[場景 - 街上回家途中]
明: 喂，阿財，我哋今日喺你屋企附近嗰個聖堂有活動呀。你有無時間一齊食飯呀？
財: 阿明呀，我今朝早呢出咗去旅行社攞啲資料呀，而家趕緊返屋企同老婆食晏呀，同埋要研究一吓啲行程吖嘛。唔好意思呀，下次喇，下次你早啲搵我，我一定同你食……好……好……拜拜。
財: 老婆，我返咗嚟喇！
[場景 - 財家]
財: 我今朝去咗旅行社呀，嘩！好多人呀！條龍呀長度呢……
財: 哈哈哈……我攞咗好多資料呀……原來郵輪都有分好多種㗎喎……
財: 你唔使擔心，都有啲比較經濟啲嘅，唔係話完全冇希望嘅。(憧憬著) 人一世物一世，可以嘅話，試吓都唔錯嘅。咁多年嚟呢，你同我一齊捱大啲仔女，都冇試過同你去咩旅行，淨係掛住搵食，都無時間同你去玩添，或者呢兩公婆拍吓拖，唉！我知我份人呢冇乜情趣呀……嗱，而家呢趁我哋呢行得走得，就當俾個機會我補償一吓啦…… (過了一會，仍然聽不到有任何回應) ……咁你又唔使太過擔心嘅，都唔係想象中要洗咁多錢嘅……我知你個人知慳識儉，今次就唔好慳著我個銀包喇嗄。……
財: 老婆你煮好飯未啫？得喇得喇得喇！我洗個手呢就過嚟幫你開飯吓。
財: (不滿地) 老婆呀，你做咩粒聲都唔出啫？我返咗嚟喇，你聽唔聽到啊？
{在家中四處尋找}
財: (疑慮及緊張地) 老婆！
財: 唔通出咗去？嗄……冇理由呀！
財: (疑慮及緊張地) 老婆！
{看見妻子倒在睡房地上}
財: (驚嚇地及緊張地) 老婆，你點呀？你做咩瞓喺個地下度呀？哎呀哎呀！你見點呀？你醒吓啦！你唔好嚇我呀……唔係喇，要叫救護車……
財: (慌忙地) 喂，我老婆暈咗呀。我啱啱返到嚟屋企就見到佢暈咗喺地下度，請你快啲嚟救護車！救護車快啲嚟呀……老婆！你冇事吖嘛……
[場景 - 醫院走廊，手術室門外]
財: (緊張，疲累，憂心忡忡) 醫生呀，我太太乜嘢情況呀？
醫生: 佢嘅休克係由於突發性心肌梗塞，俗稱心臟病發，而引致嘅心衰竭。
財: 咩話？心臟病？從來都冇聽過佢話有心臟病或者之類嘅癥狀㗎喎……
醫生: 心肌梗塞嘅先兆唔一定會好明顯，所以往往好多時呢都會被人忽略……佢暈嗰陣時你喺唔喺佢身邊呀？
財: 我一早就出咗去，我今朝早出去嘅時候佢地地㗎，返到嚟嘅時候先至發現佢暈咗喺地下度，跟住就立即call救護車……醫生，到底咩事呀？
財的兒子及女兒: (上氣不接下氣，擔心，緊張地) 爸爸，媽咪點呀？
醫生: 你哋都係陳淑賢嘅家人？
財的兒子及女兒: 我哋係陳淑賢嘅仔女，佢係我哋爸爸，陳淑賢嘅丈夫。
醫生: …… (難於啟齒) 好抱歉，我哋已經盡哂力，佢送到嚟醫院嘅時候已經太遲，佢好可能已經病發咗好一段時間，因為休克嘅時間太長，腦部同身體其他器官缺氧嘅情況嚴重……我哋已經冇辦法救返佢喇……我正式宣布病人陳淑賢嘅死亡時間係 2017年3月12日14:49。
護士: 呢張係陳淑賢嘅死亡通知書，err……請問邊位家屬可以代表簽名呢？
財: (驚訝，憂傷，難過，不懂反應) ……淑賢！淑賢呀！
財: (神情呆濟，一臉茫然) (突然鼻子一酸，激動地問道)你講真㗎？……真係就咁樣就走咗喇？
[場景 - 聖堂]
財: 於辭靈禮後，靈柩隨即送往柴灣哥連臣角火葬場進行火化，火葬禮由黃神父主禮，主家已經喺聖堂門外準備咗旅遊巴士前往，方便嘅親友，請稍移玉步……
王太: 財哥，真係好多謝你呀。全靠你同嗰班善別小組嘅幫忙……一直咁安慰，陪伴同幫我哋手安排咁多嘅身後事……
王先生: 真係唔該哂你，財哥，好彩有你哋幫忙處理嗰啲複雜嘅申請，令到所有嘅安排都非常之暢順，真係減少咗我哋同我細佬嘅後事好多嘅擔心同埋壓力。
王小姐: 多謝哂你哋咁用心咁安排我爸爸嘅喪禮，禮儀莊嚴而神聖，喺禮儀當中，我真係好感受到嗰份嚟自天上嘅平安。
