[場景 - 財哥家]
樂: (精神奕奕) 你好啊，財哥。
財: (愉快) 早晨啊，阿樂。
樂: (像有大發現) 財哥，你今日好精神喎。
財: (同意，愉快地) 嘿嘿，呢個星期都瞓得幾好咁啦。
樂: (興奮地) ……係咯係咯！行路好似又進步咗喎！
財: 感謝天主呀！
樂: 陣間見到物理治療師，佢一定會讚你勤力嘅啫……
財: (愉快地) 哈哈，喺屋企無乜世藝！物理治療師俾啲功課，得閒就做吓，得閒又做吓，做完之後咪又再做囉……哈哈
樂: 喂喂喂！咁又唔好做得太過量！
財: 咁又唔會嘅，自己就住㗎嘛.
樂: 好啦，陣間如果物理治療師都OK，不如同你落下面公園行吓喇。
財: 好呀，係啊，都好耐冇落過去喇！
樂: 好，咁我哋而家快啲食飯先啦。
財: 好呀。
樂: (鬼馬地) 今日除咗有你最鍾意食嘅番茄蛋之外呢，仲有，阿樂小廚嘅全新菜色，登登登櫈……軟腍腍糖醋魚柳。
財: 嘩，好靚喎，條魚整到好似真嘅一樣嘅！
樂: 呢個係我喺網上面搵到一個，長者易吞食物烹飪比賽得獎者嘅食譜嚟嘅，咁我見又靚又好似幾好味，咪膽粗粗搵嚟試吓囉！
財: 阿樂，真係好多謝你呀，咁有心。你一定係花咗好多時間喺呢個餸裏面喇！
樂: 唔係啦！。其實我連味都冇試㗎。不過，個樣望落好似OK咁。而家趁熱，我哋快啲一齊試吓啦。
財: 嗯……好滑呀，啲味道呢又啱啱好喎。嘩，要將啲魚拆肉，仲要加雞湯搞爛佢，嘩，你用咗幾多時間嚟整㗎？咪好多功夫囉？
樂: 見你食得開心呢咁就好喇。煮嘢食原來其實都幾好玩㗎。多謝你呀財哥願意做我嘅白老鼠。你係阿樂小廚嘅第一個，亦都係暫時唯一一個嘅特別嘉賓。
財: 真係感謝天主派咗你呢個小天使嚟陪伴我呢個中咗風嘅獨居老人呀。出咗院之後，唔係有你幫我，我都唔知點算呀。
樂: 財哥，我哋唔單止係鄰居，仲去埋同一個聖堂，又係聖母軍，雖然唔同支團啫，都算係一家人吖。我一星期都係嚟探你兩次。幫你買嗰少少嘢，呢啲舉手之勞嚟嘅啫，一家人互相幫助，好應該吖。
財: 係呢，阿樂呀，你係咪新領洗？以前好似唔見你返聖堂嘅……
樂: (尷尬) 哈哈！其實我小學嘅時候已經領咗洗㗎喇，不過之後就冇返聖堂，其實都係大概兩年前我先至開始返返聖堂嘅。
財: 哦！唔怪知得啦。點解之前領咗洗又唔返聖堂，然後又突然間返返嚟嘅？
樂: (尷尬) 哈哈！財哥，其實……當初我返返聖堂呢，都係有啲唔係好正當嘅原因嘅……
財: 明！明嘅！追女仔呢，係咪呢？
樂: (尷尬) 哈哈！好明顯啦！其實返返聖堂之前嘅我，同而家嘅我都好唔同嘅，呢兩年我都覺得自己改變咗好多。
財: 咁你以前係點呀？又係啲乜嘢令到你有咁大嘅轉變嘅？
樂: 嘩，財哥，你咁問法，真係一匹布咁長個喎……
財: 唔怕喎！財哥呢就最鍾意聽故仔㗎喇……而且我哋有大把時間，你慢慢講啦。
樂: OKOK! ……咁呀好啦，阿樂繼小廚之後就變身成為「阿樂講故仔」……咁我就由頭講起啦！
財: 好呀，你慢慢講啦。
樂: 話說……大概喺兩三年前，阿樂都算係事業有成啦，喺一間跨國公司嗰度做部門主管，唔單止得到上司嘅賞識，同下屬嘅關係都算唔錯嘅，但係仍然唔覺得生活得好開心。
(回憶中，回到過去)
[場景 - 樂辦公室]
Peter: (緊張地) 樂哥，我啱啱收到消息呀，我哋用開嗰間廣告公司今年冇中到標呀，所以我哋平時用開嗰啲廣告位，已經全部俾對家mark哂，而家就算我哋再搵過第二間公司都冇用。
樂: (思考，精明地) 嗯……Good! Perfect! Team，係時候我哋要跳出框框。要發揮我哋嘅creativity。我就唔信淨係喺公共交通工具嗰度賣廣告先至有效。大家而家返去分頭去做research，搵下仲有咩其他可能性，OK? 聽朝返嚟我哋開會再傾。
眾人: 收到，樂哥！
[場景 - 酒店宴會廳 - 公司周年晚會]
眾人: woo…… cheers!
樂: 今年咁多挑戰，大家都真係辛苦哂！。辛苦哂！
眾人: Yeah!!
