Rakesh Tiwary's Jinke Sapne Toote Hai:
Suno mai jaanta hu ki tumhe apni baaton me naseehat me uljhane ayenge
Tumhe samajhne wale tumhe samjhane ayenge
Kahenge mere meet, zindagi hai har aur jeet, ye to bas ek jua hai.
Tum hi nahi ho jiske sath ye sab hua hai.
Tum hi nahi ho jisne saalo tak kisi khwaab ko sanjhoya hai.
Unhe maaf karna dost. Wo nahi jaante ki tumne kya khoya hai.
Koi samajhta q nahi mujhe? Har baar ek hi rona hai.
Aur ye keh kar humne har rishta khoya hai.
Kabhi maa se uchi awaz me baat ki hai to kabhi pita se zabaan ladaya hai
Wo jo rishta humne khud bnaya tha na, unn dosto ko bhi khud hi gawaya hai.
Bhai, behen se ab baat nahi hoti, rishtedaaro ko dekh kar muh fer lete hai.
Aur jb bohot ho jata hai na tab bas basta lete hai aur nikl lete hai.
Koi samajhta q nahi mujhe?
Kya ye meri galti hai ki maine apne sapno ko sabse bada darza diya.
Tumse toh ho nahi paya, maine khud ko waqt ka karza diya hai.
Mujhe malum hai ki mai gussa karta hu, par wo mera gussa nahi hai.
Dard hai. Dukh hai. Rona hai par rone ko kandha nahi hai.
Dekho tum sahi ho. Tum parwaah karte ho. Mujhe baakhoobi khabar hai.
Magar ye raasta mera hai aur iski manzil meri kabar hai.
Kuch zyada nahi mang raha bas mere khilaaf kuch mat kehna.
Mai jab giru, tootu, toh uthane mat ana, bas sath me khade rehna.
Qki hausla toh pahaho ko kaatne ka bhi h mujhe.
Bas kabhi kabhi bikhar jata hu. Tab lgta hai… Koi samajhta q nahi mujhe?
