[場景 - 深夜，醫院病房]
病人們: 哎呀！好痛哦！~~痛死人啦！~~有冇人俾杯水我呀！快啲攞水俾我飲喇！~~點解冇人理我㗎！~~
財: 我到底做錯咗啲咩？我犯咗咩彌天大罪？而家要落得咁樣嘅下場？搞成今日咁？妻離子散，孤獨終老……而家仲要中埋風，半身不遂……天主呀，到底我做咗啲乜嘢得罪咗祢？雖然，後生嗰陣我曾經只顧工作而忽略咗家庭，亦都疏於返教會，但係我總唔算係一個窮兇極惡嘅人嚟㗎！祢咁樣懲罰我實在太重咯！我已經一把年紀咯，實在承受唔到呀！祢不如攞埋我條老命，我求吓祢喇！！！我求祢！……天主，我求祢！……
[場景 - 醫院病房] {翌日早上}
護士: 李有財，你覺得點呀？而家同你探熱同埋量血壓。你隻手好似有啲凍喎，你要唔要加多張被啊？嗱，陣間醫生會嚟巡房，同你做完檢查之後，如果一切正常呢，你就可以開始食流質食物，體力恢復咗之後，就可以做物理治療，慢慢就會好返啲㗎啦，你唔使擔心，到時會幫你安排，就會通知你㗎喇。嗱，而家你好好休息吓先，有咩需要，就撳呢個鐘叫我哋啦。
周永通: (鬼馬百厭) 嘩，靚女姑娘，不單止人靚，而且心地又好，溫柔細心又體貼，嘩，真係住到不想出院囉……
護士: 周永通，你又喺度亂講咩？……
周永通: ……Sorry! Sorry! ……講錯……住到好快好返，好快出院先至真！
護士: 嗱，周永通，你咪再喺度亂噏廿四，要安靜啲呀，唔好阻住其他病人休息，喂！你食咗藥未呀？
周永通: 一早就食咗啦。
護士: 嗱，你而家開始唔可以再食嘢㗎喇，聽日就要做大手術，今晚開始唔可以飲水，遲啲姑娘會再提你㗎喇。喂！你唔好再周圍走，冇食嘢就冇氣力，好容易會暈㗎，你而家乖乖哋留喺張床上面休息得唔得？
周永通: Yes! Madam!
護士: 如果你覺得暈或者有啲咩唔舒服，就撳鐘叫我哋啦！……
周永通: 好喇！好喇！後生細女，唔好好似阿婆咁長氣啦，好唔好？仲有好多病人需要你關心照顧㗎……行啦，行啦！拜拜！靚女姑娘！拜拜！
護士: 哼！你聽日做完手術之後仲係咁百厭就好喇……
周永通: 承你貴言，承你貴言，拜拜，一陣見……
周永通: Ha……好喇，自由喇……等我過去窗口睇吓先……嘩！落咗咁多日大雨！終於出太陽喇！……嗯，一定要出去玩吓先，如果唔係又點對得住個太陽伯伯呢……原來呢度望出去窗外個景咁靚㗎喎！喂！財哥，嘻嘻，財哥呀，嘩！你睇吓！不得了喇！不得了喇！有彩虹呀！你睇！……財哥財哥！你做乜望住個天花板郁都唔郁㗎……
周永通: 呀！真係羨慕你瞓呢張床，瞓喺度都可以睇到咁靚嘅景……嘩！簡直係心曠神怡！聽講話望住靚嘅景，或者望住靚嘅嘢呢，人都會健康啲，心情會好啲，開朗啲，復康都會快啲個噃……睇你悶兜兜咁，不如我同你一齊出去行吓……醫生唔會咁早到㗎，只要我哋嚟得切喺醫生巡房之前返到嚟呢，就會神不知鬼不覺㗎喇……
財: 夠喇！你嘈夠未呀？……
周永通: (興奮地) 哈哈哈！喔，原來你識得講嘢嘅……咁就好啦…… (陷入回憶當中，變得正經) 嗱，記得我當年中風嘅時候呢，要好多個月之後先至能夠講嘢講得清楚啲，要跟語言治療師重新學講嘢，日復一日不斷練習，初時就算好用力，好辛苦，人哋都聽唔清楚我講咩嘢，真係好無心機，無哂希望咁，好想放棄，覺得我永遠都唔能夠再正常咁講嘢，嘻嘻……當陣時我真係諗唔到會有今日㗎……而家終於明白喇，原來能夠清楚講嘢唔係理所當然嘅……要好好珍惜，要好好感恩，今日我能夠清楚講我嘅意思，人哋能夠聽得明白…… (突然回過神來，調皮地) 誒，嘩嘩嘩！事不宜遲喇，喂！立即出發喇，如果唔係，醫生嚟到就大件事㗎喇，我大件事無所謂呀，連累靚女姑娘就唔好啦……睇你個樣都係想出去兜吓風，吸吓新鮮空氣呢，喺咪？……仲唔起身，快啲上你架Benz輪椅啦……快啲，嗱，我幫你！……哎……用力……好嘢，叻仔叻仔。……等等……等我戴返副型仔黑超先…準備好未呀？嗱，出發喇…
