52-科學家拄著諞仙仔——古盜鳥事件
    欲研究已經滅絕的物種演化細節，干焦會使透過化石，所擺化石就誠有科學價值。中國政府誠早就共化石定做國家資源，袂當出口。猶毋過中國一寡看會著化石的地層，是佇散赤人的農地，遐的人發現共化石賣去黑市，比艱苦作穡加真好賺，所擺原仔有人會共化石挖去賣。
    1997年，中國遼寧省有一个作穡人發現著化石，毋過伊咧挖的過程，無張持共有化石的石枋用碎去，伊紮轉去厝了後，就共幾若塊破碎的化石，黏做一塊敢若誠完整的骨骼化石。1999年，買賣化石的生理人用假的許可證，共彼塊鬥出來的化石，用八萬美金賣去美國。
    買彼塊化石的是一間博物館的館長，伊發見化石頂面的生物，佮進前知影的攏無仝，伊頂半身有羽毛，前跤足成原始的鳥仔，尾溜顛倒佮獸跤類恐龍誠相siâng，伊揣幾若个科學家朋友做伙研究，in共這塊化石頂懸的生物，號名做「遼寧古盜鳥」，佇「國家地理雜誌」發表。
    毋過這塊化石是對中國違法走私來的，館長的朋友攏勸伊愛還予中國，伊答應欲還轉去，毋過伊希望中國先派專家來參伊做伙研究這塊化石，雖罔這个新物種已經佇雜誌發表矣，不而過伊感覺這塊化石的後跤佮尾溜，若像鬥袂合，心內愈想愈憢疑，想欲揣中國的專家閣進一步確認。
    中國的科學家來研究了後，發見這塊化石身軀佮尾溜的敆逝誠明顯，而且方向無對同，化石閣是用足濟塊無仝的石枋，黏佇一塊頁岩頂面，予伊看起來若一塊完整的化石。經過誠濟的研究，確認這是對兩種無仝的生物化石鬥出來的。這件代誌予「國家地理雜誌」感覺足卸世眾的，佇2000年發表對這件代誌的調查報告，共這場騙局做一个結束。
    這馬這塊鬥出來的化石原仔囥佇中國展覽，這个騙局嘛提醒逐家毋管做啥物研究，攏著愛誠頂真，才袂脫箠，予人看笑話。
    今仔日的「科學家拄著諞仙仔——古盜鳥事件」就講到遮，感謝逐家的收聽。
--------------------------
散赤 sàn-tshiah

敆逝kap-tsuā

脫箠thut-tshuêthut-tshê
--------------------------





留言告訴我你對這一集的想法： https://open.firstory.me/user/clohik9vc0vuq01s15xufcp5w/comments