繼《人生種種》、《哲學的陌生感》之後，不如返到去上世紀三、四十年代嘅民國，睇下當時嘅知識份子點睇人生。三十年代係一個思潮激蕩嘅年代，各種思想同主義互相角力，如民主主義、自由主義、馬克思主義、新儒家等…由身處不穩定嘅政局，到面對國破家亡嘅危機，知識份子如何透過反思人生，安身立命？ 馮友蘭係民初最重要嘅思想家之一，佢寫嘅《中國哲學簡史》曾經係外國學者了解中國哲學嘅必讀書，對華人學術界（特別喺中國大陸）影響深遠。作為新一代儒者，馮友蘭透過融薈中西嘅哲學，發展出一套獨特嘅人生觀。 古代士人嘅人生目標有三個層次：立言、立功、立德。放喺現代來講就係知識、事業同德行。馮友蘭認為，三種目標分別受　「才、命、力」影響：每個人都有唔同嘅天賦（才），所以精通嘅知識會唔一樣；要事業有成當然要靠能力同努力，但亦受到外在條件限制（命）；唯獨德行方面，無論你能力點、環境係點，都可以靠努力（力）去實賤。由於「德」喺三種目標入面係最重要嘅，馮友蘭認為即使覺得自己唔夠才華，或者外在環境可能不利於發揮自己所長，但只要努力做一個有德行嘅人，人生就已經充滿意義。民初政局動蕩，知識份子點樣喺權力鬥爭嘅洪流之下，堅持自己嘅理想同正義，呢種精神好值得現代人借鑒。 但下下都要求人做道德L，會唔會好苛刻，好「離地」呢？其實馮友蘭並冇否定情感同慾望嘅，只要做到「中、和、通」就可以：「中」就係儒家嘅「中庸之道」；從道德方面睇就係「和」，即既滿足私利亦不妨礙他人之利益，就好似孔子所講：「己所不欲，勿施於人」、「己欲立而立人，己欲達而達人」；從制度上來講就係「通」，尋求一個可以滿足最多人、解決最多問題嘅「通義」。所以，馮友蘭所講嘅「德」，其實都係一種類似互惠互愛嘅態度，只要做到呢一點，自己同社會都會得到最大嘅幸福。 最後，佢認為人應該不斷追求人生嘅最高境界：由低至高依次序為「自然境界」、「功利境界」、「道德境界」同「天地境界」。頭兩個境界分別係動物（順從慾望）同小人（追求私利）所有，而道德境界就係上一段做到「中和」之道嘅賢人，而最終境界就係「通」天地：為整個社會、整個世界、整個地球謀福祉嘅，「為萬世開大平」嘅聖人境界。雖然馮友蘭認為人死就歸於無，但你留低嘅足印就係不朽嘅：你曾經嘅言行會影響到後世。所以做人應該要立德，貢獻社會，為他人做個榜樣，如果做到好似孔子、耶穌、佛陀、蘇格拉底等聖人咁樣，你嘅精神就真係「大不朽」了。 呢本書同《哲學的陌生感》都有著墨人生同死亡嘅問題，亦有一啲共通之處（如陶國璋嘅自我層次同馮友蘭嘅人生境界），可見即使身處唔同時代，大家嘅環境雖然會有唔同，但面對嘅問題大致都一樣。睇前人點樣思考人生，都可以令現代人有所啟發。馮友蘭嘅人生觀，令我更加堅定咁相信「以義安命」，無論世界變成點，都要做好自己應做嘅事，堅持自己嘅正義，希望自己嘅少少綿力可以幫到身邊嘅人，做到「小不朽」嘅目標。 唔知下一位思想家嘅人生觀，又會對我有咩新嘅衝擊呢？