[場景 -醫院 -戶外地方]
周永通: 嘩！美景當前！溫暖嘅太陽！柔和嘅微風！夫復何求呢？！出嚟聽下雀仔唱歌，咪好過喺病房裡面聽嗰班病人，喺度大吵大鬧，耳根清凈啲吖嘛！…你睇你乸口乸面，好似酸梅乾咁嘅喂？
財: 你行得走得就梗係瘋騷啦！我之後嘅生活都唔知點過！
周永通: 淡定有錢剩喎！嗱，雖然開始嘅時候呢，的確係好辛苦，但係都要啲時間適應㗎嘛，好多基本嘅動作都要由頭學過，好似返老還童咁吖嘛！哈哈，但只要你俾心機練習，一定會有進步嘅。嗱，幾年之後，你睇，好似我咁，咪又一條好漢。當然啦，人會老嘅，身體會退化，生老病死，係人生必經嘅階段，邊個都冇情講嘅，雖然有少數人呢可以康復得十足十，同之前一樣，但基本嚟講多多少少都會有啲後遺症嘅。不過老實講吖，樂觀啲，睇開啲，康復都快啲啦。
財: 唉！你講就容易！打擊，一個接一個，屋企人又唔係你身邊，而家連自我照顧嘅能力都冇埋。我乜都冇哂喇！人生所有嘅希望都冇晒呀！我都好想好似你咁一樣咁開心呀，咁樂觀呀…但係我真係好攰喇，過完一關又一關，好似無窮無盡咁呀…
周永通: 啊！哈哈哈！我明白喇…原來你係搞錯咗！嗱，你話你嘅希望都幻滅咗吖，其實你心裡面嘅希望究竟係乜嘢吖？一般人嘅希望大多數都係離唔開「美滿幸福嘅將來」啦，係咪？如果你認為「美滿幸福嘅將來」係取決於某啲你控制唔到嘅外在環境因，或者，直接啲講吖，你以為擁有某啲人或者事物，你就會有「美滿幸福嘅將來」。咁，你就大錯特錯喇！呢啲正正就係點解你會覺得冇希望嘅原因囉。
財: 咩啊？唔通孤獨老人都可以好幸福咩？連自我照顧嘅能力都冇，仲可以有啲乜嘢希望吖？
周永通: (裝模作樣) 呢位觀眾，嗱，你望吓呢邊，我咪就係成個人辦棟咗喺度囉。你睇吖，你睇前面，你睇遠啲啊，嗱，{看著前面遠方的太陽}……雨後總會有陽光。黑夜過後，太陽一定會升起嘅。冬天過咗，春天就一定會嚟。你將一粒種子埋喺泥裏面，就好似死咗咁，其實，呢個先至係佢生命真正嘅開始。……哎！弊傢伙！死喇，死喇，今次真係死喇，原來咁晏㗎喇，果然係，「快樂嘅時光過得特別快」，光陰似箭，我哋真係要快過火箭至得喇…準備好未，老友？嗱，火箭發射喇，坐穩啊！
[場景 - 醫院病房內]
周永通: ……嘩，真係感謝你個神…醫生啱啱喺隔離房巡緊房呀…有驚無險，安全到達喇…嚟啦，我幫你，123…嘩！你都幾重！得咗，冚好被就神不知鬼不覺…嗱，我返過去我嗰邊先喇。
醫生: {閱讀排板}李有財，你今日覺得點呀？好，我哋嚟做啲檢查先，有冇覺得邊度特別唔舒服？吞口水有冇困難？呢度有細半杯水，你慢慢飲咗佢啦……初步睇嚟，你嘅情況都算幾樂觀喎！唔需要做大手術嘅。只要按時食藥，建立返健康嘅生活習慣，加上適當嘅運動，你左邊身嘅活動機能會慢慢恢復返好多。遲啲姑娘會幫你約見營養師，物理治療同埋職業治療師，幫你安排返個康復計劃。今日可以開始嘗試食返啲流質嘅嘢，記住要慢慢食。留意返自己吞嘢嘅情況。飲水嘅時候都係要小心啲，慢慢飲。過兩日，我會再嚟睇你。
財: 唔該晒你呀，醫生。
周永通: 嗱！我係咪冇講錯呀？好好接受治療呢就會慢慢康復㗎喇。你真係要感恩呀，仲要多謝嗰啲發現你有事，嗱嗱聲送你去醫院嘅人呀。…咦？話口未完，你有客到喎…喂，我閃喇。
修女: 早晨啊！李有財。
財: 修女，早晨！
修女: 我喺呢度醫院牧靈部嘅張修女。係你堂區啲教友通知我嚟探你嘅。你而家準備好接受聖體未啊？
財: 修女，我實在唔堪當，我想辦咗修和聖事先。因為我得罪咗天主呀。
修女: 咁……好好好……聽日下晝呢會有神父嚟幫另一位教友辦傅油聖事，我問問佢得唔得順道過嚟為你辦告解聖事，而家你願唔同我一齊祈禱啊？拎住吖，呢條玫瑰念珠送俾你……
財: 好呀，多謝你啊，張修女……
