أوائل التسعينات لما بدأت أخد مصروف يومي ف ايدي حوالي 25 قرش، كان أبويا بيحاول بيعلمني إزاي أدير مصروفاتي بنفسي وكان مديني الاختيار إني أخده بشكل أسبوعي أو شهري، ف الأول طبعًا فشلت في حكاية الشهري دي ..

لكن بمرور الوقت كلنا بنتعلم.مع ظروف التضخم وارتفاع الأسعار بفتكر طريقة بابا وهو بيحاول يقنعني إن دا سعره غالي أو مش هقدر أجيب دا دلوقتي لكن ممكن على الصيف نقدر نجيب اللي إنت عاوزه…في الوقت دا قدرته المادية أنا مش متخيلها ولا مُدْركها .. لكن عدى بينا.. ..

دا اللي بفكر فيه حاليًا وسط كل الظروف اللي حوالينا .. إزاي التغييرات الاقتصادية دي غيرتنا في معيشتنا وحياتنا الاجتماعية ... إزاي بنعدي الأزمة وأثرها فينا إيه.الاقتصادي الكبير جلال أمين ومن خلال كتابه ماذا حدث للمصريين اللي صدر في 98.. قدم تصوره ل اللي حصل للمصريين خلال الفترة من 45 إلى 95. كان بيتكلم فيه عن ضعف روح الانتماء وانتشار اللامبالاة وتأثير سياسة الانفتاح على القيم المجتمعية دا غير عدم الاهتمام بالعقول المصرية والسماح لهجرتها أو بمعني أصح دفعها عن غير قصد للهجرة، كل الأوضاع المجتمعية والاقتصادية أثرت علينا من مختلف الجوانب وساهم في تغيير العلاقات بين الطبقات الاجتماعية المختلفة وترتيبها.

هنتكلم في الحلقة الثالثة من بودكاست الناحية التانية عن الظواهر الاقتصادية والتغيير المجتمعي وأثره علينا .. مع "مجدي عبدالهادي" الباحث الاقتصادي.