[場景 - 堂區中心會議室]
眾: 感謝主！讚美主！因父及子及聖神之名，亞孟。
Raymond: 好喇！好喇！聖堂附近新開咗間café，好似都幾好坐，我哋散會之後一齊去食下午茶啦，談天說地Fellowship！
眾: 好呀，好呀。多謝晒主席！主席請食下午茶。
Raymond: (故作可憐狀) 哎呀！主席真係唔易做喔啊？……財哥，你都要嚟啊……
財: 多謝你先呀，Raymond。但係今日太晏喇，我要趕著去買餸返屋企煲湯煮飯俾啲細路仔食呀！大家食得開心啲嗄，唔好意思呀，我有事要先走，下星期見，byebye~~
Raymond: 財哥呢真係廿四孝老豆。
芝: 係啊，財哥，自從幾年前太太過咗身之後，佢將全副心機都俾哂喺啲仔女身上。每日一定要去街市買餸，煮飯俾啲仔女食㗎。
心: 點止啊，清潔打掃，洗衫熨衫，家頭細務，一腳踢，連早餐都煮埋呀，真係好犀利！……
眾: 行喇啦！行喇！……閂晒窗未呀？……閂咗喇
[場景 - 街市]
菜販: 呀哥仔，今日想食啲乜嘢呀？……今日新鮮返咗啲串藤蕃茄，好靚啊。
財: err……有冇芋頭呀？
菜販: 喂，芋頭唔係好當造喎，就算有都唔靚啦，不如食冬瓜啦。
財: 呀！唔怪得之我行勻附近所有嘅街市呀菜檔呀，都搵唔到芋頭啦！我個女呢最鍾意食芋頭㗎喇，今日佢要失望喇。
菜販: 你個女鍾唔鍾意食栗子呀？我呢度仲有少少喎。
財: 好啦，唉！都咁夜，應該都搵唔到芋頭㗎喇。栗子炆雞，都好佢都鍾意食嘅。
[場景 - 財家]
[電話對話]
財: 喂，阿仔呀？咩事呀？我而家煮緊飯呀！
仔: 老細臨放工嘅時候先至俾咗份嘢俾我做呀，叫我今晚一定要完成添，今晚OT都唔知要O到幾點，你哋食飯先啦唔好等我喇。
財: 阿妹可能都唔會好早返，所以等埋你返嚟一齊啦食，一家人一齊食好啲呀……
仔: 我都唔知幾點先可以收得工，都係唔好等我喇！嗱，我肚餓嘅話我會自己去買啲嘢㗎喇食。將啲飯餸留俾我聽日食，好唔好？。
財: 你肚餓就一定要食啲嘢先至再開工呀！你唔好餓壞個胃呀！唉！都唔好喺公司做到咁夜喇，快啲返屋企啦吓。
仔: 知道喇，唔使咁擔心我喎，好啦，我做嘢先喇，拜拜。
財: 拜拜！
[電話掛線]
財: (自言自語) 嘩，已經差唔多9點嗱，阿女仲未返到嚟嘅？
[電話對話]
財: 喂，阿女呀，你喺邊啊，你冇事呀嘛？已經9點幾咯喎，點解仲未返到嚟屋企嘅？
女: 爸爸，唔好意思呀，今日好忙呀，好多嘢做呀，而家差唔多可以走㗎喇，你不如食飯先啦，我大概一個鐘頭就會返到嚟㗎喇。
財: 一個鐘頭呀？爸爸等埋你返嚟先食呀吓。
女: 爸爸乖啦，你食先啦，啲飯餸凍哂㗎喇，你個胃又唔好，你夾開一份留低俾我就得㗎喇，唔同你講咁多喇，做埋啲嘢先喇，返嚟再同你講啦，拜拜。
財: (無奈地) 拜拜！唔好咁夜返呀，危險啊。
[電話掛線]
(電視新聞報導聲: 本港安老政策鼓勵「居家安老」，隨着人口持續高齡化，政府統計處2021年人口普查，有關長者的主題性報告中顯示，只有長者居住的家庭住戶（例如獨居長者以及由長者夫婦所組成的家庭住戶）急劇增加。在2021年，共有 382,620 個家庭住戶其所有成員 (外籍家庭傭工除外) 皆為長者，較2011年的 223,069 個住戶上升 71.5% ……)
[場景 - 堂區中心會議室]
眾: 感謝主！讚美主！因父及子及聖神之名，亞孟。
Raymond: 財哥，又趕住買餸煮飯呀，做二十四孝老豆？
芝: 嘩！財哥今日著哂成套老西咁，係咪去街市買餸呀？
財: 嘻嘻……你哋唔好笑我啦，今日啲仔女同我出去食飯呀，所以著得整齊啲啫。
心: 今日又唔係咩大時大節，唔通係財哥你牛一？
芝: 應該唔係喎，財哥係我哋上個月嘅每個月壽星，我哋仲一齊切蛋糕慶祝嘅，嗱！有相為證，嗱！你睇吓。
財: 只係普普通通食餐飯啫，佢哋話有間新餐廳，想帶我去試吓喎。
達: 嘩！嘩！大家睇吓財哥面上面散發嘅幸福吖！有啲咁孝順嘅仔女喎，真係羨慕死人咯。
財: (幸福地笑著) 多謝哂你哋啲高帽呀。感謝天主俾我仲有啲仔女陪吓我。亦都感謝天主，我有你哋一班咁好玩嘅兄弟姊妹，成日都氹得我咁鬼開心。好喇好喇，我要走先喇吓，下星期見，主佑。
[場景 - 餐廳]
Reception: How may I help you, Sir?