修女: 我哋因父及子及聖神之名……(祈禱後) 感謝天主。…好喇，有財，記住喇喎，以後當你覺得唔開心嘅時候，憂傷嘅時候，甚至乎好頹喪嘅時候，你記著拎呢條玫瑰念珠出嚟念，默想一吓耶穌嘅一生，佢係為我哋降生成人嘅天主，佢雖然誕生喺好簡陋嘅馬槽嗰度，但係佢為我哋帶嚟咗永生嘅希望。你望吓，你手上握住呢個十字架，望著呢個耶穌嘅苦像，默想一吓十字架上為我哋受苦犧牲嘅耶穌，佢會俾力量你㗎，仲有佢會陪著你一齊經歷你嘅痛苦。
[場景 - 深夜，醫院病房]
財: ……主耶穌……我……實在好對祢唔住呀…望住祢嘅苦像……唉！……我實在無話可說……祢唔單止冇犯過絲毫嘅罪過，純潔無瑕，而且仲醫好咗唔少嘅病人，解除咗佢哋嘅痛苦……結果呢？……祢被出賣，受盡委屈，恥辱，酷刑，落得如此坎坷慘痛嘅下場……嗚嗚……就只係為咗救我哋呢啲咁嘅罪人……嗚嗚……唔通咁樣都算係公道咩？咁樣都算係祢應得嘅咩？……我仲有啲咩好投訴吖？我算得係乜嘢呀，我竟然敢埋怨祢呀？……對祢嘅恩賜我一啲感恩都冇…到咗失去嘅時候，遇上痛苦不堪嘅時候就淨係識埋怨祢……主呀，請祢原諒我嘅無知，我實在係唔知醜，我忘恩負義，鐵石心腸……主呀，求祢寬恕我……求祢寬恕我……千祈唔好棄我不顧……
{翌日早上}
神父: 早晨啊，李有財！張修女話俾我聽，你想辦告解，係咪呀？
財: 係啊，多謝你呀，神父。
神父: 咁我哋先辦咗告解，跟著我就同為你傅油，然後再送聖體俾你。
財: 感謝天主！感謝天主！實在太好喇。
神父: (拍拍他的肩膀) 唔洗怕！唔使怕！我哋開始喇…因父，及子，及聖神之名，亞孟…
神父: 好喇，你安心養病啦，唔好唔記得要時時祈禱，神父有機會會再嚟探你㗎。呀，係喇，陣間會有青年團體嚟呢度報佳音，傳報救主耶穌基督降生成人嘅喜訊，因為主基督將救恩連同希望，喜樂，愛，帶俾我哋每一個人。就嚟聖誕節喇，我祝你聖誕快樂，主佑平安。
財: 哦，好呀。主佑神父，再見喇。
幾位青年: 祝大家聖誕快樂！主佑平安！有小小心意想俾大家。想同大家傾吓偈…
樂: 你好啊，財哥。祝你聖誕快樂。我係阿樂呀，之前聖堂聖母軍聚會呢我哋見過面㗎喇，我屬於另一個成年支團嘅，其實我哋仲住埋同一個屋苑添呀！
財: 你好呀，阿樂，多謝你嚟探我呀。
樂: 其實都有差唔多成個星期冇見你嚟平日彌撒喔，你身體見點呀而家？
財: 你有心喇，我啱啱中咗風，仲要喺度住多陣，學好點樣適應中風後嘅生活，學識點樣照顧自己先至可以出得院呀。
樂: 哦！咁呀，財哥，如果你唔介意嘅話，我可以一星期嚟探你兩次㗎喎，到時睇吓你有啲咩需要，幫你買吓食物，日用品咁樣樣。我仲可以陪你去覆診，做治療咁樣喎。
財: 梗係好啦，但係咁樣會唔會太麻煩你呀？
樂: 唔會啦！舉手之勞嚟啫！多謝你俾個機會我行愛德就真！
財: 咁，真係…感謝天主…感謝天主…
今日反思
每日聖言
「那賜萬恩的天主，即在基督內召叫你們進入祂永遠光榮的天主，使你們受少許苦痛之後，必要親自使你們更為成全、堅定、強健、穩固。」(伯前5:10)
每日禱告
慈愛的天父，感謝祢讓我明白到相比祢降生成人在十字架上為我所承受的痛苦，我生命中所受的痛苦，都只不過是微不足道。況且，我的很多痛苦都是來自我不感恩的態度，我以為我在此世所擁有的東西，是理所當然的，是我靠自己的努力而得來的，是屬於我的。所以當面對失去的時候，就不能接受，感到怨憤。
天父呀！求祢賜我一顆懺悔，謙卑的赤心，教我看清謬誤，使我不再將希望放在除祢以外的任何受造物身上。求祢派遣聖神來到我心中，提醒我，要常常喜樂，事事感恩，因為天地萬物，一切美善都全源自於祢。
以上所求是因祢的聖子，我們的主耶穌基督的名。亞孟。
願光榮歸於父及子及聖神，起初如何，今日亦然，直到永遠。亞孟。
★ Support this podcast ★