財: 我自己都係過來人，好明白你哋嘅心情嘅。幾年前我太太過身嘅時候，都係得到善別小組嘅幫忙，感恩之餘，亦都覺得陪伴亡者家屬係一件非常之有意義嘅事。於是，我加入咗小組。你哋都唔好太過傷心喇，王太，你先生今日打完咗塵世嘅仗，返咗天家喇，將來你哋會喺天上重逢㗎。
王太: 咁樣就走咗剩低我孤伶伶一個，你叫我以後點樣生活吖？我真係好唔捨得佢呀。
財: 嗱，思念呢係難免嘅，但係感謝主耶穌降生成人，為我哋帶嚟咗永生嘅希望，所以呢個只係暫別嚟嘅啫，唔好唔記得要好好珍惜而家眼前所擁有嘅一切。你個女咁乖又咁孝順，就花多啲精神心思，好好照顧佢啦。
王先生: 財哥，你哋忙咗成日，都應該肚餓㗎啦，我哋喺附近間酒樓訂咗幾圍枱，雖然酒微菜薄，我哋不如一邊食一邊傾吓啦？
財: 好呀，好呀，多謝哂。
[場景 - 茶樓]
財: 王太，想食啲咩嘢呀？我幫你攞吖！
王太: 唉！財哥，有心喇，我真係冇乜胃口呀。
財: (欣切慰問) 王太，你覺得點呀？身體有冇邊度覺得唔舒服呀？
王太: 我個人好似浮吓浮吓咁，個腦一片空白，個心都唔知去咗邊咁，個肚呢反而頂吓頂著吓。
財: 我明嘅，王太……感同身受呀，諗返起我太太過身嗰陣時，突然到好似海嘯咁，冇警號，喺完全冇心理準備嘅情況之下，啱啱退休嘅我，又突然失去咗老伴，實在係好難接受呢個事實嘅。唔只淨係身邊少咗個人咁簡單，都唔係浮誇㗎，但真係有啲似……有啲似個天跌咗落嚟咁樣，我個世界，我嘅生活翻天覆地。嗰種思念係無邊際嘅，喺屋企裡面嘅每一樣嘢都能夠勾起我一個又一個嘅回憶呀。
王太: 吓？諗吓都好淒涼又恐怖！咁，財哥，你到底點樣過呢一關㗎？
財: 感謝天主咯！善別小組嘅弟兄姊妹，將我帶返教會。雖然我本身係教友，但係後生嘅時候成日都以工作忙為藉口，淨係喺大時大節嘅時候先至勉為其難，陪我太太返吓教堂望吓彌撒咁啦。而家我每個主日都會風雨不改，一早嚟到聖堂坐喺我太太經常坐嗰個位，感覺同佢好近，好似一齊望彌撒一樣，心裡面有一份難以言喻嘅平安。加上喺小組聚會分享當中得到嘅安慰同埋支持，令到我重新振作，投入生活，放下哀傷，將心思同埋希望轉而放喺照顧仔女日常生活上面，好好珍惜而家所擁有嘅幸福。
王太: 財哥，你真係好睇得開呀……面對咁嘅傷痛，都仍然能夠感謝天主。
財: 王太，「面對失去」係人生嘅必修課。各種各樣，大大小小嘅失去都係無可避免嘅。如果唔係天主派遣咗嗰啲天使嚟到我身邊，陪伴我度過呢個難關，我真係無法想像而家既我，究竟會係幾咁一蹶不振，抑鬱沮喪，過住啲點樣嘅地獄般，充滿怨憤嘅生活。而家我能夠走出無止境嘅悲傷，積極、滿懷希望咁生活，你叫我點能夠唔感恩呢？
王太: (有所領悟地) 財哥，你真係講得好啱呀，人一生總有一次㗎啦……明明係知道㗎……但係到針拮到肉嘅時候，仍然都係覺得好痛好痛呀。
財: 慢慢嚟啦，王太，適應新生活係需要時間嘅。多啲返嚟聖堂，同我哋一齊聚會分享啦。再艱難、再崎嶇嘅路，有人同行，都總係會比孤身上路嘅較容易行㗎。
王太: 好呀，好呀，多謝你呀，財哥。
今日反思
每日聖言
「我赤身脫離母胎，也要赤身歸去；上主賜的，上主收回，願上主的名受到讚美！」(約1:21)
每日禱告
慈愛的天父，感謝祢讓我明白到我生命中所享受的一切美善，都不是屬於我的，全都是祢的恩賜。每一段美好愉快的關係、我的才能、智慧、健康、甚至是我的時間……其實也不是屬於我的。這一切一切都是出於祢仁慈慷慨的恩賜。感謝祢有時候會利用那些「面對失去」的經驗，使我成長，讓我學習珍惜和感恩，將我放回正軌，帶領我更加走近祢。
求祢派遣聖神來到我心中，教我不但常常活在祢的愛內，祢的恩寵中。也賜給我勇氣去陪伴、鼓勵與支持身邊有需要的人。讓我能將這份與祢相遇的經驗，將祢的愛傳給身邊的人，給別人燃點希望。
以上所求是因祢的聖子，我們的主耶穌基督的名。亞孟。
願光榮歸於父及子及聖神，起初如何，今日亦然，直到永遠。亞孟。
★ Support this podcast ★