[場景 - 堂區中心會議室]
(眾人同聲齊唱「與基督同行」- 第２節: 雖則聽得別人說道，不能奈何命運。我卻不怕創出新猷，我要努力奮鬥。大踏步面向著世界，我要與救主一起，共望著大路向前進，與基督不相離~~)
眾: 感謝主！讚美主！因父及子及聖神之名，亞孟。
芝: 財哥，財哥，唔好意思呀，十二號嗰朝早嗰個逾越聖祭呢，我一時唔記得咗，原來嗰朝我要覆診㗎，你可唔可以代我領經呀？
財: 冇問題呀！嗰日我已經預咗會返嚟幫手㗎喇。
芝: 咁真係太好喇！唔該晒你呀，財哥！嗰邊個歐先生呢，佢個太太過咗身呀，我諗你喺度會比較好，你哋大家都係男人，你會比較明白佢嘅感受，同埋識得點樣安慰佢。
心: 呀！咁，十六號個追思彌撒，財哥，可唔可以嚟幫手呀？嗰位林先生都是太太過咗身㗎！
財: 如果是上晝，就應該冇問題嘅，嗰日仲要係禮拜六，我聖母軍下晝先至開會呀。
芝&心: 唔該晒你呀，財哥，你真係好人喇。有你呀，我哋就放心啦。
達: (誇張，半開玩笑地) 喂喂喂！你哋兩個 A字膊，善別小組嘅資深 {芝&心} 組員呀，喂，唔好咁樣有風駛盡𢃇喎，你哋咁樣蝦阿財哥好人，將啲工作全部推晒俾財哥做！一陣間嚇走咗財哥，你哋就知味道呀。
芝&心: (連忙，緊張地，七嘴八舌) 嘿，我哋邊度有咁樣呀財哥哦呵？財哥，我哋唔係好似阿達所講咁樣㗎！
芝: 係囉，十二號嗰朝早我真係要覆診㗎嘛。
心: 十六號嗰日，我都會到㗎，我叫財哥嚟幫手咋。
財: 冇問題，冇問題㗎，我真係得閑呀，亦都好樂意㗎。
Raymond: 財哥，真係多謝哂你成日都咁熱心積極，參加我哋善別小組嘅服務。你唔單止呢做事認真可靠，對於安慰家屬親人咁樣又充滿同理心，真係感謝天主，有你作為我哋小組嘅中流砥柱，真係我哋善別小組之福呀。你個人又好樂於助人嘅，但係你都要好好照顧自己嘅身體呀，唔好太過勞碌呀。好喇好喇，大家一齊夾手夾腳執好晒啲嘢，我哋一齊去食下午茶，fellowship啦！
組員們: 好呀！好呀！收到！OK！知道！冇問題！
財: Raymond呀，我去搵位先吓，都係我哋去開嗰間餐廳啦，係咪呀？
Raymond: 係呀，唔該晒，財哥。
達: 呀主席……呀資深組員，喂，你哋有冇發現，財哥佢好似……好似有啲……好難解釋嗰啲古怪呀……
芝: (大惑不解) 咩啊？你想講咩呀？
達: ……唔……雖然呢佢好似成日都笑面迎人咁，但係同佢傾偈或者同佢相處嘅時候，硬係覺得好似有一份隔膜同埋距離感呀，又或者呢係有一份嘅唔自然…… hm，err……好似驚人哋睇穿晒佢嘅心事咁。成日呢都獨來獨往，來去匆匆咁，雖然呢佢又好積極咁參與我哋唔同嘅活動，同埋唔單止係服務呀，仲有啲吃喝玩樂嘅活動佢都全部參加，但係哎呀就係同以前唔同，佢成日都好似心不在焉咁樣，有時呀仲見到佢嘅眼神好似好空洞，茫茫然，又冇乜好投入我哋嘅話題……好似好抽離咁呀。
芝&心: 我哋又好似冇你睇得咁仔細喔啊！……我哋仲以為阿財哥本身就係咁沉默寡言嘅人呀。
Raymond: 開組嗰陣時，大家都知道財哥好坦誠咁樣分享咗佢嘅心路歷程，都知道佢嘅情況，呢幾年間，佢接二連三咁樣經歷咗同親人之間嘅生離死別，呢啲人生大挑戰，要面對實在唔係容易嘅事。
芝: 係呀，我仲記得，財哥喺幾年前太太過身之後先至加入我哋嘅小組，嗰時佢啱啱退休，而太太又因為突然急病過身，佢真係傷心到成個落晒形呀，又好似方寸大亂咁，好彩得阿Raymond哥陪伴佢同埋開解佢，分享佢嘅經驗，佢先至可以慢慢咁企返起身，而且仲返返嚟我哋天主嘅大家庭。
達: (一本正經地) 我覺得阿財哥好似係想用堂區服務，同埋用各種唔同嘅善功嚟到去填滿晒佢嘅時間表咁呀，好努力積極咁生活。但係我記得呢有一次我聽佢提過㗎，喺夜闌人靜嘅時候，當屋企淨係得返佢一個人對住四埲牆，佢有好多嘅時候都會瞓唔著，hm……嗰種孤獨空虛嘅感覺，真係唔好以為流幾滴眼淚，第二朝瞓醒就會冇事，其實係可以好具毀滅性㗎。
Raymond: 財哥心靈嘅創傷，只有天主先至可以醫治。我哋要多啲為財哥祈禱，同埋要多啲開解佢，關心佢呀。
芝，心，達: 係呀，係呀，我哋會㗎。
