知里幸恵編訳『アイヌ神謡集』より海の神が自ら歌った謡「アトイカ トマトマキ クントテアシ フム フム！」 原文Terkepi yaieyukar, “Tororo hanrok hanrok!” Tororo hanrok, hanrok! Shineantota muntum peka terketerkeash shinotashkor okayash aine ingarash awa, shine chise an wakusu apapaketa payeash wa inkarash awa, chiseupshotta ikittukari chituyeamset chishireanu. Amset kata shine okkaipo shirkanuye kokipshirechiu okai chiki chirara kusu tonchikamani kata rokash kane.“Tororo hanrok, hanrok!” ari rekash awa, nea okkaipo tam tarara unnukar awa, sancha otta mina kane, “Eyukari ne ruwe? esakehawe ne ruwe? na henta chinu.” itak wakushu chienupetne,“Tororo hanrok, hanrok!” ari rekash awa nea okkaipo ene itaki:―― “Eyukari ne ruwe? esakehawe ne ruwe? na hankenota chinu okai.” hawashchiki chienupetne, outurun inumpe kata terkeashtek, “Tororo hanrok, hanrok!” rekash awa nea okkaipo shui ene itaki:―― “Eyukari ne ruwe? esakehawe ne ruwe? na hankenota chinu okai.” hawash chiki, shino chienupetne, roruninumpe shikkeweta terkeashtek, “Tororo hanrok, hanrok!” rekash awa arekushkonna nea okkaipo matke humi shiukosanu, hontomota shi apekesh teksaikari unkaun eyapkir humi chiemonetok mukkosanu, pateknetek nekona neya chieramishkare. Hunakpaketa yaishikarunash inkarash awa, mintarkeshta shine piseneterkepi rai kane an ko ashurpeututta okayash kanan. pirkano inkarash awa, useainu unchisehe ne kuni chiramuap Okikirmui kamui rametok unchisehe neawokai ko Okikirmui nei ka chierampeutekno iraraash ruwe neawan. Chiokai anak tane tankorachi toi rai wen rai chikishiri tapan na, tewano okai terkepiutar itekki ainuutar otta irara yan. ari piseneterkepi hawean kor raiwa isam.