مؤخرًا طلع مصطلح جديد اسمه "FemTech" أو تكنولوجيا المرأة، وهو مش مجرد تطبيقات لونها زهري، إنما ثورة كاملة بمجالات الصحة والابتكار والاستثمار، هدفها تسد فجوة تاريخية وتعطي صحة المرأة الأولوية اللي بتستحقها.
هاي التكنولوجيا بتشمل كل مراحل حياة المرأة: من صحة الخصوبة والحمل والولادة، وحتى التجميل ونوع المييك-أب اللازم. بنحكي عن أجهزة ذكية بتراقب صحة الجنين، وعن ذكاء اصطناعي بقدر يساعد بتشخيص أمراض مثل سرطان الثدي أو بطانة الرحم المهاجرة بوقت أبكر، وعن منصات بتقدم دعم نفسي متخصص للأمهات الجداد، وحتى عن حلول ولو جزئية بتساعد الأمهات في غزة في ظل غياب سبل العناية الشخصية بفترة الحرب والحصار. القصة أكبر بكثير من تطبيق على الموبايل، هي إعادة رسم للخريطة الصحية كلها، وما بعد.
عشان نفهم القصة من كل جوانبها، جبنالكم بهالحلقة من "صوت التك" محامية ومبادرة من قلب المجال. أسست أول منصة عربية لتطوير مبادرات تكنولوجية للنساء، وبتشتغل يوميًا على تقاطع القانون، التكنولوجيا، والذكاء الاصطناعي الأخلاقي. رح نحكي معها عن التحديات، الفرص المتاحة بمجتمعنا، وكيف ممكن التكنولوجيا عنجد تحسن حياة كل امرأة فينا.
استمعوا للحوار الذي يستضيف من خلاله المدوّن التقني أنس أبو دعابس، ضيفة الحلقة نسرين مصاروة عودة - مؤسسة مشروع انوثتِك - المنصة العربية لتطوير مبادرات تكنولوجية للنساء، محامية في مجال القانون التجاري وحماية البيانات في مكتب محاماة، مؤسسة مكتب NMO Legal لتقديم المرافقة القانونية بمجال الخصوصية، حماية البيانات والذكاء الاصطناعي الأخلاقي Ethical Artificial Intelligence، كمان أنها حاصلة على لقب أول في القانون من الجامعة العبرية بالقدس، لقب ثاني بالقانون، التكنولوجيا والابتكار بتفوّق و certified data protection officer (DPO).
============
لا تنسوا تفعيل زر الاشتراك الموجود في تطبيقكم تصلكم حلقاتنا الأسبوعية مع الضيوف والمواضيع التقنية.
لملاحظاتك واقتراحاتكم: anas.dabes@gmail.com
أو عبر قناة التليجرام الخاصة: https://t.me/sowteltech
صوت التك، بودكاست تقني من انتاج “راديو الناس”، الناصرة