樂: 嗱！有咁好嘅成績，唔單止老頂呀，連CEO頭先喺台上致詞嘅時候都點名大讚，話我哋嘅危機應變處理得好好，仲好有創意添。
Peter: 全靠樂哥轉數快，又淡定有台型。
Albert: (搞氣氛)喂喂喂，Peter仔。你真係明「刷」(刷鞋) ……秋毫喎。
Rachel: Albert，你唔抵得呀，都可以刷埋一份㗎。不過今次呢個project真係好緊張刺激呀。
Mandy: 點止呀Rachel，直頭係好有電影感呀。嘩！見到高手過招，血淋淋互片嘅情況呀。
Albert: 嘩！Mandy乜你咁好想像力㗎？商場如戰場就梗係咁㗎啦……如果我哋唔係趕得切即刻變陣，提早開始谷宣傳，任我哋宣傳策略幾咁creative都冇用呀。
Peter: 係啊，Albert。好彩樂哥消息靈通咋，知道對家嘅新產品同我哋嘅差不多完全一樣，如果真係俾佢哋食咗頭啖湯呀，我哋嘅業績一定插水啦，到時呀可能唔止冇bonus咁簡單喇。
眾人: Yeah!! 樂哥！樂哥！樂哥！
樂: 嗱，一句講哂，個project大家都有份好俾心機咁做嘅。為我哋條team合作無間，年年爆數，飲杯先啦！乾晒佢！
眾人: Yeah!! 爆數！爆數！爆數！
樂: 嗱，呢個team spirit就啱喇！不過我個杯就真係見哂底喇，我去攞杯嘢飲先！
眾人: OK，係，好呀，樂哥！快啲返嚟呀！唔好俾佢停！Yeah!! 爆數！爆數！爆數！
樂&Grace: 唔該！
樂&Grace: 你先啦！
樂&Grace: (尷尬哋笑) 哈哈！
樂: Lady first!
Grace: OK，thanks! 唔該一杯fruit punch。
Bartender: 呢位先生呢？
樂: Whiskey on rocks 唔該。
Grace: 你好呀，我叫Grace，係HR Department嘅，啱啱上個月先至入職。請多多指教。
樂: Nice to meet you, Marketing 嘅阿樂。
Grace: 哈哈。你叫阿樂？咁你個人一定係好開心㗎喇。
樂: 哈哈，咁你叫阿Grace，咁你個人一定好full of grace?!
Grace: 咦？唔通，你都係教友？返開邊個聖堂？邊個堂區呀？
樂: 嘩，你呢個問題少女嚟個喎，咁多問題，不如我哋搵日出嚟食個lunch慢慢傾，你咪可以慢慢問咯？
Grace: 都OK呀。
樂: 咁留個contact? 我哋Whatsapp再約？
Grace: 嗯，好呀！
樂: 咁我返返去同事嗰邊先， Nice to meet you! See you!
{時空交錯，返回樂剛離開之後}
Rachel: 呀，其實呢，點解樂哥會知道對家出咩product嘅？
Mandy: 小道消息。聽講咧……
眾人: shhhhhh!!
Rachel: 喂喂喂……Mandy呀，你繼續講啦。
Mandy: 聽講呢，對家有個大秘書，好冧樂哥㗎，不過樂哥一直都冇乜點騷佢，但係早幾個月前就俾人見到佢哋一齊食飯呀……
Albert: 原來係咁呀。哎呀！咁真係辛苦哂樂哥咯。為咗個project仲要犧牲色相添啊！
Rachel: 又唔係咁講喎，Albert，我就覺得嗰個女仔好可憐喇！嗱，你諗吓吖，樂哥應該就唔係真心鍾意佢嘅，如果真係佢爆㗎，又俾人知道咗，個女仔分分鐘連份工都冇埋㗎。到時人又冇,工又冇，幾慘慘豬呀！
Peter: 嗱，Mandy唔好話我幫住樂哥喇。呢啲嘢你情我願㗎嘛，又冇迫佢嘅，俾著我呀，我都會咁做啦。
Albert: 喂喂喂Peter仔，你係咪又咁快飲醉喇？你有樂哥一半咁靚仔有型，先至講啦。
Mandy: 我就寧願揀個心地善良，真心愛我嘅人呀。咁不擇手段，利用感情嘅人呀，幾靚仔都冇用啦……
Peter: ……樂哥，你返嚟嗱！
今日反思
每日聖言
「人縱然賺得了全世界，卻喪失了自己，或賠上自己，為他有什麼益處呢？」(路9:25)
每日禱告
慈愛的天父，感謝祢讓我明白到外在的快樂，雖然都是由祢所創造及賜給我們的美好的東西。卻遠遠不及由祢的聖神在我們內所結的喜樂的果子那樣真實及持久。求祢派遣聖神來到我們心中，時時提醒我，只有能夠跟祢在一起，只有能夠像祢一樣為愛犧牲，才能使我獲得真正的喜樂。主耶穌，求祢醫治我破碎的心，驅逐我心內那個自私的魔鬼，賜給我那份即使痛，仍然繼續堅持去愛的勇氣。求祢賜予我，因著祢的聖子降生成人給世界所帶來的那份洋溢著救恩的喜樂。
以上所求是因祢的聖子，我們的主耶穌基督的名。亞孟。
願光榮歸於父及子及聖神，起初如何，今日亦然，直到永遠。亞孟。
★ Support this podcast ★