Majalah umum anu medal di Bogor. Awalna medal sapuluh poé sakali. Saterusna saminggu sakali. Saméméh eureun medal, kungsi ogé medal sabulan sakali. Warga anu dikokolakeun ku Nanie Sudarma téh kasohor ku eusina anu tandes ngabéla hak urang Sunda. Kungsi jadi palagan polemik ngeunaan hak hirup sajak dina sastra Sunda kurang leuwih sataun lilana. Salian ti tulisan-tulisan umum, ngamuatkeun ogé karangan dangding jeung carpon. Medal ti taun 1952 nepi ka 1964.

Tina eusi majalahna leuwih neueul mélaan golongan Islam, disagédéngeun mélaan hak jeung kapentingan politik urang Sunda. Tulisan-tulisanana loba ngawartakeun ngeunaan gerakan kasundaan, kalawan mayeng remen ngamuat karangan-karangan Askawi (sandiasma Adeng S. Kusumawijaya) nu seukeut ngagambarkeun posisi sosial politik urang Sunda di lemburna sorangan nu kawilang teu nyugemakeun.