Raymond: 好喇……大家執好晒啲嘢就快啲行啦，財哥等咗我哋好耐㗎喇。最尾嗰個記得要熄燈閂門呀。
[場景 - 聖堂內 - 領經台附近]
心: (焦急地) 哎呀！財哥仲未嚟到呀，佢會唔會有事呀？！佢從來都唔會遲到㗎喎！我琴日發短訊俾佢，佢都有覆我㗎。
芝: 已經唱緊進堂詠，彌撒都已經開始咗，佢應該唔會嚟㗎喇。你唔使擔心，你先專心去領經，我再試吓傳短訊俾佢啦。
心: 好啦咁……麻煩你喇。
[場景 - 聖堂內 - 領經台附近]
心: 阿芝，有冇財哥嘅消息呀？唔知點解？個心硬喺覺得……唔係好安樂呀。
芝: 彌撒完咗，我哋仲要陪伴家屬上山。不如試吓搵Raymond，睇吓佢會唔會有時間去搵吓財哥啦。
心: 好呀。
[場景 - 醫院大堂]
心: 嗰邊呀，Raymond喺嗰邊呀！
組員們: Raymond呀！……財哥，點呀？點呀，情況點呀？嚴唔嚴重呀？係咩病呀？？
Raymond: 大家要冷靜啲呀，呢度係醫院嚟㗎。shhh……
芝: Raymond哥！阿財哥佢到底發生咗咩事呀？
Raymond: 今朝早阿芝打過電話嚟俾我，因為財哥失場，擔心佢有事，於是我發短訊俾財哥喺外國個仔，佢即刻打電話俾平安鐘熱線中心，佢哋發現財哥跌倒呀，因為佢講嘢嘅時候有啲模糊不清，懷疑佢輕微中風，所以即刻call救護車送佢去醫院……我知道大家好關心財哥。但大家冷靜啲，唔好七嘴八舌咁問候佢。中風嘅病人可能會有情緒改變㗎，大家要小心啲，盡量平靜，輕輕慰問一吓，睇吓佢有咩需要就得㗎喇，嗱嗱……我哋可以幫忙嘅，最重要嘅係，同佢一齊祈禱。
組員們: 知道㗎喇，Raymond，你點話，我哋就跟著啦，OK。
Raymond: 咁我哋行喇。過嚟呢邊搭電梯上去。
[場景 - 醫院病房電梯大堂]
Raymond: 大家準備好未？要安靜啲！
達: sh!!!!
[場景 - 醫院病房]
護士: 周永通，你又偷偷地落床去咗邊呀？醫生吩咐你唔好周圍走㗎喎，萬一你有咩事，跌親呀咁樣咁點算呀……
周永通: ……靚女姑娘，我只係想去隔離房探吓個朋友啫，冇事㗎。你睇，我幾精神生猛，唔使擔心喎，擔心得多會起皺紋㗎！咁就唔靚㗎喇！
Raymond: 財哥你見點呀？我同善別小組啲弟兄姊妹嚟睇你呀。
心: (殷切地) 財哥，我哋好擔心你呀！你有咩需要呀？食物呀，日常用品呀，我哋都可以拎俾你㗎。
芝: 係呀，唔好同我地客氣呀，財哥，你成日幫我哋，而家呢係義犬報恩嘅時候喇。
達: shhhhh!!!
(完全靜下來) {原本木無表情的財哥，現在閉上眼，用被子蓋過頭。}
財: 有心喇！你哋請回啦，我要休息喇。
{眾人感到突然。不知所措。不知如何回應}
Raymond: 咁好啦，財哥。嗱，你好好休息。你一定好攰㗎喇，唔使驚㗎！有咩需要，隨時通知我哋，我哋遲啲再嚟睇你，主佑。
組員們: 財哥，好好休息！主佑！為你祈禱呀！
今日反思
每日聖言
「縱使我應走過陰森的幽谷，我不怕凶險，因你與我同在。你的牧杖和短棒，是我的安慰舒暢。」(詠23:4)
每日禱告
慈愛的天父，感謝祢讓我明白到祢從來沒有要求過我要為祢做什麼。我亦毋須透過行甚麼善功去討好祢，更不用說賺取什麼功勞。祢的所有恩賜，祢的救恩，完完全全是因為祢的慷慨仁慈而白白賞賜給我的。祢要的就只是我的心，要求我對祢的愛，要在萬有之上，雖然，我要透過愛其他所有的人，特別是那些有需要的弟兄姊妹，及最不可愛的人而表達我對祢的愛。
求祢派遣聖神來到我心中，不但以祢的愛充滿我。並常常提醒我，無論是任何事我都不要只是為做而做，也不要為自己感覺良好而做。即使那件善事無論是多麼高尚，若不是為祢而做，與祢一起做，並將光榮完全歸於祢，那麼，這些善事為我的靈魂來說不但是毫無意義，反而有害無益。求祢引導我的心只嚮往天上的事，將目光及所有心思念慮，由地上，由只顧看著自己，而轉到天上，只定睛看著祢。
以上所求是因祢的聖子，我們的主耶穌基督的名。亞孟。
願光榮歸於父及子及聖神，起初如何，今日亦然，直到永遠。亞孟。
★ Support this podcast ★