唔知點解我會喺周末嘅夜晚飲咖啡，結果當然就瞓唔著，所以決定講下陶國璋先生本《哲學的陌生感》。陶生以前喺中大教人文通識同哲學，所以睇完《人生種種》，就當然要睇埋佢地嘅師父點講。 本書以「陌生感」為軸心，分自我、死亡、人生三個主題。點解要強調「陌生感」呢？因為人生入面，陌生感係會不斷喺唔同嘅經歷中呈現出來。 首先以死亡做例子。人對死亡嘅恐懼，就係源自我地對死亡嘅陌生。人類對未知嘅事物會感到恐懼，而死亡係絕對不可知嘅，我地可能知道生物學上死亡嘅定義，但冇人會知道親歷死亡會係點。有冇死後嘅世界？靈魂會唔會存在？書中有段講得好好，宗教令人臨終有所寄託，因為佢地所講嘅死後世界賜予你存在嘅延續，即使你落地獄，你嘅自我都「仲喺度」。我地嘅存在會消失，呢一點更令人無法想像。 咁我地應該點樣去面對死亡呢？作者引用海德格所講：生死係一個整體，死亡嘅虛無突顯存在嘅迫真，所以人先會珍惜有限嘅生命，拋低得失榮辱，享受生命嘅每一刻。孔子都有一句：「未知生？焉知死？」 我地自生出來就不斷地被賜予唔同身份，喺咩地方人、係邊個個仔、做緊咩職業…但呢啲功能上嘅標籤，可以幫助瞭解自己嗎？無論我描述得幾具體，我都好似當左自己係一個「他者」咁去觀察，就好似你照鏡嗰陣，你知道鏡中嘅係自己，但同時又唔係自己，因為佢只係從自己投射出來嘅形象。我係邊個？咩係自我？點先可以搵到真正嘅自我呢？ 作者將自我由低到高分為幾個階段，由生物自我、心理自我、美感自我、到價值自我等，逐級而上。而人唔應該停留喺生物層面、情緒層面嘅自我，而要追求較高層次嘅階段，突顯自我嘅自主性、自我欣賞、自我價值嘅建構等，要透過自我反思去逐步領會。 當自我同死亡都係陌生嘅，咁人點樣面義自己嘅人生呢？有存在主義者就強調「荒謬感」：生命無常，冇事物係必然。例如卡謬用希臘悲劇去表達人生嘅荒謬感，我地就好似悲劇嘅主角，受到「命運」嘅玩弄，好多事都無法控制。但咁樣係咪代表人生就係冇意義？非也，就正如希臘悲劇嘅主角，佢地勇於面對命運，冇逃避同接受現實，「活著就是一種反抗」。沙特亦都話，人冇左上帝，所以「註定」係自由嘅，但正因為呢種自由，一切都有可能，我地可以創造自己嘅人生，唔受「命運」嘅束縛。 認識自我、面對人生、接受死亡，人自出生就無法迴避呢三大課題。孔子都要「四十而不惑，五十而知天命」，對於人生，我究竟需要幾耐先至睇得透？