財: (有點緊張地) ……我個仔……book咗位，(舉起3隻手指) three……
Reception: Under what name has the table been booked? ……name, please!
財: (努力地) 李……Mr. Lee ……
Reception: Oh, Got it! Welcome, Mr. Lee, this way please.
仔女: 爸爸！
財: 哦！原來你哋都到咗喇？我啱啱喺聖堂開完會就即刻過嚟，估唔到你地仲早過我，真係少有喎！
女: 係咪屋企附近嗰間聖堂呀？你好似入咗個善別小組喎。
財: 係啊，自從你媽媽過咗身之後，如果唔係有呢班弟兄姊妹嘅陪伴同支持，慢慢咁將我帶返去天主身邊，當時我呢個雙失老年人，可能都唔能夠撐得到今日呀。真係好感恩㗎！透過同佢哋開會，分享生活，一齊祈禱，又接受培訓，然後可以用自己過來人嘅經驗服務其他喪親嘅教友，當中自己有好多得著嘅，亦都學到好多嘢呀。
仔: (心情複雜) 睇見你咁投入又開心…… (強擠出笑容) 咁……真係好喇……呀係啦，爸爸，呢個係餐牌嚟㗎，你睇吓有咩想食？
財: err……啲字咁細粒，仲要全部係雞腸，err……你哋點啦！ 爸爸乜都鍾意食，只要能夠同你哋一齊食飯，就已經好開心㗎喇。
女: (若有所思) …… er…… (提起精神) 咁好啦，我同阿哥就叫哂我哋鍾意食嘅嘢㗎喇，哥哥，不如我哋叫三個唔同嘅頭盤share？呢個沙律睇嚟好似幾吸引喎……
財: (放下刀叉，抹嘴) 爸爸真係食唔落喇，你哋啲後生仔要努力啲，唔好浪費食物呀。
仔: 爸爸呢度啲嘢啱唔啱食呀？
財: 頭盤，主菜，甜品，都做得好細緻用心，只係……err……
女: (若有所思) ……只係…… (帶點無奈，悔疚) ……爸爸都係鍾意食中菜多啲……
(氣氛突然變得凝重)
仔: (欲言又止) ……爸爸呀……我同阿妹呢考慮緊移民加拿大……
女: (懇切地) 爸爸，同我哋一齊去吖！
仔: 我同阿妹要趕喺佢移民申請截止之前申請到入籍，成件事大概只係需要兩年左右，之後，我哋就會申請你過去㗎喇……
財: (錯愕，故作冷靜，按耐著情緒，無奈地) 咁……唉！你哋……打算幾時走呀？
仔: 時間剩返唔係好多，就嚟落閘㗎喇。所以，我哋一申請到工作簽證，就要走㗎喇…… (帶點傷感) 希望喺今年年底之前飛……
女: 爸爸，我哋一攞到永久居民身份，就會返嚟接你過去㗎喇！
財: (百感交集) 爸爸明白你哋唔想丟低我一個人，但係對爸爸嚟講，移民就好似將我連根拔起，所有嘢都要重新開始，要適應一個全新嘅生活，新嘅環境，雞同鴨講，又人生路不熟。唉……爸爸係個長者喇，實在唔想離開我土生土長生活咗幾十年嘅地方，亦都冇辦法適應移民之後生活各方面嘅巨大轉變喇。……你哋媽媽返咗天主度，剩低我同你哋相依為命，而家連你哋都要離開我，我當然係唔捨得啦。但係你哋已經大個仔，大個女，有你哋自己嘅生活喇，要行你哋自己嘅人生路，雀仔BB長大咗之後，都係要飛走㗎啦！呢個係人之常情，亦都係無可避免嘅事實。你哋就照你哋嘅計劃去搞移民啦，爸爸……一個人留喺度……就咁啦！……個個都食飽喇呵？好夜喇，我哋返屋企喇吓。
今日反思
每日聖言
「他們專心聽取宗徒的訓誨，時常團聚，擘餅，祈禱。他們常讚頌天主，也獲得了全民眾的愛戴，上主天天使那些得救的人加入會眾。」(宗2:42,47)
每日禱告
慈愛的天父，感謝祢讓我明白到在世的所有關係中，即使是最親密的配偶，或者血緣關係也都只是我與祢的關係的反映。而在我的靈魂最深處的渴望，就是與祢建立親密而深厚，充滿愛的關係。亦只有這樣，我才能愛其他人，如同祢愛了我一樣。
求祢派遣聖神來到我心中，提醒我不但常常空虛自己，過以祢為中心的生活，並教我如何聆聽及辨識來自祢的聲音及祢的旨意，並作相稱於作為祢子女的事。
以上所求是因祢的聖子，我們的主耶穌基督的名。亞孟。
願光榮歸於父及子及聖神，起初如何，今日亦然，直到永遠。亞孟。
★ Support this podcast ★