歡迎你參加《生命恩泉》將臨期網上靈修 2023
如果你尚未收聽引言，我們邀請你在進入第一天的靈修材料前，先收聽引言的錄音，以對今年的安排有個具體概念才正式開始。
[場景–聖堂]（神父講道）
神父: 為我們基督徒來說，死亡一點也不可怕，因為我們的主耶穌基督，為我們降生成人，傾流寶血，死在十字架上，主耶穌對我們的愛，對天父的愛與服從戰勝了死亡，也摧毀了罪惡。肉身的死亡只是在世生命的終結，靈魂與身體暫時的分離，只是生命的改變，並非泯滅，是換個方式存在。我們堅決地相信，也堅決地希望，就如基督確實從死者中復活和永遠地活著，同樣人在死後，也有復活及永生的希望……
[場景–茶樓]
女侍應: 4位飲咩茶？
明: 靚姐，麻煩你開壺普洱。
女侍應: 呢度有點心紙，你哋scan吓個QR code就可以落單囉！嗱，呢度有午市優惠你哋慢慢睇啦！
財: 阿偉，你嚟啦！
偉: 係喎，阿財，你咁耐冇出嚟敘舊，……好啦！就交俾我嚟點啦……阿強呢……膽固醇就有啲擲界……煎炸嘢就唔好食咁多喇……我同阿明就有少少嘅糖尿，甜嘢呢就食少啲……話時話，阿明，你啲睡眠窒息症呢，好似嚴重咗喎，係咪呀？
明: ……阿偉你點知道嘅，係呀，日頭成日都覺得好攰好攰，夜晚又已經好早瞓㗎啦，但係都瞓極都瞓唔夠咁樣呀
財: 我記得以前大家嘅體能都好好，成日呢一齊踢波，阿明呢佢雖然係肥嘟嘟，但係當中就跑得最快嘅……唉！估唔到，而家個個唔係呢度唔妥，就係嗰度唔妥呀……
偉: 阿財呀，……你唔講起都唔記得自己識得踢波啦！哈哈哈！
強: (陷入回憶中)唉！上次咁齊人呢好似都兩年前嘅事喇，嗰陣時誠哥個孫滿月，唉！今次又係阿誠哥 (感觸地) ……我哋先至有機會聚吓 (心神憂傷) ……。
明: 係喇！係喇！莫講話踢波啦，講好咗話一齊要吹水嘅……尤其係阿財呀，十次有九次半呀都唔見人啦。
偉: 阿財呢佢就出晒名勤力嘅，又有責任心，同時打幾份工，邊度有時間去應酬我哋啊
財: (懷緬昔日光輝) 想當年呢為咗搵食養家，淨係做份低級文員仔邊度夠洗吖！所以放咗工之後呢，咪要趕住接更揸夜更的士，朝早交更後返屋企瞓一瞓，兩粒鐘左右又要起身返工呀。
強: 係啦！我記得阿財，到咗夏天，你好似做埋救生員添噃。
財: 哈哈哈！係呀！係呀！(自信地) 後生嗰陣時呀真係好似鐵打咁樣呀……
明: (浮誇地) 嘩！阿財，你嗰陣時真係唔係好似人嘅生活咁呀！而家退咗休，終於可以好好享受一下人生囉。你有啲咩大計呀？
財: 唉！阿明呀，我就啱啱退咗休幾個月，真係好唔慣呀，日日呢無所事事，每朝起身，都唔知去邊度好。話時話呢，真係好想去搵返份工做吓，如果有人肯請我，人工低啲、辛苦啲，都無所謂呀……
偉: 阿財呀，你呀已經勞碌咗大半世㗎喇，返工呢就佔晒你人生嘅所有時間喎，你又冇去玩又冇啲咩嗜好……
明: 仲有呀……仲有呀……仲日日呀淨係瞓得嗰兩粒鐘添呀！……
財: 哈哈哈！阿明呀，嗰陣時我後生吖嘛……(突然感慨) 但係而家唔同咗咯，唉！年紀大喇，冇用喇……原本希望老闆會同我續多幾年約，……唉！老喇，就冇市場價值呀……
偉: 啲仔女呀都大晒啦，阿財……仲做！人生呀有得幾多個十年啊？啲老朋友呢就買少見少㗎喇，多啲出嚟見得一次就得一次啦。
強: 係呀！阿財，每次同學聚會都唔見你，大家都關心你嘅近況，擔心你做嘢太辛苦吖嘛……
明: 係呀！但係呢，除咗擔心阿財個身體呢，大家又都好羨慕佢有個賢良淑德嘅好老婆呀。
財: 嗱！阿明你又講得啱呀！我老婆真係好唔話得㗎！嗱，我掛住搵食都冇乜點陪佢呀！
偉: 阿財呀，你知唔知道呀你係有幾咁幸福啊？隔離班呀有幾個同學頭家都散咗咯，呢呢呢，就係我哋幾個呀，有陣時呀都會去同老婆嘈吓交咁，但係呢你老婆就唔單止冇投訴你唔癡家，又冇啲咩婆媳糾紛喎，仔女成績又好又乖，你呀就完全耳根清靜啦又唔使煩喎。
明: 係喇係喇！阿財，你真係要珍惜財嫂呀。女人要氹㗎！多啲讚吓佢，陪吓佢，同佢拍拖啦……
強: (感慨地) 阿明就講得啱喇！真係要學識珍惜呀！眨吓眼幾十年……諗返我哋細個嗰陣時，誠哥呢總係好多鬼主意嘅，我哋跟住佢呀周街玩，一陣就攞啲紙皮去sir滑梯，一陣就去山坑嗰度捉魚，大個啲我哋就去踢波，唱Karaoke……總之呢有誠哥就一定冇悶場嘅，唉……幾年冇見……真係估唔到 (強忍淚水) ……佢咁快……就唔喺度喇……
明: (有感而發) 係呀，阿強，我哋真係應該要感恩㗎。做咗人幾十年，有冇試過日頭你起身嗰陣感恩自己仲係活喺呢個世界上吖，仍然可以呼吸吖，可以擘開隻眼，仲有心跳吖？嗱！呢啲就係要感謝天主創造我哋今日，創造我哋自己呀。
偉: 嗱！嗱！嗱！阿明呢就講得啱喇！記得呢舊年中招嘅時候，辛苦到不得了，好返之後呀，人生第一次因為能夠有胃口去食嘢，唔再反胃而真心覺得感動呀，跟住呢就係嗰種食蕃茄有蕃茄味，食雞有雞味嘅心情，真係好感恩㗎……原來我哋日常生活有好多細節，都唔係理所當然㗎。
明: 我都有同感呀，阿偉。我都開始感受到呢聖保祿宗徒喺呢個得撒洛尼前書第五章嗰度同我哋講「應常歡樂，不斷祈禱，事事感謝」(得撒洛尼前書5:16-18) 當中裡面講嗰個「事事」呢就係講到我哋日常生活裡面啲細節嗰啲程度呀。
財: 嘩！勁喎，阿明！拋聖經添喎！
眾人: 哈哈！好犀利呀！嘩！勁喎！阿明！犀利呀！
強: 係喇！要能夠時時感恩，首先呢要活在當下，意思呢就係要細品味生活裡面每一個細節。唔可以放棄任何感恩嘅機會。亦都唔好呢只係懷緬嗰啲光輝歲月，或者着眼我哋嗰啲失去咗嘅嘢呀。
明: 阿強呢就講得出個重點喇，我都發現咗呢事事感恩真係令到我覺得我自己好似突然之間醒咗，發現我自己原來唔係窮人嚟㗎，嘩！係富翁呀！
財: 嗱！阿明，既然你係富翁，今餐就應該你請啦？大家話係唔係啊？！
眾人: 多謝富翁啦！多謝晒呀，阿明！咁我哋就唔客氣喇。
強: 嗱！退休,年紀大就唔代表冇用，冇貢獻嘅。只係呢我哋已經完成咗人生嘅一個階段，而家進入下一個階段，而我哋嘅任務同以前唔一樣咁解嘅啫。
偉: 冇錯喇，阿強。其實呢人生嘅下半場都可以好精彩嘅，以前錯過咗，冇時間嘅，冇機會做嘅，就好好咁趁而家仲有心有力，要好好咁樣把握機會呀。
明: 我同阿偉，英雄所見略同，除咗陪老婆同屋企人去旅行之外，去睇下呢個世界之外，我哋要盡量抽多啲時間同啲老朋友見面，敘吓舊……
偉: (打斷明，鬼馬地) 唔單止喎阿明……聽聞你仲好似讀緊教理班喎！
眾人: 嘩！好犀利呀！
明: (故作嚴肅) 大家冷靜啲，呢度呢話哂都係公眾嘅場所,係咪？(扮正經又搞笑地) 我明白大家咁樣我明白你哋嘅意思嘅，嗱！我呢個吖嘛，唔單止上呢個宗教倫理堂吖嘛，甚至乎望彌撒嘅時候又恰埋眼嘅人吖嘛，竟然會讀呢個教理班，係咪呢？嗱，呢個就係天主嘅計劃喇，嗱！就係深不可測嘅，係你會意想不到嘅……
偉: 哈哈哈。好喇！好喇！我哋呢都係唔好再笑阿明佢啦！其實呢人人都有天主嘅恩寵，雖然係遲咗啲，但係呢阿明而家先至將埋响地下嘅嗰一個塔冷通掘返出嚟用呀。
明: 係喇係喇係喇！嗱，趁著主人仲未返嚟，仲有機會㗎，你哋嗰啲分得嗰五個,兩個塔冷通嘅，快啲行動啦……
財: 好喇好喇！咁我一於聽你哋嘅話，等我將我埋藏喺銀行戶口裡面嘅銀紙拎出嚟，同老婆去旅行吓都好喎！
今日反思
每日聖言
「我對你們所懷的計劃 -- 上主的斷語 – 是和平而不是災禍的計劃，令你們有前途，有希望。那時，你們呼求我，前來懇求我，我必俯聽；尋找我，必找到我，因為是你們全心尋求我。」(耶29:11-13)
每日禱告
慈愛的天父，感謝祢創造了我，賜給我生命及我所需的一切，養育我到今天，更賜給我永生的希望。求祢派遣聖神來到我心中，教我如何活在當下，在萬事萬物中尋找到祢。求祢也賜我一顆感恩的心，同時亦讓我明白到我的價值不在於我的能力、年齡、或者其他祢的恩賜，我是寶貴的，因為，我是按著祢的肖像及模樣，由祢親手創造的。我在祢的救恩計畫中擔當著獨一無二的角色。求祢常常提醒我，我是祢以祢聖子耶穌基督的寶血高價贖回來的。擁有著是祢所愛子女的尊貴身份。
以上所求是因祢的聖子，我們的主耶穌基督的名。亞孟。
願光榮歸於父及子及聖神，起初如何，今日亦然，直到永遠。亞孟。
★ Support this podcast ★