ការអានតែចំណងជើងរម្លងសាច់ក្នុងនៃអត្ថបទក្លាយទៅជាទម្លាប់មួយនៃអ្នកលេងបណ្ដាញសង្គម មិនថាស្រុកយើង ឬស្រុកគេនោះទេ ហើយទម្លាប់អានបែបនេះបានបង្ករទៅជាការយល់ច្រឡំជាច្រើន និងបណ្ដាលឱ្យមានការវិនិយច្ឆ័យខុសសាច់រឿងខ្លឹមសារដើម ដោយហេតុថាការចែករំលែកលើបណ្ដាញសង្គម ផ្លេតហ្វមនីមួយកំណត់មិនឱ្យមានចំណងជើងវែងនោះទេ។

ហើយសព្វថ្ងៃនេះបណ្ដាញសង្គមដូចជា Facebook ត្រូវបានមនុស្សជាច្រើនចាត់ទុកជាប្រភពព័ត៌មានរបស់ខ្លួន ទាំងដែលជួនកាលពួកគាត់ស៊ែរទាំងមិនបានអាន និងទទួលដឹងខ្លឹមសារខាងក្នុងឱ្យអស់នោះ។

ទំនងជាមើលឃើញពីផលអវិជ្ជមានច្រើនពេកនៃការស៊ែរចេញដោយមិនបានអានខ្លឹមសារខាងក្នុង បើយោងតាមគណនីផ្លូវការរបស់ Facebook នៅលើ Twitter បានធ្វើការប្រកាសទាក់ទងនឹងមុខងារថ្មីមួយ ដែលត្រូវបានបង្កើតឡើងដើម្បីឱ្យប្រាកដថាអ្នកស៊ែរព័ត៌មានបានអានសាច់ក្នុងមុននឹងស៊ែរចេញចែកចាយឱ្យមិត្តភិក្ដិផ្សេងទៀតបានឃើញនោះ។

មុខងារនោះសាមញ្ញទេ នៅពេលដែលអ្នកប្រើប្រាស់អូសកាត់អត្ថបទព័ត៌មាន ឬអត្ថបទណាមួយជាប្រភេទតំណរលីង នឹងលោតសារមួយតឿនថា “អ្នករៀបនឹងចែករំលែកអត្ថបទនេះដោយមិនបានបើកចូលអាន” ជាចំណងជើងធំ និងឃ្លាខាងក្រោមថា “ការដែលចែករំលែកអត្ថបទទាំងមិនបានអាន អាចនឹងធ្វើឱ្យបាត់ខ្លឹមសារសំខាន់”។

យ៉ាងណាក៏ដោយ សារនេះគ្រាន់តែលោតប្រាប់ឱ្យអ្នកស៊ែរដឹងខ្លួនប៉ុណ្ណោះ តែបើចង់ស៊ែរទៀតក៏គ្រាន់តែចុចពាក្យថា “Continue Sharing” ជាការស្រេច។

សម្រាប់មុខងារនេះផងដែរ Facebook គ្រាន់តែចាប់ផ្ដើមតេស្ដសាកល្បងប៉ុណ្ណោះ ហើយការសាកល្បងដំបូងនេះ នឹងធ្វើឡើងនៅលើអ្នកប្រើប្រាស់បណ្ដាញសង្គមនេះលើប្រតិបត្តិការ Android ក្នុងរង្វង់ប្រមាណ ៦%ប៉ុណ្ណោះ ទូរទាំងពិភពលោក។