüüt. Winti reist mit drüü Sieg und ganz vill Selbstvertraue zu ihrem Lieblingsgegner uf St. Galle. Da bringt selbst en früeh Rückstand niemert in Rot-Wiis us de Rueh und d Eulachstädter holed sich am Schluss en wichtige und düütliche 4:1 Sieg.
12:52 FCZ - GCZ
44:43 FCSG - Winterthur
Vor wenige Wuche isch de FCW praktisch scho abgstige. Nacheme wiitere kapitale Sieg gege de Direktkonkurrent GC cha de David jetzt aber zurecht sege "Ich ha immer dra glaubt!". I dere Episode fiirt er d Uferstehig vo Winti, de Tim hebt sich mit de Verpflichtig vom Alain Sutter am nächste Strohhalm fest und de Raphi cha Malenovic und co langsam nüme ghöre – sin FCZ verlürt au in Sion mit 2:1, debi lauft doch alles genau nach Plan?
9:16 FC Winterthur vs. GCZ
48:12 FC Sion vs. FCZ
Es Osterwucheend voller Drama: Im Keller-Kracher schaffts de Burkart em Hammel es Ei im Goal zverstecke und sicheret em FCW so es frohs Fest uf de Heifahrt. Nöd vode Schoggi-Siite bi GC zeigt sich de Neo-Captain Morandi wo zerst en Penalty verschüsst und sich denn no mit de Fans aleiht – alles offe im Abstiegskampf. Zude Loser-Gruppe gsellt sich im letzte Moment au no de FCZ: Nach de 5:0-Demüetigung bim FCL staht YB am Ostermentig wieder uf, besiegt d Zürcher mit 2:1 und schickt Moniz und co id Relegationsgruppe. Aber hey: + 2 Derbies für eus!
9:02 FC Winterthur vs. Grasshopper Club Zürich
53:52 BSC Young Boys vs. FC Zürich
