聲帶： 世尊偈 (観世音菩薩普門品偈) (cho ver.) 及 Heart sutra (cho ver.) - 薬師寺寛邦

特別日子，不是其他，是本podcast一周年。應該係。

-

大家有無聽過「馬格利特」(René François Ghislain Magritte)呢個畫家？大家未必答到我，咁我就形容一下佢其中一幅作品，睇下大家有無印象：呢幅畫嘅上半部分係一片灰藍色嘅天空，下半部分係一排打橫排列嘅洋房。嚟到呢度，都仍然係一幅好普通嘅畫。但馬格利特所畫嘅畫都有住強烈嘅風格 - 就係脫離現實物理法則。所以喺呢一幅畫入面都有住非現實嘅事件發生緊。畫入面唔同嘅位置都有住飄浮喺半空嘅人類停留喺畫作上面。感覺上就好似天空落緊雨咁，只係落嘅唔係雨水，而係人類。呢一幅畫就係由 馬格利特所畫嘅〈戈爾康達〉(Golconde) (封面圖左二)。呢幅畫就係俾 西西 引用左喺《浮城誌異》入邊嘅第三章-<驟雨>入邊。
《浮城誌異》由 西西 喺1986年創作，直到今時今日，亦經常被人研讀，其中一個原因，當然係因為文章嘅寓意，文章寫嘅浮城所代表嘅香港，入面對人同事嘅洞悉以及預言，到今日睇呢一篇37年前嘅文章都唔會過時。另一個原因就係喺學術層面上，《浮城誌異》13個篇章分別對應 馬格利特嘅13幅畫。原本13幅畫各自獨立，經西西重新編排，串連，好似電影蒙太奇咁樣剪接，每幅畫配合一個篇章嘅文字，以少見嘅「圖文互涉」呈現出一個個超現實同時對照眼前事實嘅思考空間。或者文章中如此超現實又如此貼近現實，可能就係因為我哋嘅時空就係如此嘅荒謬。
接落嚟我會抽其中幾個篇章出嚟，同大家講吓呢一個奇異嘅飄浮喺半空中嘅 浮城。
《浮城誌異》嘅第一個篇章就叫 浮城。對照嘅係<The Castle in the Pyrenees> (封面圖左一)呢幅畫 ，講述好多好多年前 浮城就好似一個氫氣球咁飄浮喺半空之中，唔上升唔下降，有風吹過就只係微微搖晃，然後就郁都唔郁。或者只有祖父母輩嘅祖父母們先記得成件事係點樣開始，而佢哋而家嘅子孫就已經習慣咗呢一種飄浮嘅生活。
而呢種唔上唔落，無根嘅生活，係需要乜嘢先可以令 浮城人堅持呢？喺第二章〈奇蹟〉入邊，西西就透過一則小說同讀者講，喺 浮城生活係需要「意志和信心」。而 浮城人，就靠住「意志同信心」創造出：九年免費教育、失業救濟、傷殘津貼、退休制度、高速公路、太空館、海洋公園，令 浮城成為世界上奇蹟一般嘅存在。
第三章嘅<驟雨>亦都好有趣，講述 浮城人一齊發嘅一場夢。而第四章都留俾聽眾一個問題，「乜嘢蘋果唔係一個蘋果呢？」。想解答呢個奇怪嘅問題，就請各位自己去搵吓《浮城誌異》呢一篇文章自己去搵下啦。
我哋skip一下，去到第六章〈課題〉，有一位老師帶領住一群學生去到大會堂睇展覽睇咗〈黑格爾的假日〉(封面圖右四)呢一幅畫。而篇章結尾呼應畫作入面嘅矛盾，有一個學生問「如果 浮城頭頂上有堅實嘅雲層， 浮城嘅上升就成為可喜嘅願望，咁仲抗拒啲乜嘢呢？ 」
呢一度所謂嘅「堅實雲層」，有評論認為係指向1984年簽署嘅《中英聯合聲明》，如果五十年不變、高度自治、一國兩制、港人治港真係貫徹落實嘅話，我哋仲抗拒乜嘢呢？
而其實 浮城人喺當時嘅困惑，西西早喺第五章〈眼睛〉就指出過。原文係係咁樣嘅：
「掙開眼睛， 浮城人向下俯視，如果 浮城下降，腳下是波濤洶湧的海水，整個城市就被海水吞沒了，即使浮在海上，那麼，揚起骷髏旗的海盜船將峰擁而來，造成屠城的日子；如果 浮城上升，頭頂上那飄浮不定，軟綿綿的雲層，能夠承載這麼堅實的一座城嗎？」
《浮城誌異》嘅篇章互相串連，我最鍾意嘅就係第十三章對第六章 - 老師帶學生睇展覽所做嘅連結，大家有興趣嘅話都希望大家去拜讀一下原文。
返返去頭先引用嘅原文，浮城上升定下沉，到2023年，結局似乎早有定論，無論係無空氣嘅高空定係深海都好，白色恐怖都令人窒息，呼吸唔到。我喺今集結尾就拎啲佛偈同大家分享一下：
<世尊偈 (觀世音菩薩普門品偈)>
係咁講嘅：
或漂流巨海 龍魚諸鬼難 念彼觀音力 波浪不能沒
或遭王難苦 臨刑欲壽終 念彼觀音力 刀尋段段壞
或囚禁枷鎖 手足被鈕械 念彼觀音力 釋然得解脫
「念彼觀音力」係啲咩呢，對於唔信佛嘅人黎講，係啲咩呢？或者就係西西喺第二章<奇蹟>所寫嘅咁，就係靠住「意志和信心」啦。
最後嘅最後，34年前好，兩日前嘅事件都好，都希望逝者安息，生者堅強。最後今集就播放<心經>迴向俾遭受苦難嘅人。呢度係tipsy.podcast，我哋 下集見 拜拜。
-
聲帶： 世尊偈 (観世音菩薩普門品偈) (cho ver.) 及 Heart sutra (cho ver.) - 薬師寺寛邦

-
On This Site, In 1989, Nothing Happened.

-

收聽及IG連結：https://linktr.ee/tipsy